“Nako ya go Rata le Nako ya go Hloya”

“MODIMO ke lerato.” Dinageng tše dingwe batho ba foreimela mantšu ao gomme ba a fega lebotong ka dintlong tša bona. Ruri a ke mantšu a mabotse ao a hlalosago seo Modimo a lego sona—mothofatšo wa lerato.

Lega go le bjalo, batho ba bantši ga ba tsebe gore mantšu ao a tšwa ka Beibeleng. Moapostola Johane ke yena a ngwadilego gore: “Yo a se nago lerato ga a tsebe Modimo, gobane Modimo ke lerato.” (1 Johane 4:8) Johane gape o ngwadile ka lerato leo Modimo a ratago batho ba rekollegago ka lona, a re: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

Ba naganne ka seo, ba bangwe ba ka nagana gore Modimo o dula a ikemišeditše go hlokomologa selo le ge e le sefe seo re se dirago. Tsela yeo batho ba bantši ba phelago ka yona e bontšha gore ba nagana gore Modimo a ka se ba sekišetše boitshwaro bja bona, go sa šetšwe gore ba itshwara bjang. Eupša na ruri seo ke therešo? Na Modimo o rata batho ka moka, ba ba lokilego gotee le ba babe? Na go ke go be le nako yeo ka yona Modimo a hloyago?

Lerato la Modimo ge le Bapišwa le Lehloyo la Gagwe

Kgoši Solomone yo bohlale o boletše mantšu a a rego: “Selo se sengwe le se sengwe se na le nako ya sona e beilwego, gaešita le dilo tšohle ka tlase ga magodimo di na le nako ya tšona . . . nako ya go rata le nako ya go hloya.” (Mmoledi 3:1, 8) Go ya ka molao wo wa motheo, gaešita le ge Modimo a ena le lerato le botho kudu, go na le dinako tšeo ka tšona a hloyago.

Tlhaloso ya pele, lentšu “hloya” le bolela’ng ge le dirišwa ka Beibeleng? Puku e nngwe ya ditšhupetšo e araba ka gore: “Ka Mangwalong, lentšu ‘hloya’ le na le ditlhaloso tše mmalwa. Le ka bolela bonaba bjo bo tseneletšego, bonaba bjo bo tšwelago pele bjoo gantši bo sepedišanago le lehloyo. Lehloyo le bjalo e ka ba maikwelo ao a nweletšego ao a dirago gore motho a nyake go gobatša yo a mo hloilego.” Ye ke tlhaloso yeo re e tlwaetšego kudu, gomme re bona ditlamorago tša mohuta wo wa lehloyo lefaseng ka moka. Eupša puku yeo e tšwela pele ka gore: “Le gona lentšu ‘hloya’ le ka bolela go se rate selo kudu eupša ka ntle le maikemišetšo le ge e le afe a go se gobatša.”

Tlhaloso ye ya bobedi ke yona re e ahlaahlago mo. Ke go ila ka mo go tsenetšego, go hlaswa ka mo go feletšego—e sego lehloyo goba kganyogo ya go gobatša. Na Modimo a ka ba le lehloyo la mohuta wo? Ela hloko seo se bolelwago go Diema 6:16-19 ge e re: “Go na le dilo tše tshela tšeo Jehofa a di hloilego; ee, ke tše šupago tšeo di mo šišimišago: ke mahlo a ikgantšhago, leleme la maaka le diatla tšeo di tšhollago madi a se nago molato, pelo e logago maanomabe, maoto ao a akgofelago go kitimela bobeng, hlatse ya  maaka yeo e hlamago maaka gotee le motho yo mongwe le yo mongwe yo a lohlanyago bana ba motho.”

Ka ge re ka bona, go na le mekgwa e itšego yeo Modimo a e hloilego. Lega go le bjalo, ga se gore o hloile motho yo a dirago dilo tše bjalo. O ela hloko mabaka a kwagalago a bjalo ka bofokodi bja nama, tikologo, tsela yeo motho a godišitšwego ka yona le go hloka tsebo. (Genesi 8:21; Baroma 5:12) Mongwadi wa Diema o hlalosa se ka mohlala o mobotse, o re: “Jehofa o kgalema yo a mo ratago, go etša ge tate a kgalema morwa wa gagwe yo a mo ratago.” (Diema 3:12) Motswadi a ka hloya ditiro tša ngwana tša go se kwe, eupša o sa dutše a rata ngwana wa gagwe gomme o dira sohle seo a ka se kgonago go mo thuša gore a lahle boitshwaro bja gagwe bjo bobe ka go mo laya. Jehofa ka lerato la gagwe o dira se se swanago ge go ena le kholofelo ya go ka phološa motho yo a dirago sebe.

Ge Lehloyo le Lokafatšwa

Lega go le bjalo, go thwe’ng ge e ba motho a tseba thato ya Modimo fela a gana go e dira? Modimo ga a amogele motho yo bjalo e bile ga a mo rate. Ge e ba ka boomo a dira dilo tšeo Jehofa a di hloilego, o dira gore A mo hloye. Ka mohlala, Beibele e re: “Jehofa yena o hlahloba moloki gotee le yo kgopo, moya wa Gagwe o hloile le ge e le mang yo a ratago bošoro.” (Psalme 11:5) Ga go na tebalelo bakeng sa motho yo bjalo yoo a sa itsholego, ka ge moapostola Paulo a hlalosa seo ka mo go kwagalago lengwalong leo a le ngwaletšego Baheberu ge a re: “Ge re tlwaela go dira sebe ka boomo ka morago ga ge re hweditše tsebo e nepagetšego ya therešo, gona ga go sa na sehlabelo se sengwe bakeng sa dibe, eupša se se šetšego ke go letela kahlolo e boifišago le bogale bjo bo tukago bjo bo tlago go ja bao ba ganetšago Modimo.” (Baheberu 10:26, 27) Ke ka baka la’ng Modimo yo lerato a gata mogato woo?

Ge motho a tlwaela go dira sebe se segolo ka boomo, bokgopo bo ka tsema medu kudu moo motho a ka palelwago ke go bo tlogela. E ka ba yo kgopo le yo a ganago go fetoga. Beibele e bapiša motho yo bjalo le lepogo le le ka se kgonego go fetoša mebalabala ya lona. (Jeremia 13:23) Ka ge a sa itshole, motho yoo o dira seo Beibele e se bitšago “sebe sa ka mo go sa felego” seo go se nago tebalelo bakeng sa sona.—Mareka 3:29.

Go bile bjalo ka Adama le Efa gotee le ka Judase Isikariote. Ka ge Adama le Efa ba be ba bopilwe ba phethagetše e bile taelo yeo Modimo a ba neilego yona e be e le e kwagalago le gona ba be ba e kwešiša, go molaleng gore ba dirile sebe ka go rata le ka boomo gomme ka go re’alo ba hloka boitshwarelelo. Mantšu ao Modimo a ba boditšego ona ka morago a be a sa ba laletše gore ba bontšhe go itshola. (Genesi 3:16-24) Gaešita  le ge Judase a be a se a phethagala, o be a phetše kgauswi kudu le Morwa wa Modimo fela a fetoga moeki. Jesu o ile a mmitša “morwa wa tshenyego.” (Johane 17:12) Le gona Beibele e bontšha gore Diabolo ke modiradibe wa paale yo a letetšego go fedišwa. (1 Johane 3:8; Kutollo 12:12) Batho ba ba dirile gore ba hloiwe ke Modimo.

Lega go le bjalo, go a kgothatša go tseba gore ga se batho ka moka bao ba dirilego sebe sa go se lebalelwe. Jehofa o tloga a sa fele pelo gomme ga a thabele go otla bao ba dirilego sebe ka baka la go se tsebe. (Hesekiele 33:11) O ba laletša gore ba itshole gomme ba lebalelwe. Re bala gore: “Anke motho yo kgopo a tlogele tsela ya gagwe, le yo kotsi a tlogele menagano ya gagwe; anke a boele go Jehofa yo a tlago go mo gaugela, le go Modimo wa rena ka gobane o tla mo lebalela kudu.”—Jesaya 55:7.

Pono e Lekalekanego ka Lerato le Lehloyo

Go molaleng gore ka ge Bakriste ba therešo e le baekiši ba Modimo, ba swanetše go kwešiša gore ke neng e lego “nako ya go rata” le “nako ya go hloya.” Go tšewa ke maikwelo go ka dira gore pono ya motho ka lerato le kgaugelo e hloke tekatekano. Eupša mantšu a morutiwa Juda a ka re thuša go ba le tekatekano e swanetšego magareng ga go bontšha kgaugelo le go hloya sebe ge a re: “Tšwelang pele le bontšha kgaugelo go ba bangwe, le dira bjalo ka poifo ge le dutše le hloya gaešita le seaparo seo se šilafaditšwego ke nama.” (Juda 22, 23) Ka baka leo re swanetše go hloya se sebe e sego motho yo a dirago se sebe.

Bakriste gape ba laelwa gore ba rate manaba a bona ka go a direla botse. Jesu o itše: “Tšwelang pele le rata manaba a lena le go rapelela bao ba le tlaišago.” (Mateo 5:44) Ke ka baka leo Dihlatse tša Jehofa di sa kgaotšego go bolela ditaba tše dibotse tša Mmušo wa Modimo leboelela go baagišani ba tšona, gaešita le ge ba bangwe ba sa arabele molaetšeng woo. (Mateo 24:14) Ka ge di lebelela dilo go ya ka pono ya Beibele, Dihlatse di lebelela motho yo mongwe le yo mongwe e le yo a ka ratwago le go gaugelwa ke Jehofa. Ge maiteko a tšona a go thuša batho a sa amogelwe goba ge di ganetšwa gaešita le go tlaišwa, Dihlatse di latela keletšo ya moapostola Paulo e rego: “Tšwelang pele le šegofatša bao ba le tlaišago; le šegofatše gomme le se ke la rogaka . . . Le se ke la bušetša bobe ka bobe go motho.” (Baroma 12:14, 17) Di lemoga gore Jehofa o tla kgetha gore o rata mang gomme o hloya mang. Ke Moahlodi wa mafelelo ge go tliwa ditabeng tša bophelo le lehu.—Baheberu 10:30.

Ee, “Modimo ke lerato.” Ge e le rena, re swanetše go leboga lerato la gagwe gomme re dire maiteko a go hwetša gore thato ya gagwe ke eng ke moka re e dire. Dihlatse tša Jehofa tša lefelong la geno di tla thabela go go thuša gore o ithute go tšwa Beibeleng ya gago gore thato ya Modimo ke eng le gore o ka e diriša bjang bophelong bja gago. Ge o dira bjalo, o tla efoga go hloiwa ke Modimo gomme o tla go rata.

[Ntlhakgolo go letlakala 23]

“Go na le dilo tše tshela tšeo Jehofa a di hloilego; ee, ke tše šupago tšeo di mo šišimišago: ke mahlo a ikgantšhago, leleme la maaka le diatla tšeo di tšhollago madi a se nago molato, pelo e logago maanomabe, maoto ao a akgofelago go kitimela bobeng, hlatse ya maaka yeo e hlamago maaka gotee le motho yo mongwe le yo mongwe yo a lohlanyago bana ba motho.”—DIEMA 6:16-19

[Ntlhakgolo go letlakala 24]

“Ge re tlwaela go dira sebe ka boomo ka morago ga ge re hweditše tsebo e nepagetšego ya therešo, gona ga go sa na sehlabelo se sengwe bakeng sa dibe, eupša se se šetšego ke go letela kahlolo e boifišago.”—BAHEBERU 10:26, 27

[Ntlhakgolo go letlakala 25]

“Anke motho yo kgopo a tlogele tsela ya gagwe, le yo kotsi a tlogele menagano ya gagwe; anke a boele go Jehofa yo a tlago go mo gaugela . . . O tla mo lebalela kudu.”—JESAYA 55:7

[Seswantšho go letlakala 24]

Motswadi yo lerato o laya ngwana wa gagwe gore a mo thuše

[Seswantšho go letlakala 25]

Bagolegwa ba bantši ba hotšwe ke go ratwa le go gaugelwa ke Modimo