Dwɔn Edwɛkpa 12:1-50
12 Ɔhale kenle nsia na Akpabɛnwo ne adwu la, Gyisɛse hɔle Bɛtani, ɛleka mɔɔ ɛnee Lazalɛse+ mɔɔ ɔdwazole ye ɔvile mowuamra anu la wɔ la.
2 Yemɔti bɛdole ye ɛkponle wɔ ɛkɛ, ɛnee Maata ɛlɛsonle bɛ,+ na ɛnee Lazalɛse boka bɛdabɛ mɔɔ bɛ nee ye ɛlɛdi aleɛ ne* la anwo.
3 Mɛle wolale nwole evuanlɛ, naade kpalɛ pɔne ko* mɔɔ ye bolɛ yɛ se la guale Gyisɛse agyakɛ anwo na ɔvale ɔ ti enrinli ɔkyikyile. Nwole ne evuanlɛ vale sua ne anu amuala.+
4 Noko Dwudase Yesekaleɔto,+ ye ɛdoavolɛma ne ko mɔɔ ɛnee ɔbaye ye yeamaa la hanle kɛ:
5 “Duzu ati a bɛandɔne nwole evuanlɛ ɛhye denale* 300 na bɛanva bɛammaa ehyiavolɛma ɛ?”
6 Tɛ kɛ ɔdwenle ehyiavolɛma anwo la ati a ɔhanle ɛhye a, emomu kɛmɔ ɔle awule na ɔdaye a ɔlɛ ezukoa ɛlɛka ne na ɔwua ezukoa mɔɔ bɛfa bɛgua nu la bie la ati ɔ.
7 Na Gyisɛse hanle kɛ: “Bɛgyakyi ye, ɔluakɛ kɛkala ɔlɛyɛ debie mɔɔ bɛbayɛ ye wɔ kenle mɔɔ bɛbazie me la.+
8 Ɔluakɛ bɛ nee ehyiavolɛma de dahuu,+ noko mame bɛ nee me ɛnrɛdɛnla dahuu.”+
9 Akee Dwuuma dɔɔnwo dele kɛ ɔwɔ ɛkɛ, na bɛrale ɛkɛ, na tɛ Gyisɛse angome ati a bɛrale a, emomu bɛrale kɛ bɛbanlea Lazalɛse mɔɔ yedwazo ye yevi mowuamra anu la noko.+
10 Na ɛsɔfo mgbanyinli ne mɔ bɔle kpɔkɛ kɛ bɛbahu Lazalɛse noko,
11 ɔluakɛ ɔdaye ti a Dwuuma dɔɔnwo ɛlɛkɔ ɛkɛ na bɛanyia diedi wɔ Gyisɛse anu a.+
12 Aleɛ hyenle la, menli dɔɔnwo ne mɔɔ rale ɛvoyialilɛ ne la dele kɛ Gyisɛse ɛlɛba Gyɛlusalɛm.
13 Yemɔti bɛpepɛle arɛlɛ mrɛlakɛ bɛhɔyiale ye na bɛbɔle ɔ bo bɛhanle kɛ: “Yɛsɛlɛ wɔ, die ye! Nyilalɛ ɛha mɔɔ ɛlɛba wɔ Gyihova* duma nu la,+ Yizilayɛ Belemgbunli ne!”+
14 Mɔɔ Gyisɛse nwunle asoaso ralɛ bie la, ɔdɛnlanle ɔ nwo zo+ kɛ mɔɔ bɛhɛlɛ la kɛ:
15 “Mmasulo, Zayɔn ara raalɛ. Nea! Wɔ belemgbunli ne ɛlɛba, ɔde asoaso ralɛ zo.”+
16 Ye ɛdoavolɛma ne ande ninyɛne ɛhye mɔ abo wɔ mɔlebɛbo ne, noko mekɛ mɔɔ bɛwulale Gyisɛse anyunlunyia la,+ bɛhakyele kɛ bɛhɛlɛle ninyɛne ɛhye mɔ bɛvanenle ɔ nwo na bɛyɛle bɛmaanle ye.+
17 Akee menli dɔɔnwo ne mɔɔ ɛnee wɔ ɔ nwo ɛkɛ wɔ mekɛ mɔɔ ɔvɛlɛle Lazalɛse ɔvile nla*+ ne anu na ɔdwazole ye ɔvile mowuamra anu la hɔle zo hanle mɔɔ zile la hilele awie mɔ.+
18 Ɛhye noko ati a menli dɔɔnwo ne rayiale ye la, ɔluakɛ bɛdele kɛ yeyɛ nwanwane sɛkɛlɛneɛ ɛhye.
19 Yemɔti Falasiima ne zele bɛ nwo ngoko kɛ: “Bɛnwu kɛ yɛangola ɛhwee yɛ. Bɛnlea! Ewiade amuala ɛdu ɛdoa ye.”+
20 Ɛnee Gilikima bie mɔ boka bɛdabɛ mɔɔ bɛrale kɛ bɛbazonle wɔ ɛvoyialilɛ ne abo la anwo.
21 Yemɔti bɛhɔle Felepe+ mɔɔ vi Bɛteseeyeda mɔɔ wɔ Galeli la anwo ɛkɛ ne na bɛzele ye kɛ: “Yɛmenle, yɛkpondɛ kɛ yɛnwu Gyisɛse.”
22 Felepe hɔhanle hilele Andelu. Andelu nee Felepe hɔhanle hilele Gyisɛse.
23 Noko Gyisɛse buale bɛ kɛ: “Mekɛ ɛdwu kɛ bɛkɛwula sonla Ra ne anyunlunyia.+
24 Meka nɔhalɛ ne meahile bɛ, saa hwiiti ma andɔ aze amkpɔlɔ a, ɔle ma ko ala; noko saa ɔkpɔlɔ a,+ ɔso ma dɔɔnwo.
25 Mɔɔ kulo ye ngoane* la sɛkye ye, noko mɔɔ kpɔ ye ngoane*+ wɔ ewiade ɛhye anu la babɔ nwolɛ bane amaa dahuu ngoane.+
26 Saa awie kpondɛ kɛ ɔsonle me a, maa ɔdoa me, na ɛleka mɔɔ mewɔ la, me sonvolɛ ne noko bara ɛkɛ ne bie.+ Saa awie kpondɛ kɛ ɔsonle me a, Selɛ ne bali ye eni.
27 Kɛkala, nyane kpole ɛha me,*+ na duzu a menga a? Egya, die me fi tɛnlabelɛ ɛhye anu.+ Noko akee, ɛhye ati a membale a.
28 Egya, wula wɔ duma anyunlunyia.” Na ɛnelɛ bie+ vi anwuma hanle kɛ: “Mewula ye anyunlunyia, na mebawula ye bieko.”+
29 Menli dɔɔnwo ne mɔɔ gyigyi ɛkɛ ne la dele na bɛbɔle ɔ bo bɛhanle kɛ ezule ne ɛhulu. Bie mɔ noko hanle kɛ: “Anwumabɔvolɛ ɛdendɛ ɛhile ye.”
30 Gyisɛse buale kɛ: “Tɛ medame ti a ɛnelɛ ɛhye rale a, emomu bɛdabɛ ti ɔ.
31 Akee bɛbabua ewiade ɛhye ndɛne; kɛkala bɛbaye mɔɔ nea ewiade ɛhye azo+ la bɛavi ɛkɛ.+
32 Na saa bɛkenda me wɔ baka zo a,+ mebahwe menli ngakyile kɔsɔɔti meara me nwo.”
33 Ɔhanle ɛhye ɔvale ɔhilele ewule holɛ ko mɔɔ ɔbawu la.+
34 Akee menli dɔɔnwo ne buale ye kɛ: “Yɛdele ye wɔ Mɛla ne anu kɛ Kelaese ne badɛnla ɛkɛ dahuu.+ Kɛmɔti a ɛse ɔwɔ kɛ bɛkenda sonla Ra ne wɔ baka zo ɛ?+ Nwane a le sonla Ra ɛhye?”
35 Yemɔti Gyisɛse zele bɛ kɛ: “Wienyi ne nee bɛ badɛnla mekɛ ekyi. Mekɛ mɔɔ wienyi ne wɔ ɛkɛ la, bɛlua nu amaa awozinli anva bɛ; awie biala mɔɔ lua awozinli nu la ɛnze ɛleka mɔɔ ɔlɛkɔ la.+
36 Mekɛ mɔɔ bɛlɛ wienyi ne la, bɛnyia diedi wɔ wienyi ne anu, amaa bɛayɛ wienyi ne amra.”+
Gyisɛse hanle ɛhye na ɔvile ɛkɛ ɔhɔveale.
37 Ɔyɛle nwanwane ninyɛne dɔɔnwo ɔhilele bɛ ɛdeɛ, noko bɛannyia diedi wɔ ye nu,
38 amaa ngapezonli Ayezaya edwɛkɛ ɛhye mɔɔ ɔhanle la ara nu kɛ: “Gyihova,* nwane a ɛnyia diedi wɔ mɔɔ bɛdele bɛvile yɛ ɛkɛ* ne la anu a?+ Na nwane a Gyihova* ɛye ɔ sa ɛhile ye a?”+
39 Ayezaya eza hanle deɛmɔti bɛanlie ye bɛanli la kɛ:
40 “Yezi bɛ nye na yemaa bɛ ahonle ɛyɛ se, amaa bɛanva bɛ nye bɛannwu debie na bɛava bɛ ahonle bɛade ɔ bo na bɛahakyi na meayɛ bɛ ayile.”+
41 Ayezaya hanle ɛhye mɔ ɔluakɛ ɔnwunle ye anyunlunyia ne na ɔhanle ɔ nwo edwɛkɛ.+
42 Na menli dɔɔnwo mɔɔ mgbanyima ne mɔ bɔbɔ boka nwo la nyianle diedi wɔ ye nu,+ noko Falasiima ne ati bɛangola nwolɛ edwɛkɛ ka wɔ bagua nu amaa bɛanye bɛ bɛanvi nyianusua ne anu;+
43 ɔluakɛ ɛnee bɛkulo menli anyunlunyia bɛtɛla Nyamenle anyunlunyia bɔbɔ.+
44 Noko Gyisɛse maanle ɔ ne zo hanle kɛ: “Awie biala mɔɔ kɛnyia diedi wɔ me nu la, tɛ me ngome a ɔdie me ɔdi a, emomu ɔdie ahenle mɔɔ zoanle me la noko ɔdi;+
45 na mɔɔ ɛnwu me la ɛnwu Mɔɔ zoanle me la noko.+
46 Mera kɛ mame a mele ewiade wienyi ne a,+ amaa awie biala mɔɔ kɛnyia diedi wɔ me nu la anga awozinli nu.+
47 Noko saa awie te me edwɛkɛ ne na yeanli zo a, membua ye ndɛne ɔluakɛ meamba kɛ mebabua ewiade ndɛne; emomu membale kɛ mebalie ewiade ne.+
48 Awie biala mɔɔ ɛmbu me na ɔnlie me edwɛkɛ ne ɔnli la, debie ko a babua ye ndɛne a. Edwɛkɛ ne mɔɔ meha la a babua ye ndɛne wɔ mekɛ ne mɔɔ li awieleɛ la a.
49 Ɔluakɛ meambɔ me ti anu a mendendɛle a, emomu Selɛ ne mɔɔ zoanle me la a ɛhile me mɔɔ ɔwɔ kɛ meka nee kɛzi ɔwɔ kɛ meka ye la a.+
50 Na meze kɛ ye Mɛla ne kile dahuu ngoane.+ Yemɔti, debie biala mɔɔ Selɛ ne ɛha ɛhile me la yɛɛ meka a.”+
Ɔbodwɛkɛ
^ Anzɛɛ “bɛ nee ye dede ɛkponle ne anwo.”
^ Anzɛɛ “ngakyelɛ nla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “me ɛkɛla.”
^ Anzɛɛ “yɛ edwɛkɛ.”
