Seo Batswadi ba se Bolelago

Ge e ba o le motswadi wa ngwana yo a tsenago sekolo sa bomapimpana, ga go na pelaelo gore o lebeletšana le ditlhohlo tše itšego. Ka mohlala, o itshwara bjang ge ngwana wa gago a na le matepe? O ka mo ruta bjang se se nepagetšego le se se fošagetšego gomme wa mo phošolla ka tsela e lekalekanego? Ela hloko kamoo batswadi ba bangwe ba ilego ba swaragana le ditaba tše ka gona.

MATEPE

“Nakong ya ge ngwana a na le matepe, o letetše go hwetša selo se sengwe le se sengwe seo a se nyakago. Morwa wa rena o be a na le bothata bjo. Ge a be a sa hwetše dilo tšeo a di nyakago, o be a tla fošaganya dilo. Yo e be e le ngwana wa rena wa mathomo, ka gona re be re se na phihlelo ya go godiša ngwana yo a nago le matepe. Ga se gwa ka gwa re thuša ka selo ge ba bangwe ba be ba re botša gore re swanetše go letela gore ngwana a itshware ka tsela ye.”—Susan wa Kenya.

“Ge morwedi wa rena a be a na le nywaga e mebedi, o be a itahlela fase, a goeletše, a lle le go ragaraga . . . Seo se be se mpherekanya! Go leka go boledišana le yena ka nako yeo ga se gwa ka gwa ba le mohola. Ka gona nna le monna wa ka re be re re a ye ka phapošing ya gagwe ke moka re mmotše gore ge a ikwa a le kaone, a ka tla gomme ra boledišana le yena ka taba yeo. Ge a theošitše maswafo, yo mongwe wa rena o be a eya ka phapošing ya gagwe a mo thuše go kwešiša lebaka leo boitshwaro bja gagwe bo bego bo sa swanela. Mokgwa wo o ile wa atlega. Ka nako e nngwe re ile ra utswa ka tsebe ge a be a rapela Modimo a kgopela tshwarelo. Ge nako e dutše e tšwela pele, matepe a gagwe a ile a fokotšega ke moka a fela.”—Yolanda wa Sepania.

“Bana ba nyaka go bona gore ba ka itirela boithatelo go fihla kae. Ngwana wa gago a ka gakanega ge o mo dumelela go dira selo seo o bego o tloga o mmoditše tsebe-go-kwa gore se fošagetše. Re lemogile gore ge re be re tiiša letsogo e bile re sa fetofetoge, ganyenyane-ganyenyane bana ba rena ba ile ba ithuta gore go goeletša ga se tsela ya go hwetša seo ba se nyakago.”—Neil wa Brithania.

TAYO

“Ge ngwana a na le nywaga ya ka tlase ga e mehlano, go thata go tseba tsela yeo a theetšago ka yona. Selo sa bohlokwa ke gore o bušeletše seo o se bolelago. O swanetše go se bušeletša gantšintši, mohlomongwe ka makga a dikete, o bolela o dira ditšhupetšo e bile o tiišitše ka ganong.”—Serge wa Fora.

“Gaešita le ge bana ba rena ba bane ba godišeditšwe ka lapeng letee, yo mongwe le yo mongwe o be a na le semelo sa gagwe. Yo mongwe o be a fo lla ge a tseba gore o re nyamišitše; yo mongwe o be a fo leka go bona gore a ka itaola go fihla kae. Ka dinako tše dingwe go fo ba lebelela o sentše sefahlego goba go ba kgalema go be go lekane, mola ka dinako tše dingwe re be re swanetše go ba otla.”—Nathan wa Canada.

“Go bohlokwa gore o se ke wa tlogelela dilo. Eupša ka nako e swanago, motswadi ga se a swanela go bea melao e thata goba go buša ka molamo wa tšhipi. Ka dinako tše dingwe ge ngwana a tloga a itshola, re bona go le kaone gore re be le tekatekano gomme re fokotše tsela yeo re mo otlago ka yona.”—Matthieu wa Fora.

 “Ke leka gore ke se ke ka bea melao e mentši, eupša yeo e lego gona ga e fetošwe. Morwa wa ka wa nywaga e meraro o tseba kotlo yeo a tlago go e hwetša ge a sa kwe gomme seo se dira gore a itshware. Go ba gona, go bonolo gore ge ke lapile ke hlokomologe diphošo tša gagwe. Eupša e le gore ke se ke ka fetofetoga, ke ikgapeletša go gata mogato. Go dula o sa fetofetoge go bohlokwa kudu!”—Natalie wa Canada.

GO SE FETOFETOGE

“Go bonagala bana ba banyenyane ba kgona go gopola gabotse ge motswadi a sa ka a kgomarela seo a bego a se boletše.”—Milton wa Bolivia.

“Ka dinako tše dingwe morwa wa ka o botšiša ka taba e tee ka mekgwa e sa swanego e le ge a leka go bona ge e ba re ka mo nea karabo e swanago. Ge nka mmotša selo se se fapanego le seo mmagwe a mmoditšego sona, o tla bona gore ga re bone dilo ka go swana ke moka a ikhola ka boemo bjoo.”—Ángel wa Sepania.

“Ka dinako tše dingwe ke be ke hlokomologa phošo yeo morwa wa ka a e dirilego ge ke be ke tsogile gabotse eupša ke mo otla gabohloko ge ke be ke sa tsoga gabotse. Ke ile ka lemoga gore se se gakatša boitshwaro bja gagwe.”—Gyeong-ok wa Korea.

“Go bohlokwa gore bana ba banyenyane ba kwešiše gore ge e ba boitshwaro bjo itšego bo fošagetše lehono, bo tla dula bo fošagetše.”—Antonio wa Brazil.

“Ge e ba batswadi ba sa kgomarele seo ba se boletšego, ngwana o tla nagana gore tatagwe le mmagwe ga ba tsebe seo ba se nyakago le gore diphetho tša bona di ithekgile ka gore ba tsogile bjang. Eupša ge e ba batswadi ba kgomarela melao yeo ba e beilego, bana ba tla tseba gore phošo e dula e le phošo. Ye ke tsela e nngwe yeo ka yona batswadi ba neago tšhireletšo le go bontšha lerato.”—Gilmar wa Brazil.

“Bana ba ka ikhola ka maemo ao go ona go bonagalago motswadi a se na seo a ka se dirago ntle le go ba nea seo ba se nyakago—go swana le ge go na le batho ba bangwe. Ge e ba ke gana, ke botša morwa wa ka le go tloga mathomong e bile ke mo hlalosetša gabotse gore nka se mo theetše le ge a ka nkgopela gantšintši.”—Chang-seok wa Korea.

“Batswadi ba swanetše go dumelelana. Ge e ba nna le mosadi wa ka re sa dumelelane ka selo se itšego, re boledišana ka sona re le ba babedi. Bana ba kgona go bona ge batswadi ba bona ba sa dumelelane ka taba e itšego, le gona ba tla leka go ikhola ka boemo bjoo.”—Jesús wa Sepania.

“Ge ngwana a tseba gore batswadi ba gagwe ba a dumelelana le gore a ka se ba hlalefetše, o ikwa a šireletšegile. O tseba seo a tlago go se hwetša, go sa šetšwe gore o a kwa goba ga a kwe.”—Damaris wa Jeremane.

“Nna le mosadi wa ka re a tseba gore go kgomarela seo re se boletšego go akaretša le go direla morwedi wa rena selo se sebotse seo re mo holofeditšego sona. Ka tsela ye o ithuta gore a ka bota dikholofetšo tša rena.”—Hendrick wa Jeremane.

“Ke tla tenega ge e ba ka mehla mothwadi wa ka a fetoša dilo tšeo a nyakago gore ke di dire mošomong. Bana le bona ba ikwa ka tsela yeo. Ba ikwa ba šireletšegile ge ba tseba melao e bile ba tseba le gore melao yeo e ka se fetoge. Le gona ba swanetše go tseba ditlamorago tša go se kwe le gore ditlamorago tšeo di ka se fetoge.”—Glenn wa Canada.

[Ntlhakgolo go letlakala 8]

“Ee ya lena a e be Ee, gomme Aowa ya lena e be Aowa.”—Jakobo 5:12

 [Box/​Pictures on page 9]

KANEGELO YA LAPA

Go Ima go sa Letelwa—Kamoo re Ilego ra Lebeletšana le Boemo

Ka ge go anega Tom le Yoonhee Han

Tom: Re be re nyalane ka dikgwedi tše tshelelago feela ge mosadi wa ka Yoonhee a be a hwetša gore o imile. Ka ge ke be ke nyaka go kgonthišetša Yoonhee gore a ka ithekga ka nna gore a hwetše khomotšo le matla, ke ile ka itira okare ga ke na bothata. Eupša ge e le gabotse ke be ke tshwenyegile!

Yoonhee: Ke be ke tlaletšwe, ke tšhogile! Ke be ke lla ke sa fetše, ke ikwa ke sa lokela go ba mma e bile nka se kgone go dira bjalo.

Tom: Le nna ke be ke sa ikwe ke loketše go ba tatago motho! Eupša ka morago ga gore re bolele le batswadi ba bangwe, re ile ra lemoga gore go ima go sa letelwa go tlwaelegile go feta kamoo re bego re nagana ka gona. Le gona re ile ra thušwa ke go kwa batswadi ba bangwe ba bolela gore ba thabela go ba botate goba bomma. Ganyenyane-ganyenyane, dilo tšeo ke bego ke di boifa le go se kgonthišege ka tšona di ile tša tšeelwa sebaka ke go fagahlela go bona ngwana wa rena.

Yoonhee: Ka morago ga go belegwa ga Amanda, re ile ra lebeletšana le ditlhohlo tšeo re bego re sa ka ra lebeletšana le tšona. O be a dulela go lla, le gona ke feditše dibekebeke ke sa robale. Ke be ke sa kganyoge dijo gomme ka feleletša ke ikwa ke lapile kudu. Mathomong ke be ke sa nyake go ba gare ga batho. Eupša ka morago ke ile ka lemoga gore go ipea lekatana ka gae go ka se nthuše ka selo. Ka gona ke ile ka fetša nako ke na le basadi ba bangwe bao ba sa tšwago go ba le bana. Seo se ile sa nthuša gore ke kgone go boledišana le ba bangwe ka boemo bja ka gomme sa nthuša go lemoga gore e be e se nna feela ke nago le mathata.

Tom: Ke ile ka katanela gore re kgomarele lenaneo le le rulagantšwego la lapa. Ka mohlala, ka ge re le Dihlatse tša Jehofa, nna le Yoonhee re be re ikemišeditše go ya tšhemong le dibokeng tša Bokriste ka mehla. Le gona, go ba le ngwana go baka ditshenyagalelo tšeo tše dingwe tša tšona le bego le sa di letela. Re ile ra kgonthišetša gore re phela ka seo re nago le sona e le gore re se tsene dikolotong, ka ge seo se be se tla fo re okeletša kgateletšego.

Yoonhee: Mathomong ke be ke nagana gore go ya tšhemong go ka se kgonege ka ge gantši bana ba baka tšhitišo. Eupša ge e le gabotse batho ba thabela go ba moo go nago le bana. Go lemoga seo go nthušitše go dula ke tšea karolo bodireding le go ba le pono e nepagetšego ka ngwana wa ka.

Tom: Beibele e re bana ke “bohwa bjo bo tšwago go Jehofa” e bile ke “moputso.” (Psalme 127:3) Nna ke nagana gore mantšu ao a ra gore ngwana ke mpho e bohlokwa. Go fo swana le bohwa le ge e le bofe, o na le boikgethelo: O ka bo boloka gabotse goba o ka fo bo tšitlanya. Ke ithuta gore megato ka moka ya kgolo ya ngwana ga e swane, le gona ke swanetše go kgatha tema mogatong o mongwe le o mongwe wa bophelo bja morwedi wa ka ka gobane ge sebaka seo se fetile, o ka se sa se hwetša gape.

Yoonhee: Ka dinako tše dingwe bophelo bo tla go tlaba, le gona go ba le ngwana yo o bego o sa rulaganya go ba le yena ga se phošo. Gona bjale Amanda o na le nywaga e tshelelago, e bile ga ke nagane gore nka phela ntle le yena.

[Seswantšho]

Tom le Yoonhee ba na le morwedi wa bona Amanda