Bana ba hloka batho ba bagolo bao ba ka ba hlahlago le go ba eletša mo bophelong. Ka ge o le motswadi, ke wena o swanetšego go hlahla ngwana wa gago le go mo eletša; ge e le gabotse, bjoo ke boikarabelo bja gago. Go oketša moo, batho ba bangwe ba bagolo le bona ba ka thuša go eletša ngwana wa gago.

Dinageng tše dintši, bana ga ba fetše nako e ntši ba na le batho ba bagolo. Nagana ka mehlala e latelago:

• Sekolong, barutiši le batho ba bagolo ga se ba bantši, ka gona bana ba fetša nako e ntši ba na le dithaka tša bona.

• Bana ba bangwe ge ba boa sekolong, ba hwetša go se na motho ka gae ka gore batswadi ba bona ba a šoma.

• Nyakišišo e nngwe e re kua United States, letšatši le letšatši bana ba magareng ga mengwaga e 8 le e 12 ba fetša diiri tše e ka bago tše tshela ba bogetše TV, ba theeditše mmino, ba diriša founo, ba bapala dipapadi tša khomphutha le go ithabiša ka dilo tše dingwe. *

Puku ya Hold On to Your Kids e re: “Bafsa ga ba kgopele thušo, keletšo le tlhahlo go batswadi, barutiši le go batho ba bangwe ba bagolo, eupša ba e kgopela go . . . dithaka tša bona.”

Fetša nako o na le ngwana wa gago.

KELETŠO YA BEIBELE: “Tlwaetša mošemane [goba, ngwana] go ya ka tsela yeo a swanetšego go sepela ka yona; le ge a tšofetše, a ka se e lahle.”—Diema 22:6.

Ka tlhago bana ba nyaka gore batswadi ba bona ba ba thuše le go ba hlahla. Ge e le gabotse, ditsebi di re le ge ngwana e eba mofsa, o rata go theetša keletšo ya batswadi ba gagwe go e na le go theetša ya dithaka tša gagwe. Serutegi seo se bitšwago Laurence Steinberg se ngwadile ka pukung yeo e rego, You and Your Adolescent gore: “Gore ngwana e tlo  feleletša e le motho wa mohuta mang ge a gotše, go ithekgile kudu ka seo batswadi ba mo rutago sona ge a dutše a gola.” Steinberg o okeditše ka gore: “Bafsa ba rata go theetša dikgopolo tša batswadi ba bona le seo ba ba botšago sona, le ge ka dinako tše dingwe ba sa dumelelane le seo batswadi ba bona ba ba botšago sona.”

Ka ge bana ba letetše gore batswadi ba bona ba ba hlahle, diriša sebaka seo go hlahla ngwana wa gago pele selemo e eba ngwagola. Fetša nako o na le yena gomme o mo rute ka bophelo le ka dilo tše dingwe tšeo di ka mo thušago bophelong.

Nyakela ngwana wa gago motho yo a ka mo eletšago.

KELETŠO YA BEIBELE: “Yo a sepelago le ba bohlale o tla hlalefa.”—Diema 13:20.

Na go na le motho yo mongwe yo mogolo yo a ka go thušago go hlahla ngwana wa gago le go mo eletša? Ge e ba a le gona, o ka mo kgopela gore a fele a fetša nako a na le ngwana wa gago. Eupša o se ke wa mo rweša morwalo wa gago. Motho yo bjalo yo o mo tshepago, yoo a ka se gobatšego ngwana wa gago, a ka thuša ngwana wa gago go gola gabotse. Lesogana le lengwe la ka Beibeleng e lego Timotheo, le ile la thušwa kudu ke go gwerana le moapostola Paulo, e bile moapostola Paulo le yena o ile a thušwa ke go gwerana le lesogana leo.—Bafilipi 2:20, 22.

Lehono, malapa a mantši a arogane ka baka la gore borakgolo le bomakgolo, bo-malome, bo-mmane le ba bangwe ba leloko ba dula kgole le kgole. Ge e ba le wena ba geno ba le kgole, nyakela ngwana wa gago batho ba bagolo bao ba ka mo rutago mekgwa e mebotse.