Ge e ba o nyamišitšwe ke bodumedi bjo itšego, o ka thatafalelwa ke go bota bodumedi le ge e le bofe. Eupša kgodišega gore go na le bodumedi bjo o ka bo botago. Nakong ya ge Jesu a be a le lefaseng, o ile a kgoboketša sehlopha sa balatedi bao ba botegago gomme a ba ruta go phela ka ditekanyetšo tša Modimo. Balatedi ba kgonthe ba Kriste—batho bao ba laolwago ke matswalo bao ba katanelago go phela ka ditekanyetšo tša Bokriste—ba sa le gona. O ka ba hwetša kae?

Estelle, yo go boletšwego ka yena sehlogong sa pejana, o re: “Mafelelong ke ile ka thoma go ithuta Beibele ge ke be ke ithuta le Dihlatse tša Jehofa. Ga se gwa ntšea nako gore ke kwešiše Johane 8:32, yeo e balegago ka gore: ‘Le tla tseba therešo gomme therešo e tla le lokolla.’”

Ray, yo go boletšwego le ka yena pejana, o re: “Ka go ithuta Beibele le Dihlatse tša Jehofa, ke ithutile gore Modimo ga se yena a bakelago batho tlaišego. Ke ile ka leboga go bona gore le ge Modimo a na le lebaka le lebotse la go dumelela tlaišego gona bjale, e bile o holofetša go e fediša kgauswinyane.”

Go molaleng gore go thata go dira se se lokilego mola batho ba bantši ba na le ditekanyetšo tše fokolago tša boitshwaro. Eupša go a kgonega. Batho ba bantši ba duma eka ba ka thušwa go kwešiša le go diriša Beibele maphelong a bona. Ke ka baka leo Dihlatse tša Jehofa di swarago dithuto tša mahala tša Beibele le batho ba dimilione lefaseng. Bekeng e nngwe le e nngwe, batho ba bantši kudu ba ithuta seo ge e le gabotse Beibele e se rutago. Ka baka leo, ba batamela kgauswi le Mmopi wa bona gomme ba aga bophelo bjo bo thabišago. *

Nakong e tlago ge o kopana le Dihlatse tša Jehofa, ke ka baka la’ng o sa di botšiše lebaka leo ka lona di botago bodumedi bja tšona? Hlahloba dithuto tša tšona le pego ya tšona. Ke moka o itirele phetho ya ge e ba go na le bodumedi bjo o ka bo botago.