1, 2. Abareeberezi abarikutaayaayira ebibiina bareebire mbeera ki omu bibiina bingi?

OMUREEBEREZI orikutaayaayira ebibiina akaba ari haihi kuhendera oruteerane oru yaabaire aine n’akakiiko k’abareeberezi. Arikubareeba aha maisho, akooreka ngu naabasiima ahabw’okukora n’obweziriki, kandi bamwe omuribo bakaba bari bakuru barikubaasa kuba baishenkuru. Kwonka haine eki yaabaire naayenda kumanya, n’ahabw’ekyo akababuuza ati: “Ab’eishe-emwe, mubaasize kutendeka abandi kugira ngu batungye obujunaanizibwa omu kibiina?” Bakaba nibaijuka ngu obu omureeberezi ogwo yaahereeruka kubataayaayira akabahiga kuta omutima munonga aha kutendeka abandi. Omwe aha bareeberezi akagarukamu ati: “Buzima, okutendeka titukutaireho munonga omutima.” Abareeberezi abandi nabo bakaikirizana nawe.

² Ku oraabe ori omureeberezi, noobaasa kwetegyereza ekyabaire omu ruteerane orwo? Eego buzima. Abareeberezi abarikutaayaayira ebibiina omu nsi yoona bareebire ngu hariho ekyetengo  ky’okutendeka ab’eishe-emwe omu bibiina bingi, abato n’abakuru kuhwera omu kureeberera entaama. Eki tikyorobi. Ahabw’enki kiri kityo?

3. (a) Ebyahandiikirwe nibyoreka bita obukuru bw’okutendeka abandi, kandi ahabw’enki twena eki nikitukwataho? (Reeba obugambo obw’ahansi.) (b) Ahabw’enki kirikubaasa kugumira abareeberezi kutendeka abandi?

³ Hatariho kubanganisa, abariisa nimumanya ngu okutendeka abandi ni kikuru. * Nimumanya ngu ab’eishe-emwe baingi nibeetengwa, ebibiina ebiriho kubaasa kuhama omu by’omwoyo n’okutandikaho ebibiina ebisya. (Shoma Isaaya 60:22.) Kandi nimumanya ngu Ekigambo kya Ruhanga nikibahiga ‘kwegyesa abandi.’ (Shoma 2 Timoseo 2:2.) N’obu kiraabe kiri kityo, nk’abareeberezi abaagambwaho aha kutandika, nikibaasa kuba nikibagumira kukikora. Mwaheza kureeberera amaka gaanyu, mukakora emirimo yaanyu, mukahikiiriza obujunaanizibwa bw’ekibiina, n’ebindi ebikuru, nimubaasa kureebeka nk’abataine bwire bw’okutendeka abandi omu kibiina. Ku kiraabe nikwo kiri, ka tureebe obukuru bw’okutendeka abandi.

4. Ahabw’enki obumwe abareeberezi nibeeziringa kutendeka abandi?

⁴ Niki ekirikubaasa kuba nikireetera abareeberezi kugumirwa kutunga obwire bw’okutendeka abandi? Obundi abamwe nibateekateeka bati: ‘Okutendeka abandi ni kikuru, kwonka tikurikwetengyesa ahonaaho nk’ezindi nshonga z’ekibiina. Twayeziringa kutendeka abandi, ekibiina nikibaasa kugumizamu nikigyenda omumaisho.’ N’obu kiraabe kihikire ngu enshonga ezimwe ziine kukorwa ahonaaho, okweziringa kutendeka abandi nikubaasa kushiisha ekibiina omu by’omwoyo.

5, 6. Oku omuvugi w’emotoka arikureeberera ingini nitukwegaho ki, kandi nikubaasa kugyeragyeranisibwa kuta n’okutendeka abandi omu kibiina?

⁵ Teekateeka aha ky’okureeberaho eki: Omuvugi w’emotoka naabaasa kuba naamanya ngu okureeberera emotoka ye n’okurinda ingini yaayo kuguma eri gye, aine kuguma naahindura oiro. Kwonka, naabaasa kuteekateeka ngu okuhindura oiro ti kikuru munonga nk’okutamu amajuta. Yaaba atataire majuta mu motoka, ahonaaho neerekyera aho kugyenda. Naabaasa kuteekateeka ngu ‘yaaba ataine bwire bw’okuhindura oiro, ingini neebaasa kugumizamu neekora kumara obwire.’ Kwonka eki nikibaasa kurugamu kabi ki? Omuvugi w’emotoka yaatuuraho kureeberera ingini y’emotoka ye neerugaho neerekyera aho kukora. Ekyo kyabaho, naija kukoresa obwire bwingi n’esente nyingi kukanika emotoka ye ekagaruka kugyenda. Eki nikitwegyesa ki?

⁶ Abareeberezi baine bingi ebirikwetengyesa kukorwa ahonaaho, kubaasa kurinda ekibiina kutahikwaho kabi. Nk’oku omuvugi w’emotoka arikuteeraho kuguma naayongyera amajuta omu tanka y’emotoka, abareeberezi nabo baine kwebembeza ebirikukira obukuru. (Fil. 1:10) Abareeberezi abamwe nibata omutima aha nshonga eziine kukorwa ahonaaho, baremwa kutendeka abandi ekiri nk’okureeberera ingini y’emotoka. Kwonka abareeberezi baaguma nibeeziringa kutendeka abandi, ekibiina nikiija kuba kitaine b’eishe-emwe barikumara abatendekirwe kuhikiiriza obujunaanizibwa.

7. Twine kutwara tuta abareeberezi abarikutaho obwire bw’okutendeka abandi?

 ⁷ N’ahabw’ekyo titushemereire kuteekateeka ngu okutendeka abandi tikurikwetengyesa ahonaaho. Abareeberezi abarikufayo ahari nyentsya y’ekibiina bakataho n’obwire bw’okutendeka ab’eishe-emwe abatarikumanya bingi, n’ababiiki b’obwengye kandi nibagasira ekibiina kyona. (Shoma 1 Petero 4:10.) Ekibiina nikigasirwa kita?

8. (a) Ahabw’enki abareeberezi nibafayo kutendeka abandi? (b) Abareeberezi abarikuheereza ahari ekyetengo ky’ababuurizi baine bujunaanizibwa ki? (Reeba akabokisi “ Ekigyendererwa Ekirikubahiga.”)

⁸ Nangwa n’abo abaaheereize kumara obwire bwingi, baine kuba abacureezi bakamanya ngu mporampora bukuru neija kubaremesa kukora bingi omu kibiina. (Mik. 6:8) Kandi baine kukimanya ngu “obunaku n’ebihikiirizi,” nibibaasa kureetaho empindahinduka omu muringo ogu barikuhikiirizamu obujunaanizibwa omu kibiina. (Mub. 9:11, 12; Yak. 4:13, 14) Abareeberezi ahabw’okufayo munonga aha ntaama za Yehova, nibateeraho kwegyesa ab’eishe-mwe abato ebi beegire omu myaka mingi barikuheereza omu bwesigwa.—Shoma Zaaburi 71:17, 18.

9. Niki ekiraabeho omu biro by’omumaisho ekirikureetera okutendekwa kuba kukuru?

⁹ Ni mu miringo ki endiijo ei abareeberezi abarikutendeka abandi bari nk’ekiconco omu kibiina? Nibahwera ekibiina kuhama. Mu muringo ki? Abareeberezi baatendeka abandi, nihabaho ab’eishe-emwe baingi abarikuhwera ekibiina kuguma kihami kandi kiine obumwe hati, n’okukira munonga omu bunaku bw’okubonabona kwingi. (Ezk. 38:10-12; Mik. 5:5, 6) N’ahabw’ekyo, abareeberezi abakundwa, nitubashaba kuta omutima aha kutendeka abandi hati.

10. Abareeberezi kubaasa kutunga obwire bw’okutendeka abandi, baine kukora ki?

¹⁰ Buzima, nitumanya ngu mwine bingi by’okukora omu kibiina ebirikutwara obwire bwanyu bwingi. N’ahabw’ekyo, nikibaasa kwetengyesa kukoresa bumwe aha bwire obwo omu kutendeka abandi. (Mub. 3:1) Mwakora mutyo, nimwija kuba mwakoresa gye obwire bwanyu.

11. (a) Niki ekirikushemeza aha buhabuzi obwahairwe abareeberezi abarikuruga omu mahanga gatari gamwe oburikukwata aha kutendeka? (b) Kurugiirira aha Enfumu 15:22, ahabw’enki kiri eky’omugasho kushwijuma obuhabuzi bw’abareeberezi abandi?

¹¹ Enyimaho, abareeberezi ababaasize kuhwera ab’eishe-emwe kukura omu by’omwoyo bakabuuzibwa omuringo ogu baakoreise omu kutendeka abandi. * N’obu embeera z’ab’eishe-emwe aba ziraabe nizitaana munonga, obuhabuzi obu baahaire nibushushana. Eki nikyoreka ki? Okutendeka oku okurikuruga omu Baibuli nikukora “hoona-hoona” omu kibiina, nk’oku kyabaire kiri omu biro bya Paulo. (1 Kor. 4:17) N’ahabw’ekyo, omu kicweka eki n’ekirikukurataho nituza kureeba obuhabuzi bumwe obu abareeberezi aba baahaire. (Enf. 15:22) Kubaasa kukyorobya, ekicweka eki nikiza kugamba ahari abo abarikutendeka ‘nk’abeegyesa’ n’abo abarikutendekwa ‘nk’abeegi.’

12. Omwegyesa aine kutaho mbeera ki, kandi n’ahabw’enki?

¹² Omwegyesa aine kutaho embeera nungi y’okutendekyeramu. Nk’oku omuhingi aine kuhinga eitaka, akaryorobya atakabyiremu mbibo, n’omwegyesa aine kutebeekanisa omutima gw’omwegi atakamwegyeise ebintu bisya. Mbwenu shi abeegyesa nibabaasa  kutaho bata embeera nungi z’okutendeka abandi? Nibabaasa kutooreza nabi wa ira. We akakikora ata?

13-15. (a) Nabi Samueli akaheebwa bujunaanizibwa ki? (b) Samueli akabuhikiiriza ata? (Reeba ekishushani aha kutandika.) (c) Ahabw’enki abareeberezi bashemereire kufayo munonga aha birikukwata ahari Samueli?

¹³ Eizooba rimwe, emyaka nka 3,000 enyima, Yehova akagambira nabi Samueli owaabaire akuzire ati: “Nyencakare nk’aga magingo niinyija kukwoherereza omushaija orikuruga omu nsi ya Benyamiini, omushukyeho amajuta g’okumushoroora kuba omugabe w’abantu bangye, Abaisraeli.” (1 Sam. 9:15, 16) Samueli akamanya ngu hati takiri mwebembezi, kandi ngu Yehova amuhaire omurimo gw’okushuka amajuta aha muhunguzi. Samueli naabaasa kuba yaateekateekire ati: ‘Nimbaasa kutebeekanisa nta omushaija ogu kuhikiiriza obujunaanizibwa bwe?’ Akagira ekiteekateeko kandi yaatunga n’omuringo ogu araakihikiirizemu.

¹⁴ Eizooba eryakuratsireho, Samueli ku yaareebire Saulo, Yehova akamugira ati: “Ngugwo omushaija.” Samueli akatandika kukoresa omuringo gwe. Akeeta Saulo kurya nawe omu kishengye ky’okuriiramu. Ku baahikireyo, Samueli akaha Saulo n’omuheereza we ah’okushutama harungi, n’ekivune ky’enyama kirungi munonga reero yaagira ati: “Okirye; ahakuba kibaire kikubikiirwe okuhitsya aha bunaku obubaire butairweho.” Bwanyima, Samueli akatwara Saulo omu nju ye, baagyenda nibagaaniira. Samueli akaba naayenda kukoresa gye obwire bw’okurya n’obw’okweshemeza. N’ahabw’ekyo Samueli akeeta Saulo baaza hamwe aha mutwe gw’enju. Omu mabeho g’omwabazyo, Samueli akaguma ‘naagaaniirirayo na Saulo’ kuhitsya obu baagiire kubyama. Ku bwaseesire, Samueli yaashuka amajuta ahari Saulo, yaamunywegyera kandi yaamuha n’obuhabuzi obundi. Bwanyima y’ekyo, akoohereza Saulo yaagyenda ayetebeekanisiize ebiraabeho omu biro by’omumaisho.—1 Sam. 9:17-27; 10:1.

¹⁵ Okushuka majuta aha muntu kuba omwebembezi w’eihanga, buzima tikirikushushana n’okutendeka ow’eishe-emwe kuba omureeberezi nari omuheereza omu kibiina. Kwonka nabwo, abareeberezi obunaku obu nibabaasa kwega bingi aha muringo ogu Samueli yaakoreise. Ka tureebe bibiri aharibyo.

16. (a) Samueli akeehurira ata obu Abaisraeli baashaba omugabe? (b) Samueli akashuka amajuta ahari Saulo aine miteekateekyere ki?

¹⁶ Gira ekihika, kandi oteeziringa. Obu Samueli yaabanza kuhurira ngu Abaisraeli nibenda omugabe, akateekateeka ngu bamureebize kandi ngu bamwangire. (1 Sam. 8:4-8) Nangwa akabanza kweziringa kukora eki abantu baabaire nibenda, Yehova yaahika n’aha kumugambira emirundi eshatu ngu ahurikize eki abantu baabaire nibamugambira. (1 Sam. 8:7, 9, 22) Kwonka nabwo, Samueli taragiriire nziika nari ekiniga omushaija owaabaire naza kuza omu mwanya gwe. Yehova ku yaagambiire nabi ogwo kushuka amajuta ahari Saulo, akooroba, kandi yaakikora eyekundiire.

17. Abareeberezi nibagira bata emiteekateekyere nk’eya Samueli, kandi nibatunga kumarwa ki?

¹⁷ Nka Samueli, abareeberezi ab’obunaku obu nibooreka emiteekateekyere niyo emwe ahari abo abu barikutendeka. (1 Pet. 5:2) Abareeberezi tibarikweziringa kutendeka abandi barikutiina ngu obujunaanizibwa bwabo nibwija kutwarwa abu batendekire. Abeegyesa abaine emiteekateekyere mirungi nibareeba abu barikwegyesa, ‘nk’abakozi’ bagyenzi baabo kandi ebiconco omu kibiina, beitu batari b’okuhayahayana nabo. (2 Kor. 1:24; Heb. 13:16) Abeegyesa nk’abo  abatarikweyendeza ka nibatunga okumarwa baareeba abu barikwegyesa nibakora kyona eki barikubaasa kugasira ekibiina!—Byak. 20:35.

18, 19. Omwegyesa naabaasa kutebeekanisa ata omutima gw’omwegi, kandi ahabw’enki omuringo ogwo guri murungi?

¹⁸ Ba omunywani, kutari kuba omwegyesa kwonka. Obu nabi Samueli yaabugana Saulo, akaba naabaasa kwihayo ecupa y’amajuta ahonaaho agamushukye aha mutwe, reero amwohereze ashukirweho amajuta kwonka atatebeekanisiibwe gye. Omu mwanya gw’ekyo, Samueli akatwara obwire kutebeekanisa omutima gwa Saulo mporampora. Bwanyima y’okurya, bakagyenda hamwe barikugaaniira, kandi bakahuumura, nibwo yaamanya ku buri obwire burungi bw’okushuka amajuta ahari Saulo.

¹⁹ Nikyo kimwe, omwegyesa ashemereire kubanza kutaho embeera nungi, kandi akagira omukago murungi n’ow’eishe-emwe atakamutendekire. Ebi omureeberezi arikubaasa kukuratira kugira omukago murungi n’ou arikwegyesa, nibitaana kurugiirira aha ihanga, embeera z’ekicweka, n’emigyenzo. Kwonka, omureeberezi hoona ahu arikutuura n’obu yaakuba aine bingi by’okukora, yaagira obwire kubaho hamwe n’ou arikwegyesa, naaba ari nk’orikumugira ngu, “ninkutwara nk’ow’omuhendo.” (Shoma Abarooma 12:10.) Buzima, omwegi naija kusiima munonga ebi orikumwegyesa waaba noomufaho.

20, 21. (a) Noobaasa kushoboorora ota omwegyesa murungi? (b) Nituza kugamba ahari ki omu kicweka ekirikukurataho?

²⁰ Abareeberezi, mugume nimwijuka ngu, omwegyesa murungi tarikukunda kutendeka omuntu kwonka, beitu naakunda n’omuntu ou arikutendeka. (Gyeragyeranisa Yohaana 5:20.) Omwegyesa yaaba aine emiteekateekyere nk’egyo, omwegi naarahuka kugireeba kandi neekwata aha ku arikutwara okwegyesibwa oku arikutunga. N’ahabw’ekyo, abareeberezi abakundwa mwaba nimutendeka abandi, mube banywani baabo beitu tikubeegyesa kwonka.—Enf. 17:17; Yoh. 15:15.

²¹ Omureeberezi bwanyima y’okutebeekanisa omutima gw’omwegi, naabaasa kumutendeka ebi arikwenda ngu ayegye. Omureeberezi naabaasa kukoresa miringo ki? Ekyo nikiija kugambwaho omu kicweka ekirikukurataho.