Anwongyelelɛ kpole ne a le tɛnlabelɛ mɔɔ anu yɛ se kpalɛ mɔɔ alesama bahɔ nu kenle bie a. Baebolo ngapezo kile kɛ, ɔbara wɔ “awieleɛ mekɛ,” anzɛɛ “ewiade awieleɛ” ne anu. (2 Temɔte 3:1; Daneɛle 12:4) “Anwongyelelɛ mɔɔ bara mekɛ zɔhane ne anu la, ye ɛzulolɛ, sumunli kɛ ewiade bɔle ɔ bo dedee mɔɔ yeradwu ɛnɛ la, bie ɛtɛsile ɛlɛ, yɛɛ bie noko ɛnrɛzi ɛlɛ na aloa abɔ.”​—Maake 13:19; Daneɛle 12:1; Mateyu 24:21, 22.

Ninyɛne mɔɔ basisi anwongyelelɛ kpole ne anu la

•   Bɛbazɛkye adalɛ ɛzonlenlɛ. Bɛbazɛkye adalɛ ɛzonlenlɛ arɛlevilɛ nu yɛɛ ɔbayɛ ndɛndɛ. (Yekile 17:1, 5; 18:9, 10, 21) Nyamenle bava awula Maamgbole Koyɛlɛ Eku ne mɔɔ gyi ɛkɛ ne maa maanyɛlɛ tumililɛ ne la ahonle nu yeamaa yeazɛkye ye.​—Yekile 17:3, 15-18. *

•   Bɛbateta nɔhalɛ ɛzonlenlɛ. Maanle maanle mɔɔ ɛha bɛ nwo ɛbɔ nu mɔɔ bɛvɛlɛle bɛ wɔ Yizikeɛle ɛnyelɛzodeɛnwunlɛ ne anu kɛ “Gɔɔgo mɔɔ vi Meegɔɔgo” la babɔ mɔdenle kɛ ɔsɛkye menli mɔɔ wɔ nɔhalɛ ɛzonlenlɛ nu la. Noko, Nyamenle babɔ ye azonvolɛ nwo bane.​—Yizikeɛle 38:1, 2, 9-12, 18-23.

•   Bɛbabua azɛlɛ ye azo amra ndɛne. Gyisɛse babua alesama ndɛne na yeahyɛ “bɛ nuhua nwiɔ, kɛmɔ mboaneneavolɛ ye mboane fi mbɔnkye avinli la.” (Mateyu 25:31-33) Bɛbagyinla kɛzi awie boale Kelaese ‘amediema’ ne mɔ, menli mɔɔ nee ye bali tumi wɔ anwuma la azo a bɛabua ndɛne ne a.​—Mateyu 25:34-46.

•   Bɛbaboɔboa menli mɔɔ bali tumi wɔ Belemgbunlililɛ ne anu la anloa. Bɛbadwazo nɔhavoma mɔɔ bɛkpa bɛ mɔɔ bɛbawie bɛ azɛlɛ ye azo gyima ne la bɛahɔ anwuma na bɛ nee Kelaese ali tumi.​—Mateyu 24:31; 1 Kɔlentema 15:50-53; 1 Tɛsalonaekama 4:15-17.

•   Amagɛdɔn. Eza bɛfɛlɛ “Tumivolɛ Bedevinli ne kenle kpole ne anu konle ne” kɛ ‘Gyihova Kenle.’ (Yekile 16:14, 16; Ayezaya 13:9; 2 Pita 3:12) Bɛbazɛkye menli mɔɔ Kelaese babua bɛ ewule fɔlɛ la amuala. (Zɛfanaya 1:18; 2 Tɛsalonaekama 1:6-10) Bɛbazɛkye ewiade amuala maanyɛlɛ ngyehyɛleɛ ne mɔɔ Baebolo ne fɛlɛ ye nane ati nsuu ne la.​—Yekile 19:19-21.

Ninyɛne mɔɔ basisi anwongyelelɛ kpole ne anzi la

•   Bɛbagua Seetan nee sunsum ɛtane ne mɔ efiade. Anwumabɔvolɛ kpole ne bavuandi Seetan nee sunsum ɛtane ne mɔ yeagua “azɛlɛ kuma ne mɔɔ ɛnlɛ ɔ bo” la anu, ɛhye kile kɛ bɛnrɛhola bɛnrɛyɛ ɛhwee. (Yekile 20:1-3) Yɛbahola yɛava tɛnlabelɛ mɔɔ Seetan bahɔ nu la yɛatoto efiadelalɛ nwo; ɔnrɛhola ɔnrɛgyegye awie biala.​—Yekile 20:7.

•   Ɛvolɛ Apenle Ko Tumililɛ ne babɔ ɔ bo. Nyamenle Belemgbunlililɛ ne babɔ ye ɛvolɛ 1,000 tumililɛ ne mɔɔ bamaa alesama anyia nyilalɛ dɔɔnwo la abo. (Yekile 5:9, 10; 20:4, 6) “Menli pemgbenleamgbe” bie banyia ngoane wɔ “amaneɛnwunlɛ kpole ne anu” na bɛadɛnla azɛlɛ ye azo wɔ Ɛvolɛ Apenle Ko tumililɛ ne anu.​—Yekile 7:9, 14; Edwɛndolɛ 37:9-11.