Mrɛlɛbulɛ 6:1-35
6 Me ra, saa wɔli ɛ gɔnwo agyinlanu,+Saa wɔzoma ɛyɛvolɛ bie asa anu ɛ nee ye ɛyɛ ngyekyeleɛ,+
2 Saa ɛwɔkɛ mɔɔ wɔbɔ la ɛzua wɔ ɛhane,Na ɛ nloa ɛhwe edwɛkɛ ɛmaa wɔ a,+
3 Me ra, yɛ ɛhye fa die ɛ nwo,Ɔluakɛ ɛ gɔnwo asa ɛha wɔ:
Kɔ na kɔbɛlɛ ɛ nwo aze na bodo ɛ gɔnwo ne ndɛndɛ.+
4 Mmamaa nafelɛ kɔ ɛ nye zo,Anzɛɛ mmamuomua ɛ nye ɛbɔ ngɔsɔkɛ.
5 Die ɛ nwo kɛ mɔɔ kɛtɛboɛ die ɔ nwo fi bɔvolɛ asa anu,Kɛ aloma die ɔ nwo fi nlomakyevolɛ asa anu la.
6 Wɔmɔ mgbovonle, kɔ ngyigyilira ɛkɛ;+Nea ye ndenle na nwu nrɛlɛbɛ.
7 Ɔnlɛ adekilevolɛ, kpanyinli, anzɛɛ tumivolɛ biala ɛdeɛ,
8 Noko ɔsiezie ye aleɛ wɔ wawaa nu,+Yɛɛ ɔkuohua ye aleɛ nloa wɔ ma ɛdelɛ mekɛ nu.
9 Wɔmɔ mgbovonle, ɛbala wɔahɔdwu kenlenzu?
Mekɛ boni a ɛvi nafelɛ nu ɛbadwazo a?
10 Nafelɛ ekyi, ngɔsɔkɛbɔlɛ ekyi,Ɛto ɛ sa ɛbɛka nu kɛ ɛdie ɛ menle ekyi,+
11 Na wɔ ehyia bara kɛ awule,Na ɛ nwo ahyele wɔ kɛ sonla mɔɔ fa etu kɔ awule la.+
12 Sonlamgbane nee amumuyɛnli duolua nu tendɛ mgbane mgbane;+
13 Ɔbɔ ɔ nye,+ ɔfa ɔ gyakɛ nee ɔ sa mrɛlɛsɛka ɔyɛ sɛkɛlɛneɛ.
14 Ɔlɛ ahonle mɔɔ le mɛlɛbɛla,Dahuu ɔbɔ adwenle ɛtane+ na ɔtwehwe manzonle ɔto menli avinli.+
15 Ɛhye ati, esiane bado ye arɛlevilɛ nu;Ɔbabubu arɛlevilɛ nu mɔɔ bɛnrɛhola bɛnrɛyɛ ye ayile a.+
16 Ninyɛne nsia wɔ ɛkɛ mɔɔ Gyihova kyi a;Ɛhɛe, ninyɛne nsuu wɔ ɛkɛ mɔɔ ɔkyi* bɛ bɔkɔɔ a:
17 Anwomemaazo ɛnyelɛ,+ adalɛ ɛtafinlimalɛ+ nee ɛsalɛ mɔɔ ka tenlenenli mogya gua la,+
18 Ahonle mɔɔ fa amumuyɛ adwenle+ nee egyakɛ mɔɔ nriandi ndɛndɛ kɔyɛ ɛtane,
19 Sonla mɔɔ di dasewia na ɔbɔ adalɛ mekɛ biala la,+Nee awie biala mɔɔ twehwe manzonle to mediema avinli la.+
20 Me ra, di wɔ papa mɛla zo,Yɛɛ mmakpo wɔ mame adehilelɛ.*+
21 Fa bɛ kyekye wɔ ahonle nwo dahuu;Fa bɛ kyekye ɛ kɔme.
22 Saa ɛlɛtia a, ɔbahile wɔ adenle;Saa ɛkɔda a, ɔbazinza wɔ;Yɛɛ saa ɛtunwue a, ɔbadendɛ yeahile wɔ.*
23 Ɔluakɛ mɛla ne le kɛnlaneɛ,+Yɛɛ ngilehilelɛ* ne le wienyi,+Na ahwibɛnyunlu mɔɔ tenrɛdenrɛ sonla la a le ngoane adenle ne a.+
24 Bɛbabɔ ɛ nwo bane bɛavi raalɛ sonlatane ne anwo,+Bɛavi adwɔmane raalɛ anloa nu menlemenle ne anwo.+
25 Mmamaa ɛ nye die ye anwofɛlɛko ne anwo wɔ wɔ ahonle nu+Anzɛɛ mmamaa ɔ nye ma ngɛnlɛma ne twehwe wɔ,
26 Ɔluakɛ ɔlua tuutuunli ti, ɔka nrenyia paano kunguma ko,+Yɛɛ awie aye maa sonla minli ye ngoane mɔɔ sonle bolɛ la.
27 Asoo sonla bahola avula samɛnlakɛ agua ɔ kɛnra azo mɔɔ ɔnrɛyela ye tɛladeɛ ne ɔ?+
28 Anzɛɛ asoo sonla bahola atietia samɛnlakɛ zo mɔɔ ɔnrɛyela ɔ gyakɛ ɔ?
29 Zɔhane ala a awie biala mɔɔ nee ɔ gɔnwo aye kɛla la noko de a;Awie biala mɔɔ kɛva ɔ nwo kɛha ye la ɛnrɛva ɔ nwo ɛnrɛli.+
30 Saa ɛhɔne ɛlɛku awule sonlaNa ɔwua debie kɛ ɔdi ɔ ko ayi a, menli ɛmkpɔ ye.
31 Noko, saa bɛkye ye a, ɔbadua ye mɔnwo nsuu;Ɔbava ye sua nu ninyɛne mɔɔ sonle bolɛ la amuala yeamaa.+
32 Awie biala mɔɔ nee raalɛ kɛzɛkye agyalɛ la ɛnlɛ adwenle;*Awie mɔɔ yɛ ɛhye la twehwe ɛzɛkyelɛ maa ɔ nwo.*+
33 Nganlɛ ala a badudu ye na ɔ nyunlu agua aze a,+Na bɛnrɛkyikyi ye anyiemgba ne ɛlɛ.+
34 Ɔluakɛ nungulehwenlɛ maa kunli fa ɛya kpole;Saa ɔlɛdi nzenralɛ a, ɔ kunlu ɛnrɛyelɛyela ye fee.+
35 Ɔnrɛlie mgbɔdalɛ* biala;Saa wɔ ahyɛlɛdeɛ ne le kpole kɛ nzɔne bɔbɔ a, ɔ kunlu ɛnrɛdwo nwolɛ.
Ɔbodwɛkɛ
^ Anzɛɛ “ye ɛkɛla kyi.”
^ Anzɛɛ “mɛla.”
^ Anzɛɛ “ɔbahilehile wɔ.”
^ Anzɛɛ “mɛla.”
^ Anzɛɛ “ɛnze nrɛlɛbɛ.”
^ Anzɛɛ “ye ɛkɛla.”
^ Anzɛɛ “ɛkpɔnedeɛ.”
