KƐZI BAEBOLO NE LE NGAKYILE Ɛ? Mbuluku mɔɔ bɛhɛlɛle bɛ mekɛ ko ne ala anu wɔ tete ne la anu edwɛkɛ ɛnyia. Ɔyɛ se kɛ mbuluku mɔɔ menli ngakyile a hɛlɛle wɔ ɛleka nee mekɛ ngakyile nu la anu edwɛkɛ kɔsɔɔti bayia. Noko, Baebolo ne ka kɛ Kɛlɛvolɛ ko a hɛlɛle mbuluku 66 ne amuala a, na nuhua edwɛkɛ ne kɔsɔɔti yia.​—2 Temɔte 3:16.

NEAZO: Mosisi mɔɔ ɛnee le mboaneneavolɛ wɔ ɛvoya 16 K.Y.M. la, hɛlɛle ye wɔ Baebolo buluku ne mɔɔ lumua la anu kɛ “raalɛ ne ara,” anzɛɛ abozonli bie baralie alesama. Nzinlii, buluku ɛhye hanle kɛ abozonli ne bavi Ebileham, Ayezeke nee Gyekɔbo abo zo amra anu a ara a. (Mɔlebɛbo 3:15; 22:17, 18; 26:24; 28:14) Ɛvolɛ kɛyɛ 500 anzi, ngapezonli Neetan hanle kɛ abozonli ne bavi Devidi dehelɛ abusua ne anu a ara a. (2 Samoɛle 7:12) Yemɔ anzi ɛvolɛ apenle ko, ɛzoanvolɛ Pɔɔlo hilehilele nu kɛ Gyisɛse nee ye ɛdoavolɛ ne mɔ bie a babɔ nu ayɛ abozonli ne a. (Wulomuma 1:1-4; Galeehyeama 3:16, 29) Awieleɛ bɔkɔɔ ne, wɔ ɛvoya ne mɔɔ lumua la awieleɛ, Baebolo buluku mɔɔ li awieleɛ la hanle kɛ abozonli ne anu amra kɔsɔɔti bali Gyisɛse anwo daselɛ wɔ azɛlɛ ye azo, bɛbadwazo bɛ bɛahɔ anwuma na bɛ nee ye ali tumi ɛvolɛ 1,000. Abozonli ɛhye bazɛkye Abɔnsam na yealie alesama ngoane.​—Yekile 12:17; 20:6-10.

MƆƆ MENLI ƐHA YE WƆ BAEBOLO NE ANWO: Mekɛ mɔɔ Louis Gaussen yɛle mbuluku 66 ne mɔɔ ka bɔ nu yɛ Baebolo ne anu neɛnleanu kpalɛ wiele la, ɔhɛlɛle kɛ “koyɛlɛ mɔɔ wɔ buluku ɛhye mɔɔ menli dɔɔnwo a hɛlɛle wɔ ɛvolɛ apenle ko ɛya nnu anu la yɛ azibɛnwo, . . . ɛnee bodane ko a gyi bɛ nyunlu a, na bɛyɛle gyima bɛdwule nwo, ɔnva nwo kɛ ɛnee bɛnde ɔ bo kpalɛ kɛ Nyamenle balua ɔ Ra ne anwo zo yealie alesama ngoane la.”​—Theopneusty—The Plenary Inspiration of the Holy Scriptures.

KƐ WƆ ADWENLE SE WƆ Ɛ? Asoo ɛ nye la kɛ buluku mɔɔ menli kɛyɛ 40 ɛva ɛvolɛ mɔɔ bo 1,500 ɛhɛlɛ la anu edwɛkɛ ne kɔsɔɔti bayia? Anzɛɛ Baebolo ne ala?