Aowa. Mokgatlo wa rena ga o sekaseke dimobi, dipuku goba dikoša tše itšego gore o bee molao wa seo ditho tša rena di swanetšego go se phema. Ka baka la’ng?

Beibele e kgothaletša motho yo mongwe le yo mongwe go tlwaetša ‘matla a gagwe a go hlatha’ gore a kgone go kgethologanya se se nepagetšego le se se fošagetšego.—Baheberu 5:14.

Mangwalo a re nea melao ya motheo yeo Mokriste a ka naganišišago ka yona ge a kgetha boithabišo. a Go etša dikarolong ka moka tša bophelo, pakane ya rena ke go ‘tšwela pele re kgonthišetša se se amogelegago go Morena.’—Baefeso 5:10.

Beibele e ruta gore dihlogo tša malapa di na le matla a taolo, ka gona di ka kgetha go se dumelele malapa a tšona go tšea karolo boithabišong bjo itšego. (1 Bakorinthe 11:3; Baefeso 6:1-4) Lega go le bjalo, ka ntle le ka lapeng, ga go na motho yo a nago le tshwanelo ya go thibela difilimi, dikoša goba diopedi tše itšego a re ka gore ga di swanele ditho tša phuthego.—Bagalatia 6:5.