Kɔmaa Felepaema 4:1-23
4 Zɔhane ati, me mediema mɔɔ mekulo bɛ na me nwo dɔ bɛ, me anyelielɛ nee me abotile,+ me alɔvolɛ, bɛgyinla kpundii+ kɛ Awulae ɛdoavolɛma.
2 Metu Yiwodea folɛ yɛɛ metu Senteki noko folɛ kɛ bɛnyia adwenle ko ɔlua Awulae ati.+
3 Ɛhɛe, mesɛlɛ ɛdawɔ noko, me gɔnwo mɔɔ me nee wɔ yɛ gyima mɔɔ ɛdi nɔhalɛ la kɛ ɛboa mraalɛ ɛhye mɔ mɔɔ bɛ nee me ɛyɛ gyima ɛsesebɛ yɛbɔ edwɛkpa ne nolo la nee Kelɛmɛnte yɛɛ me gɔnwo mɔ mɔɔ me nee bɛ yɛ gyima mɔɔ ɛha la amuala na bɛ aluma wɔ ngoane buluku ne anu la.+
4 Bɛli fɛlɛko wɔ Awulae anu dahuu. Meka ye bieko, Bɛli fɛlɛko!+
5 Bɛmaa menli kɔsɔɔti ɛnwu kɛ bɛlɛ ndelebɛbo.+ Awulae ɛbikye.
6 Bɛmmadwenledwenle debie biala anwo,+ emomu wɔ debie biala anu bɛlua asɔneyɛlɛ nee modolɛ nee moyɛlɛ zo bɛva bɛ nzɛlɛlɛ bɛdo Nyamenle anyunlu;+
7 na Nyamenle anzodwolɛ ne+ mɔɔ bo ndelebɛbo muala azo la balua Kelaese Gyisɛse anwo zo abɔ bɛ ahonle nee bɛ adwenle nzuzulɛ* nwo bane.+
8 Yemɔti mediema, debie biala mɔɔ le nɔhalɛ, debie biala mɔɔ nwolɛ hyia, debie biala mɔɔ le tenlene, debie biala mɔɔ nwolɛ te, debie biala mɔɔ maa bɛnyia ɛlɔlɛ, debie biala mɔɔ bɛka nwolɛ edwɛkɛ kpalɛ, ɛbɛla kpalɛ biala, nee debie biala mɔɔ ayɛlɛyelɛ wɔ nwolɛ la, bɛhɔ zo bɛzuzu* ninyɛne ɛhye mɔ anwo.+
9 Ninyɛne mɔɔ bɛzukoale na bɛliele bɛdole nu, nee mɔɔ bɛdele na bɛnwunle ye wɔ me nwo la, yemɔ a bɛyɛ a,+ na anzodwolɛ Nyamenle ne nee bɛ badɛnla.
10 Mele Awulae sonvolɛ yemɔti medi fɛlɛko kpole kɛ kɛkala bɛbɔ ɔ bo bɛlɛdwenle me nwo bieko la.+ Ɛnee bɛdwenle me nwo dɛba noko bɛannyia adenle bɛanla ye ali.
11 Tɛ kɛ mewɔ ngyianlɛ nu la ati a melɛka ɛhye a, ɔluakɛ mezukoa kɛ me kunlu kɛdwo me nwo wɔ tɛnlabelɛ biala anu.+
12 Meze kɛzi bɛdi ehyia+ yɛɛ meze kɛzi bɛnyia bɛmaa ɔbo zo la. Wɔ debie biala nee tɛnlabelɛ biala anu, mezukoa debie mɔɔ menli ekyi bie ala a ze la, saa menyia ye medi o, meannyia ye meanli o, saa melɛ dɔɔnwo o, menlɛ bie o, me kunlu dwo me nwo.
13 Melɛ anwosesebɛ wɔ debie biala anu ɔlua ahenle mɔɔ maa me tumi la ati.+
14 Noko akee, bɛyɛle deɛ kɛ bɛboale me wɔ me anwongyelelɛ ne anu a.
15 Nɔhalɛ nu, bɛmɛ Felepaema, bɛze noko kɛ mekɛ mɔɔ bɛlimoale bɛdele edwɛkpa ne na menvile bɛ nwo ɛkɛ ne mengɔle Masidonea la, asafo biala amboa me anzɛɛ anlie moalɛ anvi me ɛkɛ ne kɛ bɛ ngome ala;+
16 ɔluakɛ mekɛ mɔɔ mewɔ Tɛsalonaeka la, bɛnwanle me ninyɛne mɔɔ mehyia nwolɛ la, tɛ kokye ala, emomu fane nwiɔ.
17 Tɛ kɛ asɛɛ mekpondɛ ahyɛlɛdeɛ la ati ɔ, emomu mekpondɛ kɛ bɛyɛ gyima kpalɛ mɔɔ bamaa bɛanyia nvasoɛ dɔɔnwo la.
18 Noko, menyia debie biala mɔɔ mehyia nwolɛ la memaa yebo zo bɔbɔ. Kɛkala mɔɔ me sa ɛha bɛ nwanle ne mɔɔ Ɛpafulodaetɛse+ ɛva ɛrɛlɛ me, afɔlebɔlɛ mɔɔ bɔ evuanlɛ,+ ɔsɔ ɛnyelɛ, na Nyamenle die to nu la, mengyia debie biala bieko.
19 Bɛdabɛ noko, me Nyamenle ne mɔɔ ye anyunlunyia ne le kpole la balua Kelaese Gyisɛse anwo zo amaa bɛ sa aha debie biala mɔɔ bɛhyia nwo la.+
20 Akee anyunlunyia ɛha yɛ Nyamenle nee yɛ Ze ne dahuu. Amen.
21 Mebiza nwuanzanwuanzanli biala mɔɔ wɔ Kelaese Gyisɛse anu la. Mediema mɔɔ nee me wɔ ɛke la biza bɛ.
22 Nwuanzanwuanzama ne mɔ amuala biza bɛ, titili Siza sua nu amra.+
23 Awulae Gyisɛse Kelaese ɛlolɛ kpole ne ɛha sunsum ne mɔɔ bɛda ye ali la.
