“PUNO ke e kgolo eupša bašomi ke ba sego kae. Ka baka leo, kgopelang Mong wa puno gore a romele bašomi punong ya gagwe.” (Luka 10:2) Mantšu a ao a ilego a bolelwa ke Jesu mengwageng e ka bago e 2 000 e fetilego, a hlalosa gabotse maemo a lego kua Myanmar lehono. Ke ka baka la’ng re re’alo? Ke ka gobane kua Myanmar, go na le bagoeledi ba 4 200 feela bao ba bolelago ditaba tše dibotse go batho ba 55 milione.

Lega go le bjalo, Jehofa, yena “Mong wa puno,” o ile a kgoma dipelo tša bana babo rena le dikgaetšedi ba makgolo bao ba tšwago dinageng tša go fapafapana. Ka gona ba ile ba ya nageng ye ya ka Borwabohlabela bja Asia gore ba yo thuša tšhemong ya moo. Ke’ng seo se dirilego gore ba tloge dinageng tša gabo bona? Ba thušitšwe ke’ng gore ba hudugele moo? Le gona ke ditšhegofatšo dife tšeo ba di hwetšago? Anke re kweng.

Mengwageng e fetilego, Kazuhiro e lego mmulamadibogo wa kua Japane, o ile a wa, a idibala gomme a išwa sepetlele. Ngaka e ile ya mmotša gore a se sa otlela ka mengwaga e mebedi ka ge a be a kile a wa. Kazuhiro o ile a nyama kudu. O ile a ipotšiša gore: ‘Ke tlo kgona bjang go tšwela pele ka bobulamadibogo’? O ile a rapela Jehofa a sa kgaotše, a mo kgopela gore a mmulele tsela ya gore a tšwele pele a bula madibogo.

Kazuhiro o re: “Ka morago ga kgwedi, mogwera wa ka yo a bego a hlankela kua Myanmar o ile a kwa ka bothata bjo bja ka. O ile a mphounela gomme a mpotša gore: ‘Mo Myanmar senamelwa seo se dirišwago kudu ke pese. Ge e ba o ka tla mo, o ka tšwela pele o eya tšhemong ntle le go šomiša koloi!’ Ke ile ka botšiša ngaka ya ka ge e ba go ka kgonega gore ke hudugele Myanmar ka ge ke be ke sa babja. Seo se ilego sa mmakatša ke gore ngaka e ile ya re go nna: ‘Ga bjale ngaka ya bjoko yeo e tšwago Myanmar e etetše mo Japane. Ke tlo go tsebiša yona. Ge e ba o ka wa gape, e tla go hlokomela.’ Ke ile ka bona Jehofa a nkarabile.”

Kapelapela, Kazuhiro o ile a romela e-mail ofising ya lekala ya Myanmar gomme a kgopela gore yena le mosadi wa gagwe ba yo hlankela moo e le babulamadibogo ba ka mehla. Ka morago ga matšatši a mahlano feela, ofisi ya lekala e ile ya araba ka gore, “Etlang, re hloka babulamadibogo ba bantši!” Kazuhiro le mosadi wa gagwe Mari, ba ile ba rekiša dikoloi tša bona, ba dira di-visa, gomme ba reka dithekethe tša sefofane. Lehono, ba thabela go hlankela le sehlopha seo se dirišago polelo ya diatla kua Mandalay. Kazuhiro o re: “Phihlelo ye e dirile gore re nape re eba le tumelo kholofetšong ye e lego go Psalme  37:5 yeo e rego: ‘Lahlela tsela ya gago go Jehofa, o ithekge ka yena, gomme yena o tla go thuša.’”

Ka 2014, Dihlatse tša Jehofa kua Myanmar di ile tša ba le tokelo ya go ba le kopano ya selete e kgethegilego. Baeng ba bantši bao ba tšwago dinageng tše dingwe ba ile ba tla kopanong yeo. Yo mongwe wa bona e be e le Monique, e lego kgaetšedi yo a nago le mengwaga e 34 yo a tšwago United States. O re: “Ka morago ga go boa kopanong yeo, ke ile ka rapela Jehofa ka mmotšiša ka seo ke swanetšego go se dira ka bophelo bja ka. Le gona, ke ile ka bolela le batswadi ba ka ka dipakane tša ka tša moya. Mafelelong ka moka ga rena re ile ra phetha ka gore ke swanetše go boela Myanmar, eupša seo se ile sa direga ka morago ga nako e telele le ka morago ga go rapela gantšintši.” Monique o hlalosa lebaka.

O re: “Jesu o ile a kgothaletša balatedi ba gagwe gore ba ‘bale ditshenyagalelo.’ Ka gona ke ile ka ipotšiša gore: ‘Na ke tla kgona go hudugela Myanmar? Na ke tla kgona go itlhokomela ge ke le moo ntle le go fetša nako e ntši ke le mošomong wa boiphedišo?’” O re: “Ke ile ka lemoga kapejana gore ga ke na tšhelete e lekanego gore nka hudugela nageng e nngwe.” Bjale, o ile a kgona bjang gore a feleletše a hudugile?​—Luka 14:28.

Monique o re: “Ka letšatši le lengwe motho yo ke bego ke mo šomela o ile a mpitša. Ke be ke tšhogile kudu, ke nagana gore o tlo re ke feletšwe ke mošomo. Eupša o ile a leboga tsela yeo ke šomago gabotse ka yona. Ke moka a mpotša gore o nyaka go mpha bonus, yeo ke rilego ge ke e balela, ya dira tlwaa tšhelete yeo ke bego ke e hloka gore ke kgone go lefa dikoloto tša ka ka moka!”

Monique o thomile go hlankela Myanmar go tloga ka December 2014. O ikwa bjang ka go hlankela moo tlhokagalong? O re: “Ke thabela go hlankela mo. Ke ithuta Beibele le batho ba bararo. Yo mongwe wa bona o na le mengwaga e 67. O dula a ntumediša a thabile le ka go nkgokarela. Ge a be a thoma go ithuta gore leina la Modimo ke Jehofa, o ile a lla. O itše: ‘Ke la mathomo ke ekwa gore leina la Modimo ke Jehofa. O yo monyenyane kudu go nna, eupša o nthutile selo se bohlokwa kudu bophelong.’ Ke sa tsebe gore ke re’ng, le nna ke ile ka lla. Diphihlelo tša go swana le tše di dira gore go hlankela mo go nago le tlhokagalo go be bose kudu.” Moragonyana mo, Monique o bile le tokelo ya go ya Sekolong sa Baebangedi ba Mmušo.

Selo se sengwe seo se dirilego gore bana babo rena ba yo hlankela Myanmar ke pego ya naga ye, yeo e lego ka go Yearbook ya 2013. Kgaetšedi Li, yo a nago le mengwaga ya ka godimo ga e 30, yena o be a šetše a dula ka Borwabohlabela bja Asia. O be a šoma ka mehla mošomong wa boiphedišo, eupša Yearbook yeo e ile ya mo dira gore a nagane ka go yo hlankela kua Myanmar. O re: “Ka 2014 ge ke be ke ile kopanong ya selete e kgethegilego kua Yangon, ke ile ka kopana le banyalani ba bangwe bao ba hlankelago tlhokagalong tšhemong ya se-China kua Myanmar. Ka ge ke tseba se-China, ke ile ka phetha ka gore ke hudugele Myanmar gore ke yo thekga sehlopha sa moo sa se-China. Ke ile ka kopana le Monique gomme ra šoma gotee, ke moka ra hudugela Mandalay. Jehofa o re šegofaditše ka go hwetša mošomo wa nakwana wa go ruta sekolong setee gomme re hweditše le madulo kgauswi le sekolo seo. Ntle le gore go a fiša le gore go na le mathata a mangwe, re thabela tšhemo ya mo. Batho ba Myanmar ba phela bophelo bjo bonolo, le gona ba na le tlhompho e bile ba rata go theetša molaetša wa ditaba tše dibotse. Go thabiša kudu go bona kamoo Jehofa a dirago gore batho ba bantši ba kwe ditaba tše dibotse. Ga ke na pelaelo gore Jehofa o nnyaka mo Mandalay.”

Bana babo rena ba bantši bao ba hlankelago tlhokagalong ba bone gore go rapela go a thuša. Ka mohlala Jumpei le mosadi wa gagwe Nao, bao ba lego mengwageng ya bo-30, ba be ba šetše ba hlankela phuthegong ya polelo ya diatla kua Japane. Ke ka baka la’ng ba ile ba hudugela Myanmar? Jumpei o re: “Nna le mosadi wa ka re be re na le pakane ya go hlankela moo go nago le tlhokagalo  nageng e šele. Ngwanabo rena yo mongwe wa phuthegong ya polelo ya diatla kua Japane o ile a hudugela Myanmar. Le ge tšhelete yeo re bego re e bolokile e be e le e nyenyane, ka May 2010 le rena re ile ra hudugela Myanmar. Bana babo rena le dikgaetšedi ba moo ba ile ba re amogela ka lethabo!” Ngwanabo rena Jumpei o ikwa bjang ka go hlankela tšhemong ya moo Myanmar ya polelo ya diatla? O re: “Batho ba mo ba thabela kudu. Ge re bontšha batho ba difoa dibidio tša polelo ya diatla, ba šala ba maketše. Ga re itshole gore re dirile phetho ya go tlo hlankela Jehofa mo!”

Jumpei le Nao ba kgona bjang go itlhokomela? Jumpei o re: “Ka morago ga mengwaga e meraro, re be re dirišitše e ntši ya tšhelete ya rena yeo re bego re e bolokile gomme re be re se na tšhelete ya go tlo lefa madulo ngwageng o latelago. Nna le mosadi wa ka re ile ra rapela Jehofa kudu. Re ile ra hwetša lengwalo la go tšwa ofising ya lekala re sa letela, leo le bego le re laletša go ba babulamadibogo ba kgethegilego ba nakwana! Re be re botile Jehofa gomme re bone gore ga se a ka a re lahla. O be a dutše a re hlokometše ka mehla.” Jumpei le Nao le bona ba sa tšwa go ya Sekolong sa Baebangedi ba Mmušo.

Ngwanabo rena Simone yo a tšwago Italy, yo a nago le mengwaga e 43, le mosadi wa gagwe Anna yo a tšwago New Zealand, yo a nago le mengwaga e 37 ba ile ba hudugela Myanmar. Ke’ng seo se ba dirilego gore ba hudugele moo? Anna o re: “Pego ya Myanmar yeo e lego ka go Yearbook ya 2013 ke yona e re dirilego gore re hudugele mo!” Simone o re: “Re thabela kudu go ba Myanmar. Bophelo bja mo ga bo tshwenye, le gona ke fetša nako ya ka e ntši ke šomela Jehofa. Go a thabiša go bona ka tsela yeo Jehofa a re hlokomelago ka yona ge re le tlhokagalong.” (Ps. 121:5) Anna o re: “Ga sa nka ka thaba ka tsela ye bophelong. Re phela bophelo bjo bonolo. Ke fetša nako e ntši ke na le monna wa ka gomme seo se re dira gore re be bagwera. Le gona re hweditše bagwera ba bangwe ba bohlokwa. Batho ba mo ga se ba hloya Dihlatse tša Jehofa le gona tsela yeo ba thabelago molaetša wa rena ka yona e kgahliša kudu!” E kgahliša ka ditsela dife?

Anna o re: “Ka letšatši le lengwe kua mmarakeng, ke ile ka botša ngwanenyana yo mongwe yo a tsenago yunibesithi ka Modimo, gomme ra kwana gore re tle re bonane gape. Ge ke fihla moo, o be a tlile le mogwera wa gagwe. Nakong e latetšego, o ile a tla le ba bangwe ba mmalwa. Ge ke boela go yena gape, o ile a tla le ba bangwe gape. Ga bjale ke ithuta le ba bahlano ba bona.” Simone o re: “Batho ba mo ba rata batho e bile ba rata go tseba ka Modimo. Ba bantši ba bona ba a thabela. Ge e le gabotse re no hloka nako ya go ba bona ka moka.”

Eupša bana babo rena ba ile ba dira’ng gore ba feleletše ba hudugetše Myanmar? Mizuho yo a tšwago Japane o re: “Nna le monna wa ka Sachio, ka mehla re be re nyaka go hudugela nageng yeo go nago le tlhokagalo. Eupša re be re ipotšiša gore re hudugele kae? Ka morago ga gore re bale pego ya Myanmar ka go Yearbook ya 2013 re ile ra kgongwa kudu ke diphihlelo tša moo, moo e lego gore re ile ra thoma go nagana ge e ba re ka kgona go  hudugela Myanmar.” Sachio o oketša ka gore: “Re ile ra phetha ka gore re yo fetša beke re le Yangon, e lego toropo e kgolo ya Myanmar, go yo bona gore dilo di sepela bjang moo. Dilo tšeo re ilego ra di bona moo di ile tša re kgodiša gore re be re swanetše go hudugela Myanmar.”

Rodney le mosadi wa gagwe Jane, bao ba tšwago Australia, bao ba lego mengwageng ya bo-50, e sa le ba hudugela Myanmar ka 2010 le morwa wa bona Jordan gotee le morwedi wa bona Danica. Rodney o re: “Re ile ra kgongwa kudu ke go bona kamoo batho ba mo ba nyakago go ithuta ka Modimo. Nka rata go kgothaletša malapa a mangwe gore le ona a leke go yo hlankela dinageng tša go swana le Myanmar.” Ka baka la’ng? O re: “Go kgahliša kudu go bona ka tsela yeo go hlankela tlhokagalong go re dirago gore re be kgauswi le Jehofa! Bafsa ba bantši ba dula ba swaregile ka difouno tša bona, dikoloi, mešomo le dilo tše dingwe. Eupša bana ba rena ba swaregile ka go ithuta mantšu a mafsa gore ba yo a diriša tšhemong. Ba ithuta kamoo ba ka hlalosetšago motho yoo a sa tsebego Beibele ka Modimo. Le gona ba ithuta kamoo ba ka neago dikarabo ka leleme la moo ge ba le dibokeng, e bile ba dula ba swaregile ka dilo tše dingwe tšeo di amanago le go hlankela Jehofa.”

Ngwanabo rena Oliver, yo a nago le mengwaga e 37 yo a tšwago United States, o hlalosa gore ke ka baka la eng a kgothaletša ba bangwe gore le bona ba leke go ya tlhokagalong. O re: “Go tloga lefelong leo ke le tlwaetšego le leo ke le ratago e le gore ke yo hlankela Jehofa lefelong leo ke sa le tsebego go ntlišeditše mehola e mentši kudu. Go hudugela kgole le gae go nthušitše gore ke thome go itshepa le gore ke bote Jehofa go sa šetšwe boemo bjo ke tla bago ke le go bjona. Go hlankela Jehofa le bana babo rena bao ke sa ba tsebego eupša re hlankela Modimo o tee, go nthušitše gore ke bone gore lefaseng le ga go na selo se bohlokwa go feta go bolela ka Mmušo wa Modimo.” Lehono, Oliver le mosadi wa gagwe Anna, ba tšwela pele ba hlankela Jehofa ka mafolofolo tšhemong ya se-China.

Kgaetšedi Trazel, yo a nago le mengwaga e 52 yo a tšwago Australia, ga e sa le a hlankela Myanmar go tloga ka 2004. O re: “Ke kgothaletša bao ba ka kgonago gore ba yo hlankela Jehofa tlhokagalong. Ke bone gore ge e ba o nyaka go hlankela moo go nago le tlhokagalo, Jehofa o tla šegofatša maiteko a gago. Ga sa nka ka lora gore ke tla phela ka tsela ye. Ruri ke phela bophelo bjo bo kgahlišago kudu le bjo bo kgotsofatšago.”

Eka mantšu a a bana babo rena bao ba hlankelago Myanmar, a ka go kgothaletša gore o yo hlankela tšhemong yeo e sa kago ya šongwa gore o yo thuša batho bao ba nyakago go tseba ka Modimo. Ee, bao ba lego tlhokagalong ba kgopela thušo ba re: “Hle tshelela Myanmar gomme o tle o re thuše!”