Jobo 5:1-27
5 “Goeletša o kgopele thušo! Na go tla ba le yo a go arabago?
Le gona ke morongwa* ofe yo o tlago go mmitša gore a go thuše?
2 Ka gobane setlaela se tla bolawa ke go galefa,Gomme motho yo a dumelago se sengwe le se sengwe o tla bolawa ke mona.
3 Nna ke bone setlaela se sepelelwa ke dilo gabotse,Eupša gateetee ntlo ya sona ya rogwa le go welwa ke mathata.
4 Bana ba sona ga ba šireletšega,Ba swarwa ka go hloka toka kgorong ya motse, gomme ga go na motho yo a ba thušago.
5 Yo a swerwego ke tlala o ja tšeo di bunnwego ke setlaela,E bile o di tšea gare ga meetlwa,Le gona dilo tša bona di a tšewa.
6 Ka gobane dilo tše kotsi ga di mele mabung,Gomme mathata ga a hloge fase.
7 Ga go kgonege gore bophelo bja motho bo hloke mathata,Go no swana le ge go ka se kgonege gore ditlhase tša mollo di se ke tša fofela godimo.
8 Eupša ge nkabe ke le wena, ke be ke tla kgopela Modimo gore a nthuše,Le gona ke be ke tla botša Modimo bothata bja ka,
9 Yena yo a dirago dilo tše dikgolo le tšeo di sa bapišwego le selo,Yo a dirago dilo tše dintšhintšhi tšeo di dirago gore motho a šale a ahlame.
10 Yena yo a nešago pula lefasengLe yo a dirago gore meetse a ye nageng.
11 O tsoša bao ba nyatšegago a ba bea maemong a godimo,E bile o phološa bao ba nyamilego.
12 O hlakahlakanya maano a baradia,E le gore dilo tšeo ba di dirago di se ke tša sepela gabotse.
13 O dira gore ba bohlale ba tanywe ke maano a bona,E le gore dilo tšeo ba nyakago go di dira di se ke tša sepela gabotse.
14 Ba no ba leswiswing le ge e le mosegare,Le gona ba phopholetša dilo mosegare wa sekgalela bjalo ka ge eka ke bošego.
15 O phološa batho go bao ba bolelago mantšu ao a hlabago,*Gomme a phološa modiidi go batho bao ba nago le matla,
16 E le gore modiidi a hwetše thušo,Eupša bao ba sa lokago ba tswalelega melomo.
17 Go thaba motho yoo Modimo a mo kgalemago,Ka gona o se ke wa gana ge Ramatlaohle a go phošolla!
18 Ka gobane Modimo yena o gobatša motho, eupša ka morago a mmofa dintho,E bile o kweša motho bohloko, eupša ka morago a mo fodiša.
19 O tla go phološa ge o welwa ke mathata ka go latelana,O tla go phološa le ge o ka welwa ke mathata ga tshela goba ga šupa.
20 Nakong ya ge go wele tlala o tla go phološa gore o se ke wa hwa,Gomme nakong ya ntwa o tla go phološa gore o se ke wa bolawa ka sabola.
21 Modimo o tla go šireletša go batho bao ba bolelago mantšu ao a hlabago,E bile o ka se tšhoge ge mathata a etla.
22 O ka se tshwenyege ka tlala goba gore o tla fedišwa,E bile o ka se be le lebaka la go tšhoga diphoofolo tša nageng.
23 Maswika a nageng a ka se go gobatše,E bile diphoofolo tša nageng di ka se go hlasele.
24 O tla tseba gore tente ya gago e šireletšegile,Le gona ge o eya go yo hlola moo diruiwa tša gago di fulago gona o ka se hwetše go na le seruiwa seo se timetšego.
25 O tla ba le bana ba bantšhi,Gomme ditlogolo tša gago e tla ba tše dintšhi go swana le dimela tša lefase.
26 O tlo ikela lebitleng o sa na le matla,Go swana le dingata tša mabele tšeo di bunnwego sehleng sa ona.
27 Bona! Re nyakišišitše taba ye, gomme e no ba bjalo.
Theetša, gomme o amogele seo.”
Mengwalo ya tlase
^ Phetolelo ya lentšu ka lentšu e re, “mokgethwa.”
^ Phetolelo ya lentšu ka lentšu e re, “go sabola yeo e tšwago melomong ya bona.”