ISIFUNDO 34

Singamtjengisa Njani UJehova Bona Siyamthanda?

IDLALE

Kghani uzizwa umthanda khulu uZimu solo uthome ukufunda iBhayibheli? Ungakuthabela na ukuragela phambili uqinisa ubuhlobo bakho naye? Nange kunjalo, khumbula bona uJehova nakabona uthuthukisa indlela omthanda ngayo uzokuthanda khulu begodu uzokutlhogomela. Ungamtjengisa njani bona uyamthanda?

1. Simtjengisa njani uJehova bona siyamthanda?

Sitjengisa uJehova ukuthi siyamthanda ngokumlalela. (Funda yoku-1 kaJwanisi 5:3.) Akakateleli muntu bona amlalele. Kunokuthi enze njalo, usinikele ithuba lokuthi sikhethe ukuthi sizomlalela namkha awa. Kubayini enze njalo? UJehova ufuna ‘simlalele ngokusuka ehliziyweni.’ (Roma 6:17) Lokhu kutjho bona ufuna simlalele ingasi ngombana sikatelelekile kodwana ngombana simthanda. Ingcenye yesi-3 neye-4 yencwadi le, zenzelwe ukukusiza bona utjengise ukuthi uyamthanda uJehova ngokwenza lokho okumthabisako begodu ungenzi okungamthabisiko.

2. Kubayini kungaba budisi ukutjengisa uJehova bona siyamthanda?

“Bunengi ubudisi olungileko aqalana nabo.” (IRhubo 34:20) Soke siqalana nobudisi obubangwa kukuba nesono. Singaqalana nemiraro yezeemali, ukungabi nobulungiswa nobunye ubudisi. Nasiqalana nemiraro kungaba budisi ukwenza lokho uJehova afuna sikwenze. Lokhu kungabangelwa kukuthi kungaba lula ukungalaleli uJehova. Kodwana nawukwenza ngokuthembeka lokho uJehova athi ukwenze, utjengisa bona umthanda ukudlula nanyana yini. Utjengisa bona uthembekile kuye begodu naye uzokuthembeka kuwe. Angeze akutjhiye.—Funda iRhubo 4:4.

FUNDA NGOKUNGENELELEKO

Funda ngokuthi kubayini uJehova athaba nawumlalelako nokuthi yini engakusiza bona uhlale uthembekile kuye.

3. Indaba ekuthintako

Encwadini kaJobho sifunda bona uSathana wamangalela uJobho nabo boke abantu abafuna ukulotjha uJehova. Funda uJobho 1:1, 6–2:10, bese nicoca ngemibuzo le:

Ngokwalokho uSathana akutjhoko, kubayini uJobho bekalalela uJehova?—Funda uJobho 1:9-11.
USathana wabamangalela njani boke abantu kuhlanganise nawe?—Funda uJobho 2:4.

Funda uJobho 27:5b, bese nicoca ngombuzo lo:

UJobho utjengise njani bona umthanda kwamambala uJehova?

UJobho utjengise bona uyamthanda uJehova ngokuhlala athembekile kuye

Sitjengisa uJehova bona siyamthanda ngokuhlala sithembekile kuye

4. Thabisa uJehova

Funda izAga 27:11, bese nicoca ngemibuzo le:

UJehova uzizwa njani nawuhlakaniphileko begodu umlalela? Kubayini azizwa njalo?

5. Ungathembeka kuJehova

Indlela esithanda ngayo uJehova yenza sifune ukutjela abanye ngaye. Ukuthembeka kwethu kuye kusenza sibatjele nanyana kubudisi ukwenza njalo. Dlala IVIDIYO, bese nicoca ngemibuzo elandelako.

IVIDIYO: Vikela Ukukholwa Kwakho Nanyana Uphikiswa (5:09)

Inga-kghani kubudisi kuwe ukutjela abanye ngoJehova?
Evidiyweni le yini esize uGrayson bona ahlule ukusaba ebekanakho?

Kulula ukuthembeka kuJehova nasithanda lokho akuthandako begodu sihloye lokho akuhloyako. Funda iRhubo 97:10, bese nicoca ngemibuzo le:

Ngokwalokhu okufundileko, ngiziphi ezinye izinto uJehova azithandako? Ngiziphi ezinye izinto azihloyako?
Ungakufunda njani ukuthanda izinto ezilungileko begodu uhloye ezingakalungi?

6. Ukulalela uJehova kusiza thina

Ukulalela uJehova kuhlala kuyintwehle. Funda u-Isaya 48:17, 18, bese nicoca ngemibuzo le:

Ucabanga bona singamthemba uJehova ukuthi uhlala akwazi okusilungeleko? Kubayini?
Ukufunda kwakho iBhayibheli nokwazi uZimu weqiniso uJehova, kukusize njani bekube nje?

ABANYE ABANTU BATHI: “UZimu akanandaba nokuthi ngiziphatha njani.”