Abakristaayo baingi nibacwamu kutakuza Noiri. Nibeehurira bata ahabw’okucwamu batyo? Mbwenu shi nibeehurira nk’abaine eki barikufeerwa? Abaana baabo nibatunga buri kimwe? Yetegyereze eki abajurizi ba Yehova omu nsi yoona barikugamba aha nshonga egi.

Okwijuka Yesu Kristo: “Ntakabaire omwe aha Bajurizi ba Yehova, nkaba ntarikukira kuza omu kanisa, kureka nkaba nzayo omu bwire bwa Noiri nari paasika. Kwonka nabwo, nkaba ntarikuteekateeka ahari Yesu. Tindikukuza Noiri, kwonka hati ninza omu nteerane emirundi ebiri omu saabiiti kandi ninyegyesa abandi eki Baibuli erikugamba ahari Yesu!”​—EVE, AUSTRALIA.

Okuha abandi nikureeta okushemererwa: “Nikinshemeza munonga baampa ekiconco kitaraariire. Ninkunda ebintu ebirikubaho ntabyeteekateekiire! Kandi ninkunda kuhandiika kaada n’okuhuuga ebishushani by’abantu abandi ahabw’okuba nikibashemeza, kandi naanye nikinshemeza.”​—REUBEN, NORTHERN IRELAND.

Okuhwera abakyene: “Nitukunda kuteekyera abarwaire eby’okurya. Obumwe nitubatwarira ebimuri, keeki nari ebiconco ebirikubashemeza. Eki nikitushemeza ahabw’okuba nitubaasa kutaayaayira abantu abo obwire bwona omu mwaka.”​—EMILY, AUSTRALIA.

Okuba hamwe nk’eka: “Eka yaitu ku erikuba eri hamwe nikibaasisa abaana baitu kumanya baishentobo, banyinentobo, baishenkurubo na baihwa baabo omu mbeera zicuraire. Obu tutarikukuza ebiro bikuru abanyabuzaare baitu tibarikutugyemesereza ahakuba nibamanya ngu nitubataayaayira obwire bwona ahabw’okugira ngu nitubakunda.”​—WENDY, CAYMAN ISLANDS.

Obusingye: “Omu bwire bw’okukuza Noiri, nihaba hariho bingi by’okukora ekirikureetera abantu bakye bonka kuteekateeka aha busingye. Nyegire eki Baibuli erikuraganisa abantu, hati nyikaikaine. Ninyetegyereza ngu abaana bangye nibaija kugira nyentsya nungi.”​—SANDRA, SPAIN.