EBY’ABAZAIRE
6: Okuhana
EKI KIRIKUMANYISA
Ekigambo okuhana nikibaasa kumanyisa okuhabura nari okwegyesa. Obumwe, eki nikitwariramu okutereeza emitwarize mibi y’omwana. Kwonka okukira munonga, nikitwariramu okutendeka omwana emicwe mirungi erikumuhwera kwega kucwamu gye atakakozire enshobe.
ENSHONGA AHABW’ENKI NI KIKURU
Omu mwanya ya juba, okuhana kutuubira munonga omu maka agamwe, ahabw’okugira ngu abazaire nibatiina ngu baahana abaana baabo nibagira okwetiina. Kwonka, abazaire abanyabwengye nibataho eby’okukuratira ebiringaniire kandi batendeka abaana baabo kubikuratira.
“Abaana baine kugira obugarukiro kubahwera kukura bari abantu b’obujunaanizibwa. Abaana baaba batarikuhanwa nibaba bari nk’emeeri etaine eky’okuvugisa, erikwija kurugaho ekahaba nari ekatunga butandu.”—Pamela.
EKI ORIKUBAASA KUKORA
Otahindahindura. Abaana baawe baaba batagyendeire aha by’okukuratira, hamya ngu baafubirwa. Kwonka, ba oyeteekateekire kusiima omwana waawe yaabigyenderaho.
“Ninkira kusiima abaana bangye ahabw’okworoba omu nsi egi erimu abantu abatarikukira kworoba. Okubasiima nikibahwera kworoberwa kwikiriza kuhaburwa kyaba nikyetengyesa.”—Christine.
OMUSINGYE GWA BAIBULI: ‘Ebi omuntu arikubiba nibyo arikugyesha.’—Abagalatia 6:7.
Ba ow’oburyo. Waaba noohana omwana teekateeka aha myaka ye, okubaasa kwe, n’obuhango bw’enshobe ei yaakora. Ebifubiro nibikora gye byaba nibiingana n’enshobe eyaakorwa. Nk’eky’okureeberaho, omwana yaakoresa kubi esimu, noobaasa kumwihaho esimu kutagikoresa kumara obwire. Kandi nabwo, yetantare obushonga bukye kubuhinduramu enshonga mpango.
“Niinteeraho kureeba yaaba omwana wangye yaagoma nkana nari yaacwamu kubi kyonka. Hariho entaaniso aha gati y’okukora enshobe y’amaani eine kushoboororwa n’enshobe ei oine kugambira omuntu kyonka.”—Wendell.
OMUSINGYE GWA BAIBULI: “Mutagwisa kubi abaana baanyu, barekye kuhahaara emitima.”—Abakolosai 3:21.
Yoreka rukundo. Abaana nikiboorobera kwikiriza okuhana n’okukugyenderaho baamanya ngu orikubahana naahigwa rukundo.
“Mutabani waitu ku yaabaire akora enshobe, tukaba tumuhamiza ngu nitumwesiimisa ahabw’okucwamu kwe kurungi okw’enyima. Tukaba tumushoboororera ngu enshobe ye terikushiisha eiziina rye kasita agiteereza, kandi tukaba turiho ahabwe kumuhwera.”—Daniel.
OMUSINGYE GWA BAIBULI: ‘Okukunda nikugumisiriza, [kandi kwine] embabazi.’—1 Abakorinso 13:4.
