Saa ɛtie ewiade edwɛkɛ a, bie a wɔnwu kɛ ɔyɛ a bɛyɛ ninyɛndane wɔ asɔne duma nu. Tɛ asɔne kɔsɔɔti a vi nɔhalɛ Nyamenle ne ɛkɛ a. (Mateyu 7:15) Nɔhalɛ nu, bɛbɛlɛbɛla alesama dɔɔnwo.​—Kenga 1 Dwɔn 5:19.

Noko, Nyamenle nwu ahonlekpalɛma mɔɔ kulo debie kpalɛ nee nɔhalɛ la. (Dwɔn 4:23) Nyamenle ɛlɛto ɛsalɛ avɛlɛ menli zɛhae kɛ bɛzukoa ye Edwɛkɛ, Baebolo ne anu nɔhalɛ ne.​—Kenga 1 Temɔte 2:3-5.

Gyihova Nyamenle ɛlɛka menli mɔɔ wɔ asɔne ngakyile nu la abɔ nu ɔlua nɔhalɛ ne mɔɔ ɔlɛkilehile bɛ na yeamaa bɛahulo bɛ nwo la azo. (Maeka 4:2, 3) Ɛhye ati, ɛbahola wɔanwu menli mɔɔ wɔ nɔhalɛ ɛzonlenlɛ nu la ɔlua kɛzi bɛkulo bɛ nwo la azo.​—Kenga Dwɔn 13:35.

Nɔhalɛ azonvolɛ diedi nee bɛ ɛbɛlabɔlɛ gyi Baebolo ne azo. (2 Temɔte 3:16) Eza bɛdi Nyamenle duma ne eni. (Edwɛndolɛ 83:18) Yɛɛ bɛka Nyamenle Belemgbunlililɛ ne anwo edwɛkɛ kɛ alesama anyelazo kokye. (Daneɛle 2:44) Bɛsukoa Gyisɛse na bɛmaa bɛ ‘kɛnlaneɛ ta’ ɔlua kpalɛ mɔɔ bɛyɛ bɛmaa bɛ gɔnwo mɔ la azo. (Mateyu 5:16) Ɛhye ati, bɛkola bɛdua bɛ gɔnwo mɔ azua nu mɔɔ bɛkɔ na bɛka Nyamenle Belemgbunlililɛ ne anwo edwɛkpa ne bɛkile bɛ la azo bɛnwu nɔhalɛ Keleseɛnema.​—Kenga Mateyu 24:14; Gyima ne 5:42; 20:20.