Ɛyɛ asɔne dahuu ɔ? Menli dɔɔnwo yɛ asɔne, bɔbɔ menli mɔɔ ɛnze Nyamenle la. Na duzu ati a menli yɛ asɔne a? Kɛmɔ neɛnleanu bie mɔɔ bɛyɛle ye wɔ France kile la, menli mɔɔ wɔ France la anu foa ko yɛ asɔne anzɛɛ ɔyɛ a bɛdwenledwenle edwɛkɛ nwo “kɛ bɛ nwo badɔ bɛ ala.” Kɛmɔ ɔde wɔ menli dɔɔnwo mɔɔ wɔ Europe anwo la, tɛ ɛzonlenlɛ nwo edwɛkɛ a maa bɛyɛ asɔne a. Emomu, bɛkpondɛ “anwodɔlɛ mɔɔ wɔ asɔneyɛlɛ nu la.” Noko akee, diedima bie mɔ kɔ Nyamenle ɛkɛ wɔ mekɛ mɔɔ bɛhyia ala, na bɛfa bɛ nye bɛto kɛ bɛbanyia bɛ modolɛ ne anwo mualɛ ndɛndɛ.—Ayezaya 26:16.

Na ɛdawɔ noko ɛ? Ɛnea a asɔneyɛlɛ le adenle mɔɔ ɛdua zo ɛdwenle kpalɛ ala ɔ? Saa ɛdie Nyamenle ɛdi a, ɛnwu kɛ asɔneyɛlɛ boa wɔ ɔ? Anzɛɛ ɛte nganeɛ kɛ bɛmbua wɔ asɔneyɛlɛ ɔ? Baebolo ne bahola aboa wɔ yeamaa wɔabu asɔneyɛlɛ kɛ, ɔnle ayile mɔɔ maa bɛ nwo tɔ bɛ ala, emomu, ɔle adenle mɔɔ sonle bolɛ mɔɔ bɛdua zo bɛbikye Nyamenle a.