Ngwaga o mongwe le o mongwe, bana babo rena le dikgaetšedi bao ba lego tirelong e kgethegilego ya nako e tletšego lefaseng ka moka, ba mengwa go ya Sekolong sa Beibele sa Watchtower Gilead, seo se swarelwago Lefelong la tša Thuto leo le lego in Patterson, New York. a Sekolong se, barutwana ba ithuta go šoma ka thata dikabelong tše di fapafapanego mokgatlong wa Jehofa. Le gona, sekolo se se ba tlwaetša go tiiša diphuthego le diofisi tša makala lefaseng ka moka.

 Ka nnete sekolo sa Gilead ke sa batho ba ditšhaba ka moka. Ka mohlala, klase ya bo-147 yeo e bego e swere ka 2019 e be e na le barutwana ba 56 bao ba tšwago dinageng tše 29. Barutwana bao ba yago Gilead ba kgethwa gare ga bana babo rena le dikgaetšedi bao ba šetšego ba le tirelong e kgethegilego ya nako e tletšego, go swana le bao ba lego Bethele, balebeledi ba tikologo, baromiwa le babulamadibogo ba kgethegilego.

 Sekolo se se lokišetšwa e sa le pele, pele barutwana ba ka tla sekolong. Ka mohlala, Lefapha la go Rulaganya Maeto la Ntlongkgolo le rekela bao ba memilwego go tla sekolong dithekethe tša sefofane. Ka kakaretšo, klaseng ya bo-147 ya Gilead, go dirišitšwe R16 400 go rekela morutwana yo mongwe le yo mongwe thekethe ya go tla sekolong le go boela morago. Barutwana ba ba tšwago Dihlakahlakeng tša Solomon ba ile ba swanelwa ke go namela difofane tše nne go ya Patterson gomme ka morago ba namele tše tharo go boela gae. Go ya le go boa Patterson, go ba tšere dikhilomithara tše di fetago 35 400! Go dirišitšwe R35 000 go rekela morutwana yo mongwe le yo mongwe yo a tšwago Dihlakahlakeng tša Solomon thekethe. Go re Lefapha la go Rulaganya Maeto la Ntlongkgolo le seketše tšhelete, le diriša lenaneo le itšego la khomphutha go le thuša go hwetša dithekethe tšeo di sa turego. Le ge lefapha leo le hweditše dithekethe, lenaneo leo le tšwela pele ka dibeke goba mohlomongwe le dikgwedi le nyaka inthaneteng go bona ge e ba dithekethe di ile fase. Lefapha le le reka dithekethe tše dingwe le diriša di-point le di-voucher tšeo go neetšwego ka tšona.

 Barutwana ba bantši ba swanetše go ba le di-visa e le gore ba kgone go ya United States. Ka gona, Lefapha la tša Molao la Ntlongkgolo, le ba thuša go hwetša di-visa tša barutwana. Ka kakaretšo, go dirišitšwe R7 700 go direla morutwana yo mongwe le yo mongwe visa le go mo ngwadišetša sekolong se.

 Thuto yeo barutwana ba ba e hwetšago e re hola bjang? Ekwa seo Hendra Gunawan a se boletšego. Hendra ke mogolo wa phuthego yeo e lego ka Borwa Bohlabela bja Asia. O phuthegong e tee le banyalani bao ba tšwago sekolong sa Gilead. O re: “Mathomong, phuthego ya rena e be e se na babulamadibogo ba ka mehla. Eupša ka morago ga gore banyalani ba ba fihle phuthegong ya rena, moya wa bona o mafolofolo le wa go rata go ikgafa o ile wa fetela le go ba bangwe gomme le bona ba thoma go bula madibogo. Ka moragonyana, kgaetšedi yo mongwe wa phuthegong ya rena o ile a ba a ya Sekolong sa Baebangedi ba Mmušo!”

 Sergio Panjaitan yo a šomago gotee le batho bao ba tšwago sekolong sa Gilead ofising ya lekala la Borwa Bohlabela bja Asia, o re: “Thuto yeo ba e hweditšego ga e hole bona ba nnoši, e hola le rena ba bangwe. Ba ithutile dilo tše dintši kudu! Ga ba ipone ba le bohlokwa go feta ba bangwe ka baka la thuto yeo, go ena le moo ba abelana le ba bangwe seo ba ithutilego. Seo ba se dirago se a re kgothatša, ke moka le rena ra kgothatša ba bangwe.”

 Ditshenyagalelo tša sekolo se di patelwa bjang? Di patelwa ka meneelo yeo e ntšhwago lefaseng ka moka yeo bontši bja yona e ntšhwago go dirišwa e mengwe ya mekgwa yeo e lego donate.ps8318.com. Re leboga kudu meneelo ya lena e tšwago pelong yeo e thekgago sekolo se seo se nago le barutwana ba go tšwa lefaseng ka moka.