“Neng le Neng ge le Rapela le re: ‘Tate’”

“Tate.” Lentšu leo le go gopotša’ng? Na le go gopotša monna yo lerato yoo a tshwenyegilego kudu ka boiketlo bja lapa la gagwe? Goba na le go gopotša monna yoo a sa šetšego le yoo mohlomongwe a swarago batho gampe? Seo o se naganago se ithekgile ka gore tatago e be e le monna wa mohuta mang.

“TATE” e be le lentšu leo Jesu a bego a le diriša gantši ge a be a bolela le Modimo le ge a bolela ka yena. * Ge Jesu a be a ruta balatedi ba gagwe go rapela, o itše: “Neng le neng ge le rapela le re: ‘Tate.’” (Luka 11:2) Eupša Jehofa ke tate wa mohuta mang? Karabo ya potšišo ye e tloga e le bohlokwa. Ka baka la’ng? Ge re kwešiša kutšwanyana gore Jehofa ke tate wa mohuta mang, ke moo re tlago go batamela kgauswi kudu le yena le go mo rata kutšwanyana.

Ga go na motho yoo a swanelegago kudu go re botša ka Tatago rena wa legodimong go feta Jesu. O be a ena le tswalano ya kgauswi le Tatagwe. Jesu o itše: “Ga go yo a tsebago Morwa ka botlalo ge e se wena Tate; le gona ga go yo a tsebago wena Tate ka botlalo ge e se Morwa le motho le ge e le ofe yo Morwa a ratago go mo utollela  yena.” (Mateo 11:27) Ka go re’alo, tsela e kaonekaone ya go tseba Tate ke ka Morwa wa gagwe.

Ke’ng seo re ka ithutago sona go Jesu mabapi le Tatago rena wa legodimong? Ela hloko mantšu a ao Jesu a a boletšego: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Mantšu a Jesu mo a utolla seka se segolo sa Tatago rena wa legodimong—lerato. (1 Johane 4:8) Jehofa o bonagatša lerato la gagwe ka ditsela tše dintši, tše bjalo ka kamogelo ya gagwe, lešoko, tšhireletšo le tayo ya gagwe, gotee le go kgotsofatša dinyakwa tša rena tša nama.

Re Kgonthišetšwa ka Kamogelo ya Tatago Rena

Bana ba ba le matla le sebete ge batswadi ba bona ba ba amogela. Akanya kamoo Jesu a ka bago a ile a kgothatšega ka gona ge a be a ekwa Tatagwe a re: “Yo ke Morwa wa ka, morategi, yo ke mo amogetšego.” (Mateo 3:17) Jesu le yena o re kgonthišetša gore Tate o a re rata e bile o a re amogela. Jesu o itše: “Yo a nthatago o tla ratwa ke Tate.” (Johane 14:21) A mantšu a kgothatšago gakaakang! Lega go le bjalo, go na le yo mongwe yoo a sa nyakego re homotšwa ka tsela yeo.

Sathane o leka go bjala dipelaelo menaganong ya rena mabapi le taba ya gore Tatago rena wa legodimong o a re amogela. O katanela go re kgodiša gore kamogelo yeo ga e re swanele. Gantši o dira seo nakong ya ge re hlaselega gabonolo—re babja le ge re fokola goba ge re tšofetše goba ge re imelwa ke go ikwa re paletšwe goba re nyamišitšwe. Ela hloko boemo bja lesogana leo le bitšwago Lucas, yoo a bego a ikwa a sa swanelwe ke kamogelo ya Modimo. Lucas o anega gore batswadi ba gagwe ba ile ba fetoga o šoro bofseng bja gagwe, ba tlogela ditekanyetšo tše dintši tšeo ba bego ba mo rutile tšona. Mohlomongwe leo ke lebaka leo le bego le dira gore a thatafalelwe ke go ba le tswalano le Tatagwe wa legodimong. Go oketša moo, ka ge e le motho yo a akgofago ka tlhago, Lucas gantši o be a wela mathateng, kudukudu ditswalanong tša gagwe le batho ba bangwe. Lega go le bjalo, ganyenyane-ganyenyane mosadi wa gagwe yo a sa felego pelo le yo a kgothatšago—yoo Lucas a mmitšago “tšhegofatšo e kgethegilego le mpho e tšwago go Modimo”—o ile a mo thuša go laola tlhago ya gagwe ya go akgofa. Lucas o ile a thoma go lemoga gore “Kriste Jesu o tlile lefaseng go tlo phološa badiradibe.” (1 Timotheo 1:15) Lucas o re go naganišiša ka lerato la Modimo le kamogelo ya gagwe go mo dirile gore a ikwe a thabile e bile a kgotsofetše.

Ge e ba ka dinako tše dingwe o ikhwetša o belaela gore Jehofa a ka go rata goba go go amogela, o ka kgothatšwa ke go bala le go naganišiša ka Baroma 8:31-39. Moo moapostola Paulo o re kgonthišetša ka lerato gore ga go seo se kago “go re aroganya le lerato la Modimo leo le lego go Kriste Jesu Morena wa rena.” *

Tate wa Lešoko le Legolo

Tatago rena wa legodimong o lemoga tlaišego ya rena. Ke Modimo wa “lešoko le legolo.” (Luka 1:78) Jesu o bonagaditše lešoko la Tatagwe bakeng sa batho ba sa phethagalago. (Mareka 1:40-42; 6:30-34) Bakriste ba therešo le bona ba katanela go ekiša lešoko la Tatago bona wa legodimong. Ba latela keletšo ya Beibele ya gore ba ‘bontšhane botho, ba šokelane ka bonolo.’—Baefeso 4:32.

Nagana ka phihlelo ya monna yo a bitšwago Felipe. Letšatšing le lengwe ge a be a eya mošomong, gateetee o ile a kwa sehlabi se sešoro, seo se bego se kwagala eka o hlabilwe ka thipa ka mokokotlong. O ile a kitimišetšwa sepetlele. Ka morago ga tlhahlobo yeo e tšerego diiri tše seswai, mafelelong dingaka di ile tša fihlelela phetho ya gore letlalwana la ka gare la tšhika e kgolo ya pelo yeo e bitšwago aorta le be le gagogile. Di ile tša re o be a šaletšwe ke metsotso e 25 feela gore a hwe le gore go mmua go be go ka se thuše selo.

Ba bangwe ba barapedigotee le Felipe ba be ba le gona, gomme lešoko la bona le ile la ba šušumeletša go gata mogato ka go akgofa. Kapejana ba ile ba rulaganya gore a išwe sepetleleng se sengwe, moo a ilego a buiwa ka tšhoganetšo, gomme ba ile ba dula le yena go fihlela ge ba feditše  go mmua. Se se thabišago ke gore Felipe o ile a phologa bothateng bjoo. Ge a gopola phihlelo yeo ya gagwe, Felipe o leboga lešoko leo barapedigotee le yena ba mmontšhitšego lona. Eupša Felipe o kgodišegile gore Tatagwe wa legodimong ke yena yo a ba tutueditšego gore ba bontšhe lešoko leo. Felipe o re: “Go be go le bjalo ka ge eka Modimo, bjalo ka tate yo lerato, o be a eme hleng ga ka bakeng sa go mmatlafatša.” Ee, Jehofa gantši o bontšha lešoko la gagwe ka go šušumeletša bahlanka ba gagwe lefaseng gore ba bonagatše seka seo.

Tatago Rena o a Šireletša

Ge ngwana yo monyenyane a lemoga kotsi, a ka kitimela go tatagwe bakeng sa tšhireletšo. Ngwana o ikwa a šireletšegile ge tatagwe a mo gokaretše ka lerato. Jesu o ile a bota Jehofa ka mo go feletšego bjalo ka mošireletši. (Mateo 26:53; Johane 17:15) Le rena re ka ikwa re bolokegile ge re šireletšwa ke Tatago rena wa legodimong. Tšhireletšo yeo Jehofa a e neago kudu ga bjale ke ya moya. Ka mantšu a mangwe, o re šireletša dikotsing tša moya ka go re hlama ka seo se nyakegago e le gore re kgone go phema kotsi le go šireletša segwera sa rena le yena. Tsela e nngwe yeo a re šireletšago ka yona ke ka keletšo e theilwego Beibeleng. Ge re amogela keletšo e bjalo, go ba bjalo ka ge eka Jehofa o sepela ka morago ga rena, a re: “Tsela še. Sepelang ka yona.”—Jesaya 30:21.

Ela hloko mohlala wa Tiago le bana babo e lego Fernando le Rafael, bao e bego e le ditho tša sehlopha sa mmino wa rock-and-roll. Ba be ba thabile kudu ge ba be ba kgethelwa go yo bapala go e nngwe ya diholo tše tumilego tša mmino tša kua São Paulo, Brazil. Go be go bonagala ba be ba bulegetšwe ke mojako wa katlego. Lega go le bjalo, morapedigotee le bona o ile a ba lemoša ka dikotsi tša go dula ba ena le batho bao maphelo a bona a bontšhago go hlokomologa ditsela tša Modimo. (Diema 13:20) O ile a gatelela keletšo ye yeo e theilwego Beibeleng ka go ba hlalosetša phihlelo ya gagwe. Morwarragwe o be a ile a wela boitshwarong bjo bo bontšhago go se boife Modimo ka baka la go gwerana le batho ba babe. Tiago le bana babo ba ile ba dira phetho ya go kgaotša go ba dibapadi tša mmino. Boraro bja bona ka moka ga bjale ba bodireding bja Bokriste bja nako e tletšego. Ba dumela gore go kwa keletšo ya Lentšu la Modimo go ile gwa ba šireletša moyeng.

Tatago Rena wa Legodimong o a re Laya

Tate yo lerato o laya bana ba gagwe, ka gobane o na le taba le gore ba tla ba batho ba mohuta mang. (Baefeso 6:4) Tate yo bjalo a ka tiiša letsogo, eupša le ka mohla ga a phošolle bana ba gagwe ka sehlogo. Ka mo go swanago, ka dinako tše dingwe, Tatago rena wa legodimong a ka bona go nyakega gore a re laye. Eupša tayo ya Modimo e dula e newa ka lerato gomme le ka mohla ga e sehlogo. Go swana le Tatagwe, Jesu le ka mohla o be a se sehlogo, go akaretša le dinakong tša ge barutiwa ba gagwe ba diega go arabela ge a be a ba phošolla.—Mateo 20:20-28; Luka 22:24-30.

 Ela hloko kamoo monna yo a bitšwago Ricardo a ilego a thoma go lemoga gore Jehofa o be a mo laile ka lerato. Ricardo o be a lahlilwe ke tatagwe ge a be a sa na le dikgwedi tše šupago. Ge a fihla nywageng ya gagwe ya mahlalagading, Ricardo o ile a ikwa a tloga a hloka tate. O ile a akaretšwa mekgweng e mebe, gomme letswalo la gagwe le ile la thoma go mo tshwenya. Ge a lemoga gore bophelo bjo a bego a bo phela bo be bo sa sepedišane le ditekanyetšo tša Bokriste tša boitshwaro, o ile a phetha ka gore a boledišane le bagolo ba phuthego yeo a bego a kopanela go yona. Bagolo ba ile ba mo nea keletšo e tiilego eupša e le e lerato yeo e theilwego Beibeleng. Ricardo o ile a tšeela godimo tayo yeo, eupša o ile a tšwela pele a tlaišega kudu ka baka la seo a se dirilego—a hlobaela, a lla e bile a gateletšegile. Mafelelong, o ile a thoma go lemoga gore go laiwa ga gagwe go be go bolela gore Jehofa o be a sa dutše a mo rata. Ricardo o ile a gopola mantšu a Baheberu 12:6, ao a rego: “Jehofa o laya yo a mo ratago.”

Re swanetše go dula re gopola gore tayo e akaretša se se fetago go otla goba go kgalemela bakeng sa bobe bjo bo dirilwego. Beibele gape e tswalanya tayo le tlwaetšo. Ka gona Tatago rena yo lerato wa legodimong a ka re laya ka go dumelela gore re fetše nako e itšego re lebeletšana le ditlamorago tša diphošo tša rena. Lega go le bjalo, Beibele e bontšha gore tayo ya gagwe e a re tlwaetša e bile e re thuša go dula re sepela tseleng e nepagetšego. (Baheberu 12:7, 11) Ee, Tatago rena o tloga a tshwenyegile ka boiketlo bja rena gomme o a re phošolla bakeng sa go re hola.

Tatago Rena o Kgotsofatša Dinyakwa tša Rena tša Nama

Tate yo lerato o nyaka go kgotsofatša dinyakwa tša lapa la gagwe tša nama le tša dilo tše di bonagalago. Jehofa le yena o dira bjalo. Jesu o itše: “Tatago lena wa legodimong o a tseba gore dilo tše ka moka le a di nyaka.” (Mateo 6:25-34) Jehofa o holofetša ka gore: “Le ka mohla nka se ke ka go tlogela le ge e le go go lahla.”—Baheberu 13:5.

Mosadi yo a bitšwago Nice o ile a thoma go lemoga therešo ya mantšu ao ge monna wa gagwe a be a lahlegelwa ke mošomo. O be a sa tšwa go rola modiro wa gagwe wo o bego o mo lefa gabotse e le gore a ka fetša nako e oketšegilego a ena le barwedi ba gagwe gotee le tirelong ya Modimo. Bjale ba be ba tla iphediša ka eng? O ile a rapela Jehofa. Letšatšing le le latelago, monna wa gagwe o ile a boela moo a bego a šoma gona go yo tšea dilo tša gagwe. Seo se mo makaditšego ke gore mothwadi wa gagwe o ile a mmotša gore go na le mošomo o mongwe wo o nyakago motho gomme a re o nyaka go mo fa wona! Ka gona, monna wa Nice o ile a lahlegelwa ke mošomo wa gagwe lehono gomme ka moswana a o hwetša gape. Nice le monna wa gagwe ba ile ba leboga Tatago bona wa legodimong bakeng sa mafelelo ao a mabotse. Phihlelo ya bona e re gopotša gore bjalo ka ge Jehofa e le Mohlokomedi yo lerato, le ka mohla ga a lebale bahlanka ba gagwe ba ba botegago.

Go Leboga Lerato la Tatago Rena

Ke therešo gore ga go na mantšu ao a ka kgonago go hlalosa lerato le le makatšago la Tatago rena wa legodimong! Ge re ela hloko ditsela tše dintši tšeo ka tšona a bonagatšago lerato la gagwe bjalo ka tate—ka kamogelo ya gagwe, lešoko, tšhireletšo le tayo, gotee le ka go kgotsofatša dinyakwa tša rena—ga go pelaelo gore re phetha ka gore ke Tate yo kaonekaone yoo motho a ka naganago ka yena!

Re ka bontšha bjang tebogo ya rena bakeng sa lerato leo Tatago rena wa legodimong a re bontšhitšego lona? Re ka dira maiteko a go ithuta ka mo go oketšegilego ka yena le ka morero wa gagwe. (Johane 17:3) Re ka dumelelanya bophelo bja rena le thato ya gagwe gotee le ditsela tša gagwe. (1 Johane 5:3) Re bonagatša lerato la gagwe ditirišanong tša rena le ba bangwe. (1 Johane 4:11) Ka ditsela tše bjalo ka moka, re ka bontšha gore re ithekgile ka Jehofa bjalo ka Tatago rena le gore re lebelela go ba bana ba gagwe e le tokelo.

[Mengwalo ya ka tlase]

[Ntlhakgolo go letlakala 19]

Ge re kwešiša kutšwanyana gore Jehofa ke tate wa mohuta mang, ke moo re tlago go batamela kgauswi kudu le yena le go mo rata kutšwanyana

[Ntlhakgolo go letlakala 22]

Re ka bontšha gore re ithekgile ka Jehofa bjalo ka Tatago rena le gore re lebelela go ba bana ba gagwe e le tokelo

[Lepokisi/Diswantšho go letlakala 21]

JEHOFA O BONAGATŠA LERATO LA GAGWE BJALO KA TATE KA DITSELA TŠE DINTŠI

KAMOGELO

LEŠOKO

TŠHIRELETŠO

TAYO

THEKGO YA DILO TŠA NAMA