LEBAKENG la ngwaga le seripa, baithaopi ba kua Bishkek, e lego motsemošate wa Kyrgyzstan, le ba go tšwa dinageng tše dingwe ba šomile ka thata go mpshafatša le go katološa meago ya lekala ya lefelong leo. Lenaneo la go neela meago yeo le bile ka di-24 tša October 2015, e lego kgwedi ka morago ga gore mošomo woo o phethwe. Batho ba fetago ba 3 000 bao ba lego Diholong tša Mmušo tše 18 le mafelong a mangwe ba ile ba thabela go theetša lenaneo leo ba diriša Inthanete. Ngwanabo rena Stephen Lett wa Sehlopha se Bušago o ile a nea polelo e kgothatšago ya go neela meago yeo. Sehlogo sa polelo yeo se be se re, “Hlankela Jehofa ka Pelo e Feletšego.” Letšatšing le le latelago, bagoeledi ba bangwe ba bantši ba nageng yeo ba ile ba thabela lenaneo leo le matlafatšago tumelo.

 Ka Mokibelo wa di-14 tša May 2016, go be go na le batho ba 6 435 ge go be go neelwa ofisi ya lekala ya Armenia. Batho bao ba be ba dutše mabatong a 6 a moago o mobotse wa madulo wo o nago le mabato a 18. Go ile gwa neelwa le Holo ya Kopano le meago ya Sekolo sa Baebangedi ba Mmušo. Nakong ya lenaneo go be go bolelwa mabapi le kamoo bahlanka ba Jehofa ba thomilego ka gona kua Armenia. Mošomo o be o thomilwe ke batho ba Armenia bao ba bego ba hudugetše United States mathomong a lekgolo la bo-20 la mengwaga gomme ka morago wa dirwa kua Armenia bogareng bja mengwaga ya bo-1970. Ka nako yeo naga yeo e be e sa dutše e le karolo ya Soviet Union. Morago bjale, mokgatlo o ile wa ngwadišwa ka molao moo gomme gwa hlongwa lekala. Ba bantši ba bao ba bego ba le gona ga se ba ka ba nagana gore ba be ba ka bona dilo tše di kgahlišago gakaakaa tšeo di fihleletšwego ke mokgatlo wa Modimo. Tiragalo e kgolo lenaneong leo e bile ge bohle bao ba bego ba le gona ba be ba dumelelana ka pelo ka moka le Ngwanabo rena David Splane wa Sehlopha se Bušago gore a neele lefelo leo le lebotse go Jehofa.