Ka July 9, 1964, Lefapha la Toka la Indonesia le ile la ngwadiša semolao mokgatlo wo o dirišwago ke Dihlatse tša Jehofa wa Bible Students Association. Eupša pele bana babo rena ba ka thabela tokologo ya bodumedi ka mo go feletšego, ba be ba swanetše go ngwadišwa Mokgatlong wa Ditaba tša Bodumedi. Mokgatlo wo o ile wa tšea dikeletšo go Molaodi yo Mogolo wa lefapha la go hlahla setšhaba ka Ditaba tša Bokriste leo batho ba bantši bao ba bego ba šoma go lona e bego e le Maprotestanta a dihlogo tše thata ao a bego a hloile Dihlatse tša Jehofa o šoro.

Ka letšatši le lengwe ngwanabo rena yo mongwe o ile a kopana le mohlankedi wa mmušo yo a bego a šoma kgauswiuswi le Tonakgolo ya Ditaba tša Bodumedi. Banna ba ba babedi ba ile ba hwetša gore ba tšwa motseng o tee, ka gona ba ipshina ka  poledišano ba bolela segagabo bona. Ge ngwanabo rena a boditše mohlankedi yoo ka mathata ao Molaodi yo Mogolo wa lefapha la go hlahla setšhaba ka Ditaba tša Bokriste a a neago Dihlatse, mohlankedi yo o ile a rulaganya gore bana babo rena ba bararo ba kopane le tonakgolo, yeo e bego e le Momoseleme yo a nago le bogwera le kwelobohloko. Ka May 11, 1968, tonakgolo e ile a ntšha taelo ya gore Dihlatse tša Jehofa di swanetše go lebelelwa e le bodumedi bjo bo lego molaong le go kgonthišetša gore di na le tokelo ya go dira modiro wa tšona wa go bolela ditaba tše dibotse Indonesia.

Le gona mohlankedi wa mmušo o ile a kgetha go se nyake keletšo go Molaodi yo Mogolo lefapheng la go hlahla setšhaba ka Ditaba tša Bokriste e le gore Dihlatse tše di tšwago dinageng tše dingwe di hwetše di-visa, e lego mangwalo a semolao a go dula nageng yeo e le baromiwa. Ka thušo ya mohlankedi yo yoo a nago le tekatekano, baromiwa ba 64 ba ile ba kgona go tsena Indonesia mengwageng e sego kae e latetšego.

Ka 1968, baromiwa le babulamadibogo ba kgethegilego ba e ka bago ba 300 gotee le bagoeledi ba fetago 1 200 ba be ba bolela ditaba tše dibotse nageng ka moka ya Indonesia. Baromiwa ba ile ba nea bana babo rena ba nageng yeo tlwaetšo yeo ba bego ba e hloka gomme ya ba thuša gore ba gole moyeng ka pela. Tlwaetšo yeo e be e tlile ka nako ka gobane e be e tlo ba thuša go lebeletšana le tlaišo yeo e bego e batamela ka lebelo.

Ka 1974, Molaodi yo Mogolo lefapheng la go hlahla setšhaba ka Ditaba tša Bokriste o ile a thoma gape ntwa ya gagwe ya kgale ya go thibela Dihlatse tša Jehofa. Molaodi yo mogolo wa lefapha leo o ile a ngwalela ofisi e nngwe le e nngwe ya tikologo ya Lefapha la Ditaba tša Bodumedi, a bolela maaka a gore Dihlatse tša Jehofa ga se tša ngwadišwa semolao. O ile a kgothaletša balaodi ba lefelong leo gore ba lwantšhe Dihlatse ge di ba fa seo ba bego ba re ke mathata—e lego tsela e sa bonagalego ya go ba kgothaletša gore ba tlaiše batho ba Jehofa. Balaodi ba bantši ba ile ba se theetše tlhahlo yeo. Eupša ba bangwe ba ile ba diriša  sebaka seo go thibela diboka tša Dihlatse le modiro wa tšona wa ntlo le ntlo.

Moo e ka bago ka yona nako yeo, Lekgotla la Lefase la Dikereke le be le rulaganya go swara kopano ya ditšhabatšhaba kua Jakarta, e lego kgato yeo e ilego ya galefiša Mamoseleme a lefelong leo. Ka ge diphapano tša madumedi di be di golela godimo, Lekgotla leo le ile la se sa swara kopano yeo. Lega go le bjalo, taba yeo e bego e tshwenya kudu e be e le ya go fetoša bodumedi bja motho gore e be Mokriste, gomme seo se ile sa tšhoša boradipolotiki ba bantši. Ka ge go bonagetše e sa le pele, baruti ba ile ba sola Dihlatse tša Jehofa ka modiro wa tšona wa go bolela ditaba tše dibotse. Se se ile sa dira gore balaodi ba bantši ba lebelele Dihlatse ka tsela e fošagetšego.

Ka December 1975, ge diphapano magareng ga madumedi di dutše di golela pele, Indonesia e ile ya hlasela naga ya East Timor (ga bjale ke Timor-Leste), e lego naga yeo e bego e laolwa ke Mapotokisi. Dikgwedi tše šupa ka morago ga moo, East Timor e ile ya thoma go laolwa ke Indonesia gomme seo sa tsoša moya wa botšhaba nageng ka moka. Bana babo rena ba ile ba se tšee lehlakore dipolotiking gomme ba gana go tsenela ntwa goba go dumediša folaga, e lego tiro yeo e ilego ya galefiša balaodi ba bagolo ba bahlabani. (Mat. 4:10; Joh. 18:36) E le ge baruti ba nyaka go fedišetša Dihlatse sa ruri, ba ile ba hlohleletša mmušo gore o di lwantšhe. Mafelelong, magareng ga December 1976 baruti ba ile ba hwetša seo go ka thwego ke mpho ya bona ya Keresemose—mmušo o ile wa tsebiša gore Dihlatse tša Jehofa di thibetšwe.