Na Mmušo wa Modimo o ka Pelong ya Motho?
Karabo ya Beibele
Aowa, Mmušo wa Modimo ga se boemo bjo bo lego ka dipelong tša Bakriste. a Beibele e hlalosa lefelo la kgonthe la wona ka go o bitša gore ke “Mmušo wa magodimo.” (Mateo 4:17) Ela hloko kamoo Beibele e bontšhago gore mmušo wo ke yona pušo ya kgonthe yeo e bušago e le legodimong.
Mmušo wa Modimo o na le babuši, balata, melao le tshwanelo ya go dira gore thato ya Modimo e dirwe legodimong le lefaseng.—Mateo 6:10; Kutollo 5:10.
Mmušo wa Modimo goba pušo ya gagwe o tla buša “batho ba merafo, ditšhaba le maleme ka moka” a lefase. (Daniele 7:13, 14) Mmušo wo o laolwa ke Modimo ka go lebanya, e sego balata ba wona.—Psalme 2:4-6; Jesaya 9:7.
Jesu o boditše baapostola ba gagwe ba botegago gore ba be ba tla buša le yena Mmušong wa magodimo gore ba “dule didulong tša bogoši.”—Luka 22:28, 30.
Mmušo woo o na le manaba, ao o tlago go a fediša.—Psalme 2:1, 2, 8, 9; 110:1, 2; 1 Bakorinthe 15:25, 26.
Beibele ga e rute gore Mmušo wa magodimo o ka pelong ka kgopolo ya gore o buša ka gare ga pelo ya motho. Lega go le bjalo, e bontšha gore “lentšu la Mmušo” goba “ditaba tše tše dibotse tša Mmušo” di ka kgoma e bile di swanetše go kgoma dipelo tša rena.—Mateo 13:19; 24:14.
Polelwana e rego “Mmušo wa Modimo o gare ga lena” e bolela’ng?
Batho ba bangwe ba ile ba gakantšhwa ke lefelo leo Mmušo wo o lego go lona ka baka la tsela yeo Luka 17:21 e fetoletšwego ka yona diphetolelong tše dingwe tša Beibele. Ka mohlala, Beibele ya Sepedi e re “mmušô wa Modimo o ka mo teng xa lena.” E le gore re kwešiše temana ye ka tsela ya maleba, re swanetše go hlahloba mantšu a dikologilego taba ye.
Mmušo wa Modimo o be o se ka dipelong tša baganetši bao e lego babolayi le bao ba nago le dipelo tše thata
Jesu o be a bolela le Bafarisei, e lego sehlopha sa baetapele ba bodumedi bao ba bego ba mo ganetša le bao ba bego ba rera go mmolaya. (Mateo 12:14; Luka 17:20) Na ke mo go kwagalago go nagana gore Mmušo wo e be e le boemo bjo bo bego bo le ka dipelong tša bona tše thata? Jesu o ba boditše gore: “Ka gare le tletše boikaketši le go hloka molao.”—Mateo 23:27, 28.
Diphetolelo tše dingwe di hlalosa ka mo go nepagetšego mantšu a Jesu a lego go Luka 17:21 ka gore: “Mmušo wa Modimo o na le lena.” (Mongwalo o sekamego ke wa rena; Contemporary English Version) Phetolelo ya Lefase le Lefsa e re “Mmušo wa Modimo o gare ga lena.” Mmušo wa magodimo o be “o na le” Bafarisei bao goba o le “magareng” ga bona, ka kgopolo ya gore Jesu, yena yo a bego a kgethilwe ke Modimo gore e be Kgoši, o be a na le bona.—Luka 1:32, 33.
a Dikereke tše dintši tša Bakriste di ruta gore Mmušo wa Modimo o ka gare ga motho goba o ka pelong ya gagwe. Ka mohlala, kua United States, kereke ya Southern Baptist Convention e boletše gore Mmušo wa Modimo ke “pušo ya Modimo ka pelong le bophelong bja motho.” Ka mo go swanago, Mopapa Benedict XVI pukung ya gagwe ya Jesus of Nazareth, o boletše gore “Mmušo wa Modimo o tla ka pelo e theetšago.”
You May Also Like
ESSENTIAL BIBLE TEACHINGS
Mmušo wa Modimo ke Eng?
Ge Jesu a be a le mo lefaseng, o boletše ka Mmušo wa Modimo go feta selo le ge e le sefe. Ke kgale balatedi ba gagwe ba rapelela gore Mmušo woo o tle.
DITEMANA TŠA BEIBELE DI A HLALOSWA
Tlhaloso ya Mareka 1:15—“Mmušo wa Modimo o Batametše”
Na Jesu o be a e ra gore Mmušo wa Modimo o šetše o thomile go buša?
MOROKAMI
Kgoši ya Mmušo wa Modimo ke Mang?
Bangwadi ba Beibele ba mmalwa ba ile ba ngwala dilo tšeo di bego di tla re thuša go tseba motho yoo e bego e tlo ba Kgoši ya Mmušo wa Modimo. Go batho ka moka bao ba kilego ba phela mo lefaseng, ke motho o tee feela yoo dilo tšeo bangwadi bao ba boletšego ka tšona di diregilego go yena.
DIPOTŠIŠO TŠA BEIBELE DI A ARABJA
Mmušo wa Modimo o tla Phetha Eng?
Ithute seo o ka se letelago ge mmušo wa Modimo o tla be o buša lefase.
DITHUTO TŠA BEIBELE
Leka Thuto ya Rena ya Beibele
Ithute Beibele mahala o thušwa ke motho yo mongwe.