KAROLO YA BOHLANO

Boelang go “Modiši le Molebeledi wa Meoya ya Lena”

BAPALA

Na o kile wa lebeletšana le tše dingwe tša ditlhohlo tšeo di ahlaahlilwego poroutšheng ye? Ge e ba go le bjalo, gona ga se wena o nnoši. Bahlanka ba bantši ba botegago ba Modimo ba mehleng ya ge go ngwalwa Beibele le ba mehleng ya rena, ba ile ba lebeletšana le ditlhohlo tše di swanago. Jehofa o tla go thuša go etša ge a ile a ba thuša.

Jehofa o tla go thekga ge o boela go yena

KGODIŠEGA gore Jehofa o tla go thekga ge o boela go yena. O tla go thuša gore o lebeletšane ka katlego le dipelaelo, o se sa hlwa o ipona molato le gore o be le khutšo ya monagano yeo e tlišwago ke go ba le letswalo le le hlwekilego. Ke moka o tla ikwa o tutueletšega go hlankela Jehofa gape o na le barapedigotee le wena. Boemo bja gago bo tla swana le bja Bakriste ba lekgolong la pele la nywaga bao moapostola Petro a ngwadilego ka bona gore: “Le be le swana le dinku, le timela; eupša bjale le boetše go modiši le molebeledi wa meoya ya lena.”—1 Petro 2:25.

Go boela go Jehofa ke selo se sekaonekaone seo o ka se dirago. Ka baka la’ng? O tla thabiša pelo ya Jehofa. (Diema 27:11) Go etša ge o tseba, ditiro tša rena di kgoma Jehofa ka ge a na le maikwelo. Ke therešo gore Jehofa ga a re gapeletše gore re mo rate le go mo hlankela. (Doiteronomio 30:19, 20) Seithuti se sengwe sa Beibele se ngwadile gore: “Ga go na motho yo a ka go direlago phetho.” Re ka kgetha go hlankela Jehofa go tšwa pelong. Ka go dira bjalo, re tla ba re mo nea mpho e bohlokwa e lego potego ya rena, gomme seo se tla mo thabiša. Ge re nea Jehofa borapedi bjo bo mo swanetšego re ba le lethabo leo re ka se le bapišego le selo.—Ditiro 20:35; Kutollo 4:11.

Senyakwa sa gago sa moya se tla kgotsofatšwa ge o tsošološa borapedi bja gago bja Bokriste. (Mateo 5:3) Ka tsela efe? Batho ba bantši ba ipotšiša gore: ‘Re phelela’ng?’ Ba tsoma dikarabo tša dipotšišo tša mabapi le morero wa bophelo. Ka tlhago batho ba na le senyakwa se ka ge ba bopilwe ke Jehofa. O re bopile gore re mo hlankele re kgotsofetše. Ga go na selo seo se ka re kgotsofatšago go feta go tseba gore re hlankela Jehofa ka gobane re mo rata.—Psalme 63:1-5.

Hle tseba gore Jehofa o nyaka gore o boele go yena. O ka kgodišega bjang ka seo? Ela hloko se: Go ile gwa rapelwa ka mo go tseneletšego ge go be go lokišetšwa poroutšha ye. Mohlomongwe o e filwe ke mogolo goba modumedigotee le wena. Ke moka wa tutueletšega go e bala le go diriša keletšo ya yona. Tše ka moka ke bohlatse bjo bo bontšhago gore Jehofa ga se a go lebala. Go e na le moo, o go gogela go yena ka lerato.—Johane 6:44.

Re kgothatšwa ke go tseba gore Jehofa a ka se tsoge a lebetše bahlanka ba gagwe bao ba timetšego. Go tseba seo go thušitše kgaetšedi yo mongwe yo a bitšwago Donna. O itše: “Ke ile ka thoma go aroga therešong ganyenyane-ganyenyane, eupša ke be ke dula ke nagana ka Psalme 139:23, 24, yeo e rego: ‘Mphetleke o tsebe pelo ya ka, hle Modimo. Ntlhahlobe o tsebe dikgopolo tša ka tše di mpherekanyago. O bone ge e ba go nna go na le tsela e kwešago bohloko, o ntlhahle tseleng ya go iša mehleng ya neng le neng.’ Ke be ke tseba gore ke swanetše go tšwa lefaseng, ke be ke sa swane le lona e bile ke be ke tseba gore ke swanetše go ba ka mokgatlong wa Jehofa. Ke ile ka lemoga gore Jehofa ga se a ntahla; go be go nyakega gore ke fo boela go yena. Ke thabišwa ke gore ke dirile seo!”

“Ke ile ka lemoga gore Jehofa ga se a ntahla; go be go nyakega gore ke fo boela go yena”

Re rapela go tšwa pelong gore le wena o boele o hwetše ‘lethabo la Jehofa.’ (Nehemia 8:10) O ka se itshole ka go boela go Jehofa.

Dikarabo tša Dipotšišo tša ge Motho a Boela go Jehofa

NKA THOMA KAE?

Go ka tšea nako gore motho yo a bego a babja a boele sekeng. Ka mo go swanago, bjalo ka Mokriste o ka imatlafatša moyeng ka gore o leke go ja dijo tša moya letšatši le letšatši. O se ke wa nyaka go dira dilo ka moka ka nako e tee. Mohlomongwe o ka fetša metsotso e sego kae o bala goba o theeditše mmalo wa Beibele, o bala e nngwe ya dipuku tša rena, o fetleka Wepesaete ya jw.org goba o bogetše mananeo a tv.ps8318.com. Le gona, o se ke wa dikadika go ya dibokeng. Go feta moo, rapela Jehofa gore a go thuše. ‘Lahlela dipelaelo tša gago ka moka go yena, gobane o a go hlokomela.’—1 Petro 5:7.

“Go fola moyeng go ile gwa dira gore ke be le dihlong tša go rapela. Ka morago ga gore ke be le sebete sa go rapela, mogolo wa phuthego o ile a nketela. O ile a nthuša gore ke lemoge gore Jehofa ga se a ntahla. Mogolo yoo o ile a nkgothaletša gore ke thome ka go bala Beibele letšatši le letšatši. Ka go dira bjalo, ke ile ka ba le matla a gore ke ye dibokeng. Ge nako e dutše e eya, ke ile ka thoma go ya tšhemong. Ke thabišwa ke gore Jehofa ga se a ka a ntahla.”—Eeva.

PHUTHEGO E TLA NTŠEA BJANG?

Kgodišega gore phuthego e tla go amogela ka diatla tše pedi. Go e na le gore ba go swaye diphošo goba go go ahlola, ba tla go bontšha lerato le go dira sohle go go kgothatša.—Baheberu 10:24, 25.

“Ke be ke lewa ke dihlong tša go ya Holong ya Mmušo. Ke be ke ipotšiša gore bana bešo ba tla ntshwara bjang. Kgaetšedi yo a tšofetšego, yo a bego a le moo nywageng e 30 e fetilego o itše go nna: ‘Morwa, o a amogelwa ka gae!’ Mantšu ao a ile a nkgoma pelo. Ruri ke be ke le gae.”—Javier.

“Ke ile ka ya Holong ya Mmušo gomme ka dulela morago gore ke se lemogwe ke motho. Lega go le bjalo, ba bantši ba ile ba gopola gore ke be ke etla dibokeng ge ke sa le ngwana. Ba ile ba nkamogela gomme ba nkgokarela moo ke ilego ka ikwa ke na le khutšo. Go be go le bjalo ka ge eka ke boile gae.”—Marco.

BAGOLO BA TLA NTHUŠA BJANG?

Bagolo ba tla go swara ka botho. Ba tla go reta ka baka la go tsošološa “lerato le o bego o na le lona pele.” (Kutollo 2:4) Ba tla go thuša ka ‘moya o boleta’ gore o lokiše diphošo tša gago. (Bagalatia 6:1; Diema 28:13) Bagolo ba ka rulaganya gore motho yo mongwe a ithute le wena mohlomongwe le diriša dipuku tše bjalo ka Batamela Kgaufsi le Jehofa goba ya “Le Duleng Leratong la Modimo.” Kgodišega gore bagolo ba tla go kgothatša le go go thekga ka dinako tšohle.—Jesaya 32:1, 2.

“Nywageng e seswai ya ge ke be ke fodile moyeng, bagolo ba ile ba tšwela pele ba leka go nthuša. Ka letšatši le lengwe, mogolo yo mongwe o ile a mpontšha dinepe tšeo a ilego a re tšea tšona. Di ile tša nkgopotša dilo tše dintši tše di kgahlišago moo ke ilego ka thoma go hlologela lethabo la ge ke be ke sa hlankela Jehofa. Bagolo ba nthušitše gore ke tsošološe tswalano ya ka le Modimo.”—Victor.

‘O tla go Matlafatša’

Puku ya rena ya dikopelo ya Opelela Jehofa, e na le dikopelo tše mmalwa tšeo di ka go homotšago le go go kgothatša ge o dutše o tsošološa tswalano ya gago le Jehofa. Ka mohlala, ela hloko mantšu a kopelo 60. Kopelo ye e na le sehlogo se se rego: ‘O tla go Matlafatša,’ seo se theilwego mantšung ao a lego go 1 Petro 5:10.

Jah o bone lebaka la go go ruta,

A go fahloša wa ba seetšeng.

O bone tlhologelo ya pelo ya ’go;

Ya go dira toko go mo tsomeng.

Wa holofetša go mo direla;

’Me yena a go thuša ka mehla.
Jah o gafile Morwa bakeng sa gago;

O rata go bona o atlega.

Ka ge a go neile Morwa wa gagwe,

Gona o tla go nea le matla.

O tla gopola tumelo ya ’go;

A hlokomele ba gagwe batho.

(KHORASE)

Mmopi o go rekile ka madi a Kriste.

O tla go tiiša, a go matlafatše.

O tla go hlahla a be a go šireletše.

Ee, a go tiiše, a go matlafatše.

E le gore o theetše mmino le dikopelo tše dingwe tša Mmušo, lebelela ka tlase ga DIKGATIŠO > MMINO.

Dihlatse tša Jehofa

Boelang go “Modiši le Molebeledi wa Meoya ya Lena”

You May Also Like

Kgopela Thuto ya Mahala ya Beibele

Boelang go “Modiši le Molebeledi wa Meoya ya Lena”

TAONELOUTA KA

Boela go Jehofa

Boela go Jehofa

You May Also Like

TAONELOUTA KA

Kgetha Leleme la Gago

Romela