Rata Batho ba Bangwe
Bothata bja go se Rate Batho ba Bangwe
Ge motho a na le kgethollo e ka se no fela kapejana. Ka mohlala, ge motho a lwala, o swanetše go dira se sengwe gore a fole gomme seo se tlo mo tšea nako e telele. Ka mo go swanago, ge motho a na le kgethollo, o swanetše go dira se sengwe gore a se sa ba le yona, gomme le yena se se tlo mo tšea nako e telele. O ka dira’ng gore o tloše kgethollo yeo e lego ka garegare ga gago?
Seo Beibele e se Rutago
BAKOLOSE 3:14 e re: “Aparang lerato gobane ke setlemo se se phethagetšego sa botee.”
Lengwalo le le ra gore’ng? Le ra gore go direla batho ba bangwe dilo tše dibotse go tla re thuša gore re be le botee. Ge o bontšha batho ba bangwe gore o a ba rata, o ka se be le kgethollo. Ge o ka ithuta go rata batho ba bangwe, o ka se sa ba hloya goba go ba ahlola.
Seo o ka se Dirago
Nagana ka dilo tše dibotse tše o ka di direlago batho ba morafo woo mathomong o bego o o kgetholla go bontšha gore o a ba rata. Dilo tšeo o ka ba direlago tšona ga se gore e swanetše go ba tša maemo. Leka go dira dilo tše di latelago:
Le dilo tše dinyenyane tšeo re ka naganago gore ga di re selo, di ka dira gore re se sa ba le kgethollo
Bontšha batho ba morafo woo botho ka go ba bulela mabati goba ge le le dinamelweng tša batho bohle, wa ba šuthelela moo o bego o dutše gona.
Leka go swara le bona magang le ge ba sa tsebe gabotse leleme la gago.
O se ke wa ba felela pelo ge ba dira dilo ka tsela ye o sa e kwešišego.
Leka go ba kwešiša ge ba go botša ka mathata a bona.