OKUGAANIIRA N’OMUTAAHI
Obukama bwa Ruhanga Bukatandika Kutegyeka Ryari?—Ekicweka 1
Ebiri ahaifo nibyoreka ekigaaniiro eki Omujurizi wa Yehova arikubaasa kugira n’omutaahi. Ka tugire ngu Omujurizi wa Yehova Cameron yaija omu ka ya Jon
‘GUMIZAMU NOOSHERURA’ OKUMANYA
Cameron: Jon, ninshemezibwa obwire obu tutwire nitugaaniira aha biri omu Baibuli. * Obu naahereeruka kugaaniira naiwe, okabuuza aha bikwatiraine n’Obukama bwa Ruhanga. Okabuuza ahabw’enki Abajurizi ba Yehova nibaikiriza ngu Obukama bwa Ruhanga bukatandika kutegyeka 1914.
Jon: Eego, nkashomaho omuri kimwe aha bitabo byanyu, kandi nikyoreka ngu Obukama bwa Ruhanga bukatandika kutegyeka omuri 1914. Eki kikandeetera kwenda kumanya ahakuba nimugira ngu byona ebi murikwikiriza nibyegamira ahari Baibuli.
Cameron: Eego, nikwo kiri.
Jon: Amazima gari ngu, mbaasize kushoma Baibuli. Kwonka tihaine ahu ndeebire aharikugamba aha mwaka 1914. N’ahabw’ekyo ncondoorize omu Baibuli y’aha mukura omwaka “1914.” Kwonka timboine ebirikushoboorora omwaka ogwo.”
Cameron: Jon, niinyenda kukusiima aha nshonga ibiri. Ey’okubanza, obaasize kushoma Baibuli yoona. Buzima oine kuba nookunda Ekigambo kya Ruhanga.
Jon: Nikwo kiri. Tihaine ekiri nka kyo.
Cameron: Ninyikirizana naiwe. Ekya kabiri, niinyenda kukusiima ahabw’okusherura omu Baibuli kuteeraho kutunga eky’okugarukamu ky’ekibuuzo kyawe. Okozire kyenyini eki Baibuli erikutuhiga kukora: ‘Gumizamu noosherura’ okumanya. * Nikinshemeza kureeba oriyo nooteeraho kukora ekyo.
Jon: Webare. Niinyenda kugumizamu niinyega. Nangwa, nyongyeire kucondooza ebirikukwata aha mwaka 1914 omu kitabo eki tutwire nitwegamu. Nikigamba aha kirooto eki omugabe yaagizire, obu yaareeba omuti muhango ogwatemirwe kandi gukagaruka kutooka, ebyo nibyo ebi ndikwijuka.
Cameron: Ohikire. Obunabi obwo buhandiikirwe omuri Danieli eshuura 4. Nibutwariramu ekirooto eki Omugabe Nebukadeneeza owa Babulooni yaarootsire.
Jon: : Eego, ohikire. Nshomire obunabi obwo emirundi mingi. Kwonka okuba ow’amazima, timbaasize kureeba oku bwine akakwate n’Obukama bwa Ruhanga nari n’omwaka 1914.
Cameron: Jon amazima agari ngu, Danieli nawe tarayetegyereize gye amakuru g’obunabi obwo!
Jon: Nokihamya?
Cameron: Eego. Danieli 12:8, nihagira hati: “Naabihurira, kwonka tinaabyetegyereza.”
Jon: Nikimanyisa ngu tiinye nyenka. Ekyo nikindeetera kwehurira gye.
Cameron: Amazima gari ngu, Danieli taraabyetegyereize ahakuba obwire bukaba butakahikire Ruhanga kushuuruurira abantu amakuru g’obunabi oburi omu kitabo kya Danieli. Kwonka hati, nitubaasa kubwetegyereza omu bwijwire.
Jon: Ahabw’enki noogamba otyo?
Cameron: Yetegyereze omu mushororongo ogurikukurataho. Danieli 12:9 nihagira hati: “Ebigambo bishwekirwe, kandi byahamibwa n’akamanyiso, okuhitsya aha bunaku bw’aha mperu.” N’ahabw’ekyo obunabi obu bukaba nibwija kwetegyerezibwa gye omu bwire “bw’aha mperu.” Kandi nk’oku turikuza kureeba omu kwega Baibuli, obuhame nibworeka ngu turi omu bwire mperu. *
Jon: Mbwenu shi, noobaasa kunshoboororera obunabi bwa, Danieli?
Cameron: Ninza kuteeraho nk’oku ndikubaasa.
EKIROOTO KYA NEBUKADENEEZA
Cameron: Ka tutandikye, turikwetegyereza omu bugufu eki Omugabe Nebukadeneeza yaareebire omu kirooto. Bwanyima nitubaasa kugaaniira aha makuru g’ekirooto ekyo.
Jon: Kare.
Cameron: Omu kirooto, Nebukadeneeza akareeba omuti muhango muraingwa gurikuhika omu iguru. Reero yaahurira maraika wa Ruhanga naaragiira ngu omuti gutemwe. Kwonka, Ruhanga akagira ngu ekitsintsi kyakyo n’emizi bigume omu itaka. Bwanyima ‘y’omwanya gw’emyaka mushanju,’ omuti gukaba nigubaasa kugaruka kutooka. * Omu kubanza obunabi obu bukaba nibukwata aha Mugabe Nebukadeneeza. N’obu araabe yaabaire ari omugabe rurangaanwa, nk’omuti ogwakuzire gukahika omu iguru, gukatemwa kumara ‘omwanya gw’emyaka mushanju.’ Noijuka ekyabaireho?
Jon: Ngaaha, tindikwijuka.
Cameron: Kare tikiine nshonga. Baibuli neeyoreka ngu Nebukadeneeza akaruga aha ngoma, kumara emyaka mushanju. Omu bwire obwo, akaba atarikubaasa kutegyeka nk’omugabe. Kwonka bwanyima y’emyaka mushanju, Nebukadeneeza akagaruka yaatandika kutegyeka. *
Jon: Hati kwine gye. Kwonka shi ebi byona biine kakwate ki n’Obukama bwa Ruhanga n’omwaka 1914?
Cameron: Omu bugufu, obunabi obu bukahikiirira omu miringo ebiri. Bukabanza kuhikiirira obu obutegyeki bw’Omugabe Nebukadeneeza bwateganisibwamu. Okuhikiirira okwa kabiri kubaho obu obutegyeki bwa Ruhanga bwabaire butaine mugabe. N’ahabw’ekyo okuhikiirira okwa kabiri nikwo kwine akakwate n’Obukama bwa Ruhanga.
Jon: Nitumanya tuta ngu okuhikiirira kwa kabiri okw’obunabi obu nikukwata aha Bukama bwa Ruhanga?
Cameron: Enshonga emwe eri ngu, ekyo nikigambwaho omu bunabi. Kurugiirira ahari Danieli 4:17, obunabi buhandiikwa kugira “ngu abakiriho abahuriire bamanye ngu Orikukira boona niwe ategyeka obugabe bw’abantu, kandi akabugabira ou arikwenda.” Waayetegyereza ebigambo “obugabe bw’abantu”?
Jon: Eego, nibigira ngu “Orikukira boona niwe ategyeka obugabe bw’abantu.”
Cameron: Ohikire. Nooteekateeka ngu “Orikukira Boona” n’oha”?
Jon: Ningira ngu ogwo ni Ruhanga.
Cameron: Ohikire. N’ahabw’ekyo eki nikimanyisa ngu obunabi obu tiburikukwata ahari Nebukadeneeza wenka. Nibutwariramu ‘n’obugabe bw’abantu’ nari obutegyeki bwa Ruhanga. Kandi ekyo nikikora amakuru twareeba ebyetooroire emishororongo egyo.
Jon: Noomanyisa ki?
Entima y’Omutwe gw’Ekitabo Ekyo
Cameron: Emirundi mingi, ekitabo kya Danieli nikigamba aha mutwe mukuru. Kaingi nikyoreka obu Obukama bwa Ruhanga bwatandika kutegyekwa Omwana we, Yesu. Nk’eky’okureeberaho ka tugarukye omu shuura ez’enyima. Ninkushaba kushoma Danieli 2:44?
Jon: Kare. Nihagira hati: ‘Omu busingye bw’abo bagabe Ruhanga w’omu iguru naija kutaho obundi bugabe, obutaricwekyerezibwa ebiro byona, kandi obutegyeki bwabwo tiburihungurwa rindi ihanga; kureka nibwija kwatagura obwo bugabe bwona, bubumareho kandi bwo nibwija kugumaho.”
Cameron: Webare. Nooteekateeka ngu omushororongo ogu nigugamba aha Bukama bwa Ruhanga?
Jon: Ee. Tindikuhamya.
Cameron: Kare, yetegyereze ngu nihagira ngu Obukama obu nibwija ‘kugumaho ebiro byona.’ Ekyo nikyo kiraahikye aha Bukama bwa Ruhanga, zitari gavumenti z’abantu, tikwo?
Jon: Ohikire.
Cameron: Hariho obunabi obundi omu kitabo kya Danieli oburikugamba aha Bukama bwa Ruhanga. Buhandiikirwe omuri Danieli 7:13, 14. Aha bikwatiraine n’owaabaire naija kuba Omugabe w’Obukama obwo, obunabi nibugira buti: “Yaaheebwa obutegyeki, ekitiinisa n’obukama, ngu abantu b’amahanga goona, n’enganda zoona z’endimi ezitari zimwe, bagume bamuheereze, obutegyeki bwe n’obutegyeki bw’ebiro byona obutarihwaho, kandi n’obukama bwe n’obukama obutarimarwaho.” Haine eki waayetegyereza omu bunabi obu?
Jon: Nihagamba aha bukama.
Cameron: Ohikire. Kandi ti butegyeki obwa butoosha. Yetegyereze ngu Obukama obwo bukaba nibwija kutegyeka “abantu, amahanga, n’endimi z’enganda.” Nari, bukaba nibwija kutegyeka ensi yoona.
Jon: Ekyo tinakyetegyereza gye, kwonka ohikire. Nikwo harikugira.
Cameron: Kandi, yetegyereze ekindi eki obunabi burikugamba: “Obutegyeki bwe n’obutegyeki bw’ebiro byona obutarihwaho.” Ebigambo nibishushana n’ebiri omuri Danieli 2:44, tikwo?
Jon: Eego, buzima.
Cameron: Ka tweyijutsye omu bugufu ebi twaheza kugambaho. Obunabi oburi omuri Danieli eshuura 4 bukahandiikwa kugira ngu abantu bamanye ngu “Orikukira boona niwe ategyeka obugabe bw’abantu.” Eki nikimanyisa ngu obunabi obu nibwija kuhikiirizibwa omu muringo ogundi okukira aha bwa Nebukadeneeza. Kandi omu kitabo kya Danieli, nitushangamu obunabi oburikworeka obu Obukama bwa Ruhanga oburikutegyekwa Omwana we bwateebwaho. Noogira ngu n’eky’obwengye kuteekateeka ngu, obunabi oburi omuri Danieli eshuura 4 bwine akakwate n’Obukama bwa Ruhanga?
Jon: Ningira nikwo kiri. Kwonka nabwo tinkeetegyereize oku burikuhikaana n’omwaka 1914.
“REKA HAHINGUREHO OMWANYA GW’EMYAKA MUSHANJU”
Cameron: Kare, ka tugarukye tugambe aha Mugabe Nebukadeneeza. Omuti nigwo gwabaire nigujwekyera obutegyeki bwe omu kuhikiirira kw’obunabi bw’okubanza. Obutegyeki bwe bukateganisibwa obu omuti gwatemwa hakatsigara ekitsintsi kyagwo kumara emyaka mushanju, obu yaaruga aha ngoma omu bwire obwo. Obwire bw’emyaka mushanju bukahendera obu Nebukadeneeza yaahuguuka akagaruka kutegyeka. Okuhikiirira kwa kabiri okw’obunabi obwo kukaba nikwija kubaho obu obutegyeki bwa Ruhanga bwateganisibwa kumara emyaka egyo, kwonka ti ahabw’okugira ngu Ruhanga akaba aremirwe.
Jon: Noomanyisa ki?
Cameron: Ira, nikigambwa ngu abagabe ba Israeli bakaba nibategyekyera Yerusaalemu bashutami aha kitebe kya Yehova. * Bakaba nibajwekyera Ruhanga omu kutegyeka abantu. N’ahabw’ekyo abagabe abo bakaba nibajwekyera obutegyeki bwa Ruhanga. Kwonka bwanyima y’obwire, abagabe abo bakagomera Ruhanga kandi n’abu barikwebembera baaba abagomi. Ahabw’okugira ngu Abaisraeli bakagoma, Ruhanga akabaihamu engaro baasingurwa Abababulooni omuri 607 Y.A. Kuruga obwo, tihariho mugabe omuri Yerusaalemu owaabaire naajwekyera Yehova. Omu muringo ogwo, obutegyeki bwa Ruhanga bukateganisibwa kumara obwire. Beitu turi hamwe?
Jon: Ningira.
Cameron: N’ahabw’ekyo omuri 607 Y.A. omwanya gw’emyaka mushanju gukatandika, nari obwire obu obutegyeki bwa Ruhanga obu bwabaire nibuza kuteganisibwa. Aha muheru gw’emyaka mushanju Ruhanga akaba naija kutaho omutegyeki musya orikumujwekyera, kwonka aha murundi ogu akaba naija kuruga omu iguru. Obwo nibwo obu obunabi obundi obu turikushomaho omuri Danieli bwabaire nibwija kuhikiirira. N’ahabw’ekyo ekikuru kiri ngu: Obwire bw’emyaka mushanju bukaba nibwija kuhendera ryari? Ku turatugye eky’okugarukamu ky’ekibuuzo ekyo, nituza kuba twamanya obu Obukama bwa Ruhanga bwatandika kutegyeka.
Jon: Naakwetegyereza. Mbwenu tugire ngu, obwire bw’emyaka mushanju bukahendera omuri 1914?
Cameron: Nikyo ekyo! Nooshusha ngu waaba nookimanya.
Jon: Kwonka ekyo nitukimanya tuta?
Cameron: Obu Yesu yaabaire ari omu nsi, akooreka ngu omwanya gw’emyaka mushanju gukaba gutakahendeire. * N’ahabw’ekyo gwine kuba gwabaire guri nigwija kumara obwire buraingwa munonga. Omwanya gw’emyaka mushanju gukatandika ira munonga Yesu atakaizire omu nsi, kandi gukahendera amazire obwire agarukire omu iguru. Ijuka ngu amakuru g’obunabi bw’omuri Danieli gakaba gatarikumanywa gye kuhika omu “biro by’emperu.” * Ekirikushemeza, emyaka ya 1800 erikwirira kuhendera, abeegi ba Baibuli bakagira ekihika ky’okushwijuma ekitabo kyo, n’obunabi obundi. Bakatandika kwetegyereza ngu omwanya gw’emyaka mushanju gukaba nigwija kuhendera omuri 1914. Kandi empinduka z’amaani ezaabaireho omu bwire obwo nizooreka ngu omuri 1914 buzima nibwo obukama bwa Ruhanga bwatandika kutegyekyera omu iguru. Omu mwaka ogwo nibwo twatandika ebiro by’emperu, nari obwire bw’emperu. Hati, niimanya ngu twagaaniira bingi ebigumire kwetegyereza . . .
Jon: Eego. Hatariho kubangaanisa ninza kugaruka kweijutsya ebintu ebi.
Cameron: Tikiine nshonga. Kintwariire obwire kutebeekanisa enshonga ezi kubaasa kuzikuratanisa gye. Kwonka hati, ningira ngu ebi twagaaniiraho byakuhwera kwetegyereza ngu ebi Abajurizi ba Yehova barikwikiriza aha Bukama nibyegamira ahari Baibuli.
Jon: Buzima. Ntwire ninkunda oku murikukoresa Baibuli kushoboorora ebi murikwikiriza.
Cameron: Kandi nindeeba ngu naiwe oine ekyetengo ekyo. Nk’oku naaba naakugambiire, tikyorobi kwetegyereza byona ebi twaheza kugaaniiraho. Ningira okiine ebindi bibuuzo. Nk’eky’okureeberaho, twaheza kureeba ngu omwanya gw’emyaka mushanju gwine akakwate n’Obukama bwa Ruhanga kandi gukatandika omuri 607 Y.A. Kwonka, nitumanya tuta ngu omwanya gw’emyaka mushanju gukahendera 1914? *
Jon: Eego, naanye nikyo naaba niinyebuuza.
Cameron: Baibuli neetuhwera kumanya oku omwanya gw’emyaka mushanju gurikwingana. Okaayenzire ngu ngarukye omurundi ogundi tushwijume enshonga egyo? *
Jon: Ekyo ni kirungi.
Haine enshonga kuruga omu Baibuli ei otarikwetegyereza gye? Nooyenda kumanya ekintu kyona ekikwatiraine n’enyikiriza yoona ey’Abajurizi ba Yehova nari entwaza yaabo? Ku kiraabe nikwo kiri, oteeziringa kubuuza omwe aha Bajurizi ba Yehova. Naija kushemererwa kuhikaanisa naiwe ebiteekateeko aha nshonga ezo.
^ Abajurizi ba Yehova baine entebeekanisa y’okugaaniira n’okwegyesa abantu Baibuli, batashashwire
^ Reeba eshuura 9 y’ekitabo Niki eki Buzima Baibuli Erikwegyesa? ekyateirwe Abajurizi ba Yehova. Hati kiriho n’aha www.ps8318.com/nyn.
^ Yesu obu yaabaire naagamba aha byabaire nibiza kubaho omu biro by’emperu akagira ati: ‘Yerusaalemu [erikujwekyera obutegyeki bwa Ruhanga] neija kuguma neeribatiirirwa abanyamahanga, okuhitsya obu obusingye bw’Abanyamahanga burihweraho.’ (Luka 21:24) N’ahabw’ekyo, obutegyeki bwa Ruhanga bukaba nibukiteganisibwa obu Yesu yaabaire ari nsi kandi ekyo kikaba nikiija kugumizamu kuhika omu biro by’emperu.
^ Reeba ebyongyeirweho “1914—Omwaka Mukuru omu Burangi Bw’omu Baibuli” omu kitabo Niki eki Buzima Baibuli Erikwegyesa? Hati kiriho n’aha www.ps8318.com/nyn.
^ Ekicweka ekirikukurataho kirimu Ebyahandiikirwe ebirikworeka oku omwanya gw’emyaka mushanju gwabaire nigwingana.
Noobaasa Kukunda n'Ebi
Obukama bwa Ruhanga Bukatandika Kutegyeka Ryari? (Ekicweka 2)
Obunabi bwa Baibuli n’ekirooto ebi Ruhanga yaayoherereize omugabe wa Babulooni biine akakwate n’omwaka obu kyabaho.
EBIRIKUTUKWATAHO
Ebibuuzo Ebirikukira Kubuuzibwa aha Bajurizi ba Yehova
Tunga eby’okugarukamu by’ebibuuzo ebi orikubaasa kuba nooyebuuza ebirikutukwataho.