Aowa. Beibele e hlalosa ka mo go kwagalago gore Modimo o bopile batho, diphoofolo le dimela tša ‘mehutahuta.’ a (Genesi 1:12, 21, 25, 27; Kutollo 4:11) E bolela gore Adama le Efa ke batswadi ba rena ba mathomo, gomme ka moka ga rena re tšwa go bona. (Genesi 3:20; 4:1) Beibele ga e dumelelane le thuto ya gore Modimo o dirile gore dilo di itire, gomme a dira gore dilo tšeo di dire dilo tše dingwe tša mehutahuta. E bile ga e ganetšane le borasaense ge go tliwa tabeng ya gore go na le go se swane moo go lego gona mohuteng o mongwe le o mongwe wa sephedi goba wa batho. Ka mohlala, batho ba ka fapana ka mmala goba sebopego.

•  Na ge Modimo a be a bopa dilo o dirile gore dilo di itire?

•  Na thuto ya gore dilo di itirile e dumelelana le Beibele?

•  Beibele e re’ng ka taba ya gore diphoofolo le dimela di kgona go fetofetoga le maemo?

 Kgopolo yeo batho ba nago le yona ya gore Modimo o dirile gore dilo di itire, e hlaloswa ka ditsela tša go fapafapana. Puku ya Encyclopædia Britannica ge e hlalosa taba ye e re: “Modimo o diriša mokgwa wa gore ge sephedi se tlwaela go phela lefelong la sona, se tswala diphedi tše dingwe gore lefaseng go be le diphedi tša mehutahuta.”

 Thuto ye ya gore diphedi di kgona go tšweletša diphedi tše dingwe e akaretša dikgopolo tše di latelago:

•   Mohuta o mongwe le o mongwe wa diphedi o tšwa dipheding tšeo di swanago le tšona, tšeo di kilego tša ba gona kgale.

•   Sephedi se fetoga ka mo go feletšego gomme ya ba sephedi se sengwe.

•   Modimo o tsenya letsogo kaekae, gore dilo tšeo re boletšego ka tšona ka mo godimo di direge.

 Thuto ya gore Modimo o dirile gore dilo di itire, e dira gore go bonagale eka pego ya Genesi ga se ya nepagala. Lega go le bjalo, Jesu o ile a bolela ka pego ya Genesi e le seo se ilego sa direga kgale. (Genesi 1:26, 27; 2:18-24; Mateo 19:4-6) Beibele e re pele Jesu a etla mo lefaseng, o phetše legodimong le Modimo gomme o ile a šoma gotee le Modimo go bopa ‘dilo tšohle’ tše di lego gona. (Johane 1:3) Se se ra gore thuto ya gore ge Modimo a be a bopa dilo o dirile gore dilo di itire ga e dumelelane le seo Beibele e se rutago.

 Beibele e dumelelana le taba ya gore go na le go se swane moo go lego gona mohuteng o mongwe le o mongwe wa sephedi goba wa batho. Mara ga e re botše gore seo se direga gakaakang. E bile ga e ganetšane le kgopolo ya gore diphoofolo le dimela tša mehutahuta, tšeo Modimo a di bopilego, di kgona go fetofetoga le maemo gore di kgone go phela tikologong yeo di lego go yona. Le ge batho ba bangwe ba lebelela diphetogo tšeo e le tsela ya gore dilo di itirile, seo ga se nnete ka gore ga gona diphedi tše difsa tšeo di bago gona.