Bɛwole me wɔ Santo Domingo, Dominican Republic, medame a mele ngakula nna ne anu ekyi a. Ɛnee me awovolɛ ze nwoma na bɛkulo kɛ bɛtete bɛ mra kpalɛ wɔ ɛleka mɔɔ baboa bɛ la. Ɔhale ɛvolɛ nna na bɛawo me la, me awovolɛ nee Mormon edwɛkpatɛlɛvolɛma lile adwelie. Kɛmɔ me awovolɛ nwunle kɛ mgbavolɛ ne mɔ siezie bɛ nwo kɛnlɛma la ati, me awovolɛ zile kpɔkɛ kɛ yɛ abusua ne bayɛ mbusua mɔɔ lumua wɔ bɔra ne azo mɔɔ bahɔ Church of Jesus Christ of Latter-day Saints, anzɛɛ Mormon Asɔne ne bie la anu ko.

Mekɛ mɔɔ melɛnyi la, me nye liele ninyɛne mɔɔ ɛnee bɛbɔ nu bɛyɛ wɔ Mormon asɔne ne anu nee kɛzi bɛtwe adwenle bɛkɔ abusua asetɛnla nee ɛbɛlabɔlɛ kpalɛ zo la anwo. Ɛnee ɔyɛ me fɛ kɛ mekɔ Mormon la na menvale menziele me nye zo kɛ mebayɛ edwɛkpatɛlɛvolɛ.

Menyianle ɛvolɛ 18 la, me abusua ne dule hɔle United States kɛ bɛmaa meadoa me nwomazukoalɛ ne azo wɔ kɔlegyi. Ɛvolɛ ko anzi, me ante nee me ankle, mɔɔ bɛle Gyihova Alasevolɛ la rakpɔlale yɛ wɔ Florida. Bɛhanle kɛ yɛ nee bɛ ɛhɔ bɛ Baebolo nyianu ne bie. Menwunle kɛ awie biala mɔɔ de ɛkɛ la ɛlɛbuke ngɛlɛlera ne yɛɛ bɛlɛkɛlɛ debie. Yemɔti, menliele pɛne nee kɛlata na membɔle ɔ bo kɛ meyɛ mɔɔ bɛlɛyɛ la bie.

Bɛwiele nyianu ne la, me ante nee me ankle hanle kɛ kɛmɔ mekulo kɛ meyɛ edwɛkpatɛlɛvolɛ la ati, bɛbahola bɛaboa me bɛamaa meazukoa Baebolo ne anwo debie. Ɛnee mesuzu kɛ ɔle adwenle kpalɛ ɔluakɛ zɔhane mekɛ ne ɛnee meze Mormon Buluku ne anu edwɛkɛ dɔɔnwo metɛla Baebolo ne.

Mekɛ biala mɔɔ yɛlɛka Baebolo ne anu edwɛkɛ wɔ moba zo la, me ante nee me ankle ka kile me kɛ menva Baebolo ne anu ngilehilelɛ ne mendo me diedi ne anwo. Ɛnee bɛkpondɛ kɛ medame mumua ne menwu nɔhalɛ ne.

 Ɛnee melie Mormon diedi ne anwo ninyɛne dɔɔnwo medo nu, noko ɛnee menze mɔɔ Ngɛlɛlera ne ka fane nwolɛ la. Me ante vale November 8, 1995, Awake! magazine ne, mɔɔ Gyihova alasevolɛ ɛyɛ, mɔɔ ka Mormon diedi ne anwo edwɛkɛ bie mɔ la nwanle me. Ɔzinle me nwo kɛ ɛnee menze Mormon diedi ne anwo ngilehilelɛ dɔɔnwo. Mɔɔ menwunle ye la manle menyɛle neɛnleanu wɔ Mormon Intanɛte address ɛleka ne kɛ Awake! ne anu edwɛkɛ ne le nɔhalɛ a. Ɛnee ɔle zɔ, na zɔhane edwɛkɛ ne yɛle nɔhalɛ bɔkɔɔ wɔ mekɛ mɔɔ mengɔle Mormon tete ninyɛne ɛzielɛleka ne wɔ Utah la.

Ɛnee dahuu medwenle kɛ Mormon Buluku ne nee Baebolo ne lua adenle ko azo. Noko mekɛ mɔɔ membɔle ɔ bo kɛ mekenga Baebolo ne kpalɛ la, menwunle kɛ Mormon ngilehilelɛ ne nee edwɛkɛ mɔɔ wɔ Baebolo ne anu la ɛnle ko. Kɛ neazo la, wɔ Yizikeɛle 18:4, NW, Baebolo ne ka kɛ ɛkɛla ne wu. Noko akee, Mormon Buluku ne, ka ye wɔ Alma 42:9 kɛ: “Ɛkɛla ne ɛnwu ɛlɛ.”

Ɛye ngilehilelɛ ne mɔɔ le ngakyile la ɛsie ahane a, debie bieko mɔɔ gyegyele me la a le maanlehulolɛ adwenle mɔɔ bɛkilehile wɔ Mormon ne anu la. Kɛ neazo la, Mormon ngilehilelɛ ne kile kɛ ɛnee Yidɛn tola ne wɔ Jackson County, Missouri, U.S.A. Na asɔne ne anu ngapezoma ka kɛ, “Kenle bie Nyamenle Belemgbunlililɛ ne balua United States anwo zo ali tumi wɔ azɛlɛ ye azo.”

Menzuzule kɛzi ngilehilelɛ ne baha maanle mɔɔ mevi nu, anzɛɛ maanle gyɛne bie la anwo. Nɔsolɛ bie mɔɔ Mormon kpavolɛ bie mɔɔ bɛlɛtete ye bɛamaa yeayɛ edwɛkpatɛlɛvolɛ vɛlɛle me wɔ moba zo la, me nee ye lile edwɛkɛ ɛhye anwo adwelie. Membizale ye wienyi kɛ saa maanle mɔɔ ɔwɔ nu nee maanle gyɛne ɛlɛko a ɔbaho yeatia ɔ gɔnwo Mormonma mɔɔ wɔ nu la a. Mekɛ mɔɔ ɔhanle kɛ ɛhɛe la, ɔzinle me nwo! Menzukoale me diedi ne anwo ngilehilelɛ ne mengɔle moa na eza me nee Mormon Asɔne ne anu mgbanyima zuzule nwolɛ. Bɛhanle bɛhilele me kɛ feabo edwɛkɛ dɔɔnwo wɔ me kpuyia ne anwo mualɛ ne anu na kenle ko saa wienyi ne ta kpole a mebade ɔ bo.

Kɛmɔ bɛ ngilehilenu ne bule me abɛ nu la ati, menzuzule me nwo nee adwenle mɔɔ ɔti mekulo kɛ meyɛ Mormon edwɛkpatɛlɛvolɛ la anwo kpalɛ. Menwunle kɛ adwenle ko mɔɔ ɔti mekulo kɛ meyɛ edwɛkpatɛlɛvolɛ la a le kɛ mekulo kɛ meboa awie mɔ. Debie bieko mɔɔ manle me nye liele edwɛkpatɛlɛvolɛ nwo la a le kɛ ɔbamaa menli abu me. Noko wɔ Nyamenle afoa nu, ɛnee menze ɔ nwo ninyɛne dɔɔnwo kpalɛ. Ɔwɔ nuhua kɛ dɛba ne ɛnee mekenga Baebolo ne fane dɔɔnwo ɛdeɛ, noko ɛnee ɔnzonle bolɛ ɔmmaa me. Ɛnee menze bodane mɔɔ Nyamenle lɛ maa alesama nee azɛlɛ ye la.

Ɔlua Baebolo ne mɔɔ me nee Gyihova Alasevolɛ zukoale la azo, menwunle kɛzi bɛfɛlɛ Nyamenle la, mɔɔ ba wɔ ewule nu, yɛɛ gyima mɔɔ Gyisɛse di wɔ Nyamenle bodane ne anu la. Yeangyɛ membɔle ɔ bo kɛ mete buluku nwanwane ɛhye abo, na menvale anyelielɛ menganle nɔhalɛ ne mɔɔ melɛsukoa la anwo edwɛkɛ mengilele awie mɔ. Ɛnee dahuu meze kɛ Nyamenle wɔ ɛkɛ, noko kɛkala mekola metendɛ mekile ye wɔ asɔneyɛlɛ nu kɛ me Gɔnwo kpalɛ. Bɛzɔnenle me kɛ Gyihova Alasevolɛ ne mɔ anu ko wɔ July 12, 2004, na ye siane nsia anzi membɔle ɔ bo kɛ meyɛ Keleseɛne ɛzonlenlɛ gyima ne dahuu.

Menvale ɛvolɛ nnu menyɛle gyima wɔ Gyihova Alasevolɛ ewiade amuala asafo ti wɔ Brooklyn, New York. Ɛnee me nye die kpole kɛ meboa memaa bɛyɛ Baebolo nee mbuluku gyɛne mɔɔ boa menli mgbe dɔɔnwo wɔ ewiade ye la, na melɛkɔ zo meaboa awie mɔ meamaa bɛazukoa Nyamenle anwo debie.