Yesu akajuna abantu abeesigwa obu yaahayo amagara ge nk’ekitambo. (Matayo 20:28) N’ahabw’ekyo Baibuli neeyeta Yesu “Omujuni w’ensi.” (1 Yohaana 4:14) Kandi neegira eti: “Tihariho ondiijo ou [turikubaasa kuboneramu] okujunwa, ahakuba tihariho rindi iziina ahansi y’eiguru eryahairwe abantu, erishemereire kutujuna.”—Ebyakozirwe 4:12.

 Yesu ‘akaroza aha kufa omu mwanya gw’abantu boona’ abarikumwikiririzamu. (Abaheburaayo 2:9; Yohaana 3:16) Bwanyima, ‘Ruhanga akamuzoora omu bafu,’ kandi akagaruka omu iguru nk’ekihangirwe ky’omwoyo. (Ebyakozirwe 3:15) Okwo omu iguru, ‘naabaasa kujunira kimwe [abarikushaba] Ruhanga nibaraba omuriwe, ahakuba obutoosha bwona naabeeshengyerereza.’—Abaheburaayo 7:25.

Ahabw’enki Yesu aine kutweshengyerereza?

 Twena turi abasiisi. (Abarooma 3:23) Ekibi nikita omukingo aha gati yaitu na Ruhanga, kandi nikitureetera kufa. (Abarooma 6:23) Kwonka Yesu naakora ‘nk’omutonganizi’ w’abo abarikwikiririza omu kitambo kye. (1 Yohaana 2:1) Naabeeshengyerereza arikushaba Ruhanga kuhurira okushaba kwabo n’okubasaasira ebibi byabo arikwihirira aha kitambo kya Yesu. (Matayo 1:21; Abarooma 8:34) Ruhanga naahurira okweshengyereza kwa Yesu, ahakuba nikuhikaana n’ebi arikukunda. Ruhanga akoohereza Yesu omu nsi “ngu ensi ejunwe ahabwe.”—Yohaana 3:17.

Okwikiririza omuri Yesu nikyo kyonka ekirikwetengyesa kubaasa kujunwa?

 Ngaaha. N’obu turaabe twine kwikiririza omuri Yesu kubaasa kujunwa, hariho ebindi ebirikwetengyesa. (Ebyakozirwe 16:30, 31) Baibuli neegira ngu “nk’omubiri ogutarimu mwoyo oku guba gufiire, nikwo n’okwikiriza okutaine kukora kuba kufiire.” (Yakobo 2:26) Kubaasa kujunwa, twine:

•   Kwega ebirikukwata ahari Yesu na Ishe, Yehova.—Yohaana 17:3.

•   Kwombeka okwikiriza kwaitu omuribo.—Yohaana 12:44; 14:1.

•   Kworeka okwikiriza kwaitu turikworobera ebiragiro byabo. (Luka 6:46; 1 Yohaana 2:17) Yesu akagira ngu ti buri omwe orikumweta ‘mukama” naija kujunwa, ‘kureka orikukora ebi [Ishe] ow’omu iguru arikukunda.’—Matayo 7:21.

•   Gumizamu nooyoreka okwikiriza kwawe n’omu mbeera zigumire. Eki Yesu akakyoreka gye obu yaagira ati: ‘Orikugumisiriza kuhitsya aha muheru, niwe arikwija kujunwa.’—Matayo 24:13.