Ałʼąą ádaatʼéego oodląʼ dah deiyíkááhígíí áłah nídaadleehgóó tʼóóʼahayóí diné doo ákǫ́ǫ́ nidaakai da daazlı̨́ı̨́ʼ. Biniinaaígíí éí Diyin kʼehgo oodááł haʼnínígíí doo yee ndaʼnitin da, dóó saad bee haʼahónínígíí ádin. Áko haʼátʼíí biniyé Jiihóvah Yá Dahalneʼé áłah nídaadleehgi nánídáah doo? Haʼátʼíishąʼ ákweʼé baa ákodíníízįįł?

Baa hózhǫ́ǫgo ayóíʼádaʼóʼnínígíí dóó dajoobaʼígíí ákweʼé bił dahojílǫ́. Jesus daaztsą́ą́dóó bikʼijįʼ God deidísin doo biniyé Oodlání áłah nídaadleehgo niitʼą́. Ákweʼé Diyin God Bizaad yídahołʼaah dóó ałhee dajíłdzilgo ahíłká inídaajah ńtʼééʼ. (Hebrews 10:24, 25) Ayóíʼíʼóʼní binahjįʼ ahínáʼiildah, áko ałkʼis bił daʼídlı̨́įgo yaa ntsídaakees ńtʼééʼ​—Oodlání kʼehjí dahakʼis dóó dahalah. (2 Thessalonians 1:3; 3 John 14) Nihí tʼááʼákótʼéego ádaʼiilʼı̨́ dóó baa nihił dahózhǫ́.

Diyin God Bizaad kʼehgo oodááł bíhooʼaahgi áká análwoʼ. Tʼáá níléídę́ę́ʼ hastóí, sáanii dóó áłchíní ahínéekah ńtʼééʼ. Naʼnitin dayiichįįhígíí Diyin God Bizaad biiʼdę́ę́ʼ bikʼehgo oodááłígíí yee nidanihinitin. Éí niheʼiinaʼ siláagi haitʼéego choidiilʼı̨́įłígi hazhóʼó bikʼidaʼdiyiitįįhgo yee nihíká anídaalwoʼ. (Deuteronomy 31:12; Nehemiah 8:8) Baa yádaatiʼígíí baa hwiinítʼı̨́įgo daʼniitah doo, dóó atah nídahwiitał doo. Áko díí éí binahjįʼ nihee Oodląʼ nihił chohooʼínígíí ííshjání bee ííníilzin.​—Hebrews 10:23.

God yiinídlánígíí bidziil doogo yee nikʼihwiizhdoodliił. Paul yilʼaadii ałkʼidą́ą́ʼ łaʼ áłah nídaadleehígíí kwíidííniid, “Háálá kʼadę́ę danihiistsééh, . . . Jó, éí nihí índa shí tʼááłáʼí oodlą́ bee ahidiníłnáago hadaʼahííníilníi dooleełígíí ááhdishní.” (Romans 1:11, 12) Áłah nídeidleehgi bił yah anéiijahígíí tʼááʼahą́ą́h bił dahoniidlǫ́ǫgo nihee oodlą́ bidziilgo áyósin. Áádóó ałdóʼ doo neʼniidlı̨́ı̨́góó Oodlání kʼehgo iinánígíí bikʼehgo yiidááł.

Haaʼíshąʼ áłah náánéiidleehgo nihaa díínááł áádóó tʼáá ni díí nił bééhodoozįįł. Ákweʼé yah anájahígíí baa ádahwíínítʼı̨́įgo wóshdę́ę́ʼ dandidooniił. Tʼááʼałtso áłah nídeidleehgóó doo bikʼéʼezláa da​—béeso doo wókeed da.

• Áłah nídeedleehígíí háíshąʼ bikʼehgo ádaʼiilʼı̨́?

• Áłah néiidleehígi néiidáahgo haash yitʼéego nihíká adoolwoł?