Eky’okubanza, manya amazima aga agarikuhuumuriza ngu Ruhanga naareeba okubonabona okuri omu nsi hati, kandi naayenda kugira eki yaakora kukumaraho. (Zaaburi 72:13, 14) Omu Kigambo kye, Baibuli, Ruhanga naaraganisa ngu aryaha abo “abarikushaasha okuhuumura.” Ryari? “Mukama waitu Yesu ku arishuuruurwa naaruga omu iguru na baamaraika be ab’amaani . . . okuhoora enzigu abatarikumanya Ruhanga n’abarikwanga kworobera engiri ya Mukama waitu Yesu.” (2 Abatesalonika 1:7, 8) Eki Yesu naija kukikora omu biro by’omumaisho aha ‘rugamba orw’ekiro kikuru kya Ruhanga ow’obushoboorozi bwona,’ oruri kumanywa nka Haramagedoni.—Okushuuruurwa 16:14, 16.

Omu rutaro orwo, Ruhanga tarikwija kukoresa abantu kurwanisa omubi, kureka omwana we Yesu Kristo, n’ebihangirwe ebindi eby’omwoyo eby’amaani. Amahe g’omu iguru nigaija kumariraho kimwe okubonabona.—Isaaya 11:4; Okushuuruurwa 19:11-16.

Na hati, oku Ruhanga arikureeba entaro tikuhindukire. Naakoresa entaro kumaraho okubonabona n’obubi. Nk’oku ebyafaayo birikworeka, Ruhanga wenka niwe arikumanya obu entaro nk’ezo ziraabeho kandi akacwamu n’abaraazejumbemu. Nk’oku twaheza kureeba, Ruhanga yaacwiremu ngu orutaro rw’okumaraho obubi n’okubonabona rubeho omu biro by’omumaisho, kandi ngu Omwana we Yesu Kristo abe niwe yaarwebembera. Eki nikimanyisa ngu  entaro zoona eziri omu nsi obunaku obu tizirikusiimwa Ruhanga, n’obu zaakuba nizireebeka nka nungi.

Kubaasa kukyoreka gye: Teekateeka aha nyine-emwe babiri bariyo nibarwana, ishebo atariho. Bwanyima bahumuramu reero bateerere ishe esimu. Omwe ayehozaho ngu mugyenzi we niwe yaatandika okurwana, ondiijo nawe agira ngu mugyenzi we yaaba naamutwariza kubi. Bombi bashoboororera ishebo buri omwe arikuteekateeka ngu ishe naaza kumushagika. Kwonka, bwanyima y’okuhurira ebi baagamba, ishe abagira ngu barekyere aho kurwana bamutegyereze kushoboorora enshonga zaabo yaagaruka omuka. Nabo bacwamu kutegyereza. Kwonka, ahonaaho bagaruka barwana. Bwanyima ya ishe kuhika omuka, taine n’omwe ou yaashagika, omu mwanya gw’ekyo, bombi abafubira.

Obunaku obu, amahanga agari omu ntaro nigakira kushaba Ruhanga kugashagika. Kwonka Ruhanga tihaine orubaju oru arikuba naashagika omu ntaro z’obunaku obu. Omu mwanya gw’ekyo, Ekigambo kye Baibuli nikigira kiti: “Mutaihura omuntu weena ekibi ahabw’ekibi,” kandi, “muteehoorera enzigu.” (Abarooma 12:17, 19) N’ekindi, amanyiise abantu be ngu baine ‘kumutegyereza n’okugumisiriza’ kugira eki yaakora, ahari Haramagedoni. (Zaaburi 37:7) Amahanga ku garikuremwa kutegyereza Ruhanga gakacwamu kwejumba omu ntaro, Ruhanga naareeba ngu abantu abo baine omweragiiro kandi tarikusiima entaro zaabo. N’ahabw’ekyo, ahari Haramagedoni, naaza kworeka ekiniga kye acwere amahanga orubanja, ‘amareho engamba okuhika aha muheru gw’ensi.’ (Zaaburi 46:9; Isaaya 34:2) Buzima, Haramagedoni n’orutaro oruraije kumaraho entaro zoona omu nsi.

Okumaraho entaro ni kimwe aha migisha ei Obukama bwa Ruhanga buraareete. Yesu akagamba aha gavumenti egyo omu kushaba oku okurikumanywa gye: “Obukama bwawe bwije. Eby’okunda bikorwe omu nsi nk’oku bikorwa omu iguru.” (Matayo 6:10) Obukama bwa Ruhanga tiburaamareho entaro zonka, nibwija kumaraho n’obukomooko bwazo, nibwo bubi oburi omu nsi. (Zaaburi 37:9, 10, 14, 15) Niyo nshonga ahabw’enki abakuratsi ba Yesu bategyereize n’ekihika emigisha y’Obukama bwa Ruhanga.—2 Petero 3:13.

Mbwenu shi, nitutegyereza kuhitsya ryari Obukama bwa Ruhanga kumaraho okubonabona, abarikukureetaho, n’obubi? Okuhikiirira kw’obunabi bwa Baibuli nikworeka ngu turi omu biro ‘by’emperu’ eby’ensi egi embi. (2 Timoseo 3:1-5) * Juba, Obukama bwa Ruhanga nibwija kumaraho ebiro ebi by’emperu ahari Haramagedoni.

Nk’oku kyaba kyagambirweho, abo abaraacwekyerezibwe omu rutaro oru orw’aha muheru, n’abo abangire “kworobera engiri ya Mukama waitu Yesu.” (2 Abatesalonika 1:8) Ijuka ngu Ruhanga tarikushemerererwa okufa kw’omuntu weena otwariiremu n’ababi. (Ezekieli 33:11) Ahabw’okugira ngu “tarikwenda muntu weena kuhwerekyerera” omu rutaro oru orw’ahamuheru, hati naayenda ngu amakuru marungi agarikukwata ahari Yesu ‘gagambwe omu nsi zoona okuba eky’okuhamya aha mahanga goona,’ emperu etakahakire. (2 Petero 3:8, 9; Matayo 24:14; 1 Timoseo 2:3, 4) Buzima, ahabw’omurimo gw’okubuurira amakuru marungi ogurikukorwa Abajurizi ba Yehova, obunaku obu abantu baine omugisha gw’okumanya Ruhanga, okworobera amakuru marungi agarikukwata ahari Yesu, n’okugumaho bakareeba obu entaro ziraabe zitakiriho.