EISHOMO 26
Ahabw’enki Hariho Embeera Mbi n’Okubonabona?
Haabaho akagwe, abantu nibakira kwebuuza ngu, “ahabw’enki?” Ka nikishemeza kumanya ngu Baibuli neegarukamu gye ekibuuzo ekyo!
1. Sitaane akatandikaho ata ebikorwa bibi?
Sitaane Omuregi akagomera Ruhanga. Sitaane akaba naayenda kutegyeka abandi, akareetera abantu b’okubanza, Adamu na Haawa, kumwegaitaho omu bugomi bwe. Ekyo Sitaane akakikora arikubeiha Haawa. (Okutandika 3:1-5) Akamureetera kuteekateeka ngu Yehova haine ekintu kirungi eki arikumwima. Akaba ari nk’orikugira ngu abantu nibashemererwa munonga baaba batarikworobera Ruhanga. Sitaane akagamba ekishuba ky’okubanza obu yaabeiha Haawa ngu tarikwija kufa. N’ahabw’ekyo, Baibuli neeyeta Sitaane ‘omubeihi, [kandi] ishe w’ebishuba.’—Yohaana 8:44.
2. Adamu na Haawa bakacwamu kukora ki?
Yehova akaba ahaire Adamu na Haawa ebintu bingi. Akagira ngu nibabaasa kurya aha muti gwona oguri omu kibanja Edeni oyihireho omuti gumwe. (Okutandika 2:15-17) Kwonka nabwo bakangisiriza baarya ekijuma ky’omuti ogwo. Haawa ‘akacwa ekijuma kyagwo yaakirya.’ Bwanyima, Adamu ‘nawe akaryaho.’ (Okutandika 3:6) Bombi bakagomera Ruhanga. Ahabw’okugira ngu Adamu na Haawa bakaba bahikiriire, okukora ekihikire kikaba kitari kintu kigumire aharibo. Kwonka bakagomera Ruhanga nkana, baashiisha, kandi baayanga ngu abe niwe yaabategyeka. Okucwamu kwabo kukabarugiramu okubonabona kwingi.—Okutandika 3:16-19.
3. Nitukwatwaho tuta okucwamu kw’Adamu na Haawa?
Adamu na Haawa ku baasiisire, bakaba abatahikiriire, kandi obutahikiirira bwabo bakabusiiga baijukuru baabo boona. Baibuli neegamba ahari Adamu eti: ‘Ekibi kikaija omu nsi ahabw’okushiisha kw’omuntu omwe, kandi kikarugamu okufa, n’okufa kwabuga omu bantu boona.’—Abarooma 5:12.
Nitubonabona ahabw’enshonga nyingi. Obumwe nitubonabona ahabw’okucwamu kubi. Obumwe nitubonabona ahabw’okucwamu kubi kw’abandi. Kandi obundi nitubonabona ahabw’okuba omu mwanya gugwire omu bwire bugwire.—Shoma Omubuurizi 9:11.
SHWIJUMA GYE
Yetegyereze ahabw’enki Ruhanga tiwe arikureetaho okubonabona n’ebikorwa bibi hati, n’oku arikwehurira twaba nitubonabona.
4. Orikutureetera kubonabona
Abantu baingi nibateekateeka ngu Ruhanga niwe arikutegyeka ensi yoona. Ekyo shi kihikire? Zaana VIDIYO.
Shoma Yakobo 1:13 na 1 Yohaana 5:19, kubaasa kugarukamu ekibuuzo ekirikukurataho:
-
Ruhanga shi niwe arikureetaho okubonabona n’ebikorwa bibi?
5. Yetegyereze ebirikuruga omu butegyeki bwa Sitaane
Shoma Okutandika 3:1-6, kubaasa kugarukamu ebibuuzo ebi:
-
Sitaane akabeiha kishuba ki?—Reeba omushororongo 4 na 5.
-
Sitaane akooreka ata ngu Yehova haine eki yaabaire ayimire abantu?
-
Sitaane akareetera ata abantu kuteekateeka ngu tibaine kutegyekwa Yehova kubaasa kushemererwa?
Shoma Omubuurizi 8:9, kubaasa kugarukamu ekibuuzo eki:
-
Ni bintu ki ebirikubaho omu nsi ahabw’okugira ngu terikutegyekwa Yehova?
-
Adamu na Haawa bakaba bahikiriire kandi barikutuura omu paradiso. Kwonka bakahurikiza Sitaane, baagomera Yehova
-
Bwanyima y’obugomi, ensi ekaijuramu okushiisha, okubonabona, n’okufa
-
Yehova naija kwihaho okushiisha, okubonabona, n’okufa. Abantu nibaija kugaruka kuba abahikiriire, kandi batuure omu Paradiso
6. Yehova naakwatwaho okubonabona kwaitu
Ruhanga shi naatufaho twaba nitubonabona? Yetegyereze ebi Omugabe Daudi na Petero baahandiikire. Shoma Zaaburi 31:7 na 1 Petero 5:7, kubaasa kugarukamu ekibuuzo eki:
-
Nikikureetera kwehurira ota kumanya ngu Yehova naatumanya kandi naatufaho twaba nitubonabona?
7. Ruhanga naija kwihaho okubonabona kw’abantu kwona
Shoma Isaaya 65:17 na Okushuuruurwa 21:3, 4, kubaasa kugarukamu ekibuuzo eki:
-
Ahabw’enki kirikuhuumuriza kumanya ngu Yehova naija kwihaho embeera mbi eziri omu nsi?
Eki waaba nookimanya?
Obu Sitaane yaagamba ekishuba ky’okubanza, akabeiherera Yehova. Ekirikumanyisa ngu akashiisha eiziina rye ngu ti mutegyeki omuringaaniza, kandi oine rukundo. Yehova ku araiheho okubonabona omu biro by’omumaisho, naija kujuririra eiziina rye, ayorekye ngu obutegyeki bwe nibwo burikukirayo oburungi. Okujuririra eiziina rya Yehova n’okuryeza n’emwe aha nshonga ezirikukirayo obukuru.—Matayo 6:9, 10.
ABAMWE NIBAGIRA NGU: “N’ekigyendererwa kya Ruhanga ngu tubonabone.”
-
Iwe ekyo nookigambaho ki?
OMU BUGUFU
Sitaane Omuregi n’abantu babiri ab’okubanza nibo baareetsireho embeera mbi omu nsi. Yehova naakwatwaho okubonabona kwaitu, kandi ari haihi kukwihaho.
Okweijutsya
-
Ni kishuba ki eki Sitaane yaagambiire Haawa?
-
Obugomi bw’Adamu na Haawa bukakwata buta aha bantu boona?
-
Nitumanya tuta ngu Yehova naakwatwaho okubonabona kwaitu?
JUMBURA EBINDI
Manya oku Baibuli erikushoboorora ekibi.
Yongyera kushoma aha nshonga ei Sitaane Omuregi yaareetsireho omu musiri Edeni.
“Ahabw’enki Ruhanga Naareka Okubonabona Kukabaho?” (Omunaara gw’Omurinzi, Jenwari 1, 2014)
Shwijuma eby’okugarukamu ebirikuhuumuriza eby’ekibuuzo kigumire eki.
“Ahabw’enki Haabaireho Ekiita Bantu, Kandi Ahabw’enki Ruhanga Atarakizibiire?” (Eky’aha mukura)
Reeba eki omushaija omwe yaayegire aha bikwatiraine n’okubonabona.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
