Bɛha tete selɛ Dwobu anwo edwɛkɛ kɛ ɔ nwo “ɛnlɛ dɛne biala yɛɛ ɔle sonla fɔɔnwo.” (Dwobu 1:1) Bɛvɛlɛle Lɔɔto kɛ ɔle “sonlakpalɛ.” (2 Pita 2:8) Bɛha Devidi anwo edwɛkɛ kɛ ɔyɛ “mɔɔ sɔ” Nyamenle anye. (1 Arelemgbunli 14:8) Noko akee, bɛmaa yɛzuzu Baebolo nu menli ɛhye mɔ anwo. Yɛbanwu kɛ (1) bɛyɛle ɛtane, (2) yɛbahola yɛazukoa debie yɛavi bɛ neazo ne anu, yɛɛ (3) alesama mɔɔ ɛnli munli la bahola azɔ Nyamenle anye.

Dwobu yiale ngyegyelɛ dɔɔnwo mɔɔ ɛnle kpalɛ a. Ɔnyianle adwenle mɔɔ ɛndenrɛ, na ɔhanle kɛ saa ɔnyianle Nyamenle anu diedi anzɛɛ yeannyia bɔbɔ a tɛ Ye edwɛkɛ ɔ. (Dwobu 9:20-22) Ɛnee Dwobu bu ɔ nwo tenlene somaa, yemɔti wɔ menli nye zo ɛnee ɔlɛkile kɛ ɔle tenlene ɔtɛla Nyamenle.—Dwobu 32:1, 2; 35:1, 2.

Lɔɔto hwehwenle ɔ bo aze kɛ ɔbazi kpɔkɛ kpalɛ. Menli mɔɔ wɔ Sodɔm nee Gomɔla la ɛbɛlatane  ne gyegyele ye kpalɛ, ‘ye ɛbolɛ te’ bɔbɔ wɔ bɛ ninyɛndane ne anwo. (2 Pita 2:8) Nyamenle hanle kɛ ɔsɛkye ɛtanevolɛma mɔɔ wɔ sua ne azo la, na ɔmaanle Lɔɔto nee ye abusua ne nyianle adenle mɔɔ bamaa bɛanyia ngoane a. Bie a ɛbadwenle kɛ Lɔɔto mɔɔ ninyɛne ɛhye mɔ gyegye ye la a balimoa avi ɛkɛ a. Noko wɔ mekɛ ɛhye mɔɔ hyia la anu, ɔhwehwenle ɔ bo aze. Anwumabɔvolɛma mɔɔ bɛzoanle bɛ la zɔle ye nee ye abusua ne asa hɔle suakpole ne kandiba amaa bɛanyia ngoane.—Mɔlebɛbo 19:15, 16.

Mekɛ bie Devidi angola ɔ nwo sɔ na ɔ nee nrenyia gyɛne aye zɛkyele agyalɛ. Mɔɔ ɛnle kpalɛ fee la, Devidi maanle bɛhunle raalɛ ne ahu amaa bɛannwu mɔɔ yeyɛ la. (2 Samoɛle, tile 11) Baebolo ne se, “[Gyihova] akunlu andwo nyɛleɛ” ne mɔɔ Devidi yɛle la anwo.—2 Samoɛle 11:27.

Dwobu, Lɔɔto nee Devidi yɛle ɛtane, bie mɔ ɛdeɛ ne le ɛtane kpole. Noko kɛmɔ yɛbanwu ye la, bɛvile bɛ ahonle nu bɛyɛle tieyɛ na bɛzonlenle Nyamenle. Bɛvile bɛ ɛhulolɛ nu bɛmaanle ɔlale ali kɛ bɛanyɛ ye boɛ na bɛyɛle nzenzaleɛ mɔɔ hyia la. Ɛhye ati, Nyamenle maanle bɛnyianle ɔ nyunlu ɛlolɛ, na Baebolo ne ka bɛ nwo edwɛkɛ kɛ bɛle nɔhavoma.

Yɛnli munli, yemɔti yɛkola yɛyɛ ɛtane. (Wulomuma 3:23) Noko saa yɛfo a, ɔwɔ kɛ yɛmaa ɔda ali kɛ yɛanyɛ ye boɛ na yɛbɔ mɔdenle yɛyɛ mɔɔ tenrɛ.

Kɛzi Dwobu, Lɔɔto nee Devidi bɔle mɔdenle yɛle mɔɔ tenrɛ la ɛ? Nɔhalɛ nu, ɛnee Dwobu di  nɔhalɛ. Mɔɔ Nyamenle nee Dwobu zuzule ninyɛne nwo la, ɔhakyile ye adwenle na ɔnlunle ɔ nwo wɔ mɔɔ ɔhanle la anwo. (Dwobu 42:6) Kɛzi Lɔɔto bu menli mɔɔ wɔ Sodɔm nee Gomɔla ɛbɛlatane ne la nee Nyamenle ngyinlazo yia bɔkɔɔ. Ye debie mɔɔ yeanyɛ ye ndɛndɛ la a ɛnee le ngyegyelɛ a. Awieleɛ kolaa ne, ɔvile sua ne mɔɔ bɛlɛba bɛazɛkye ye la azo na Nyamenle ndeanlɛ ne ammaa ɔ nwo zo. Ɔyɛle tieyɛ mɔɔ yeannea ninyɛne mɔɔ yegyakyi bɛ wɔ ɔ nzi la. Devidi yɛle ɛtane kpole kɛ yeanli Nyamenle mɛla ne azo la ɛdeɛ, noko ɔvile ahonle nu ɔnlunle ɔ nwo na ɔzɛlɛle kɛ Gyihova ɛnwu ye anwunvɔne.—Edwɛndolɛ 51.

Adwenle kpalɛ mɔɔ Nyamenle lɛ ye wɔ menli ɛhye mɔ anwo la nee mɔɔ ɔkulo kɛ alesama mɔɔ ɛnli munli yɛ la le ko. Nyamenle ze “kɛ yɛsi yɛde la; ɔkakye kɛ yɛle ndɛtɛlɛ ala.” (Edwɛndolɛ 103:14) Yemɔti, saa Nyamenle ze kɛ yɛbahola yɛayɛ ɛtane a, ɛnee duzu a ɔkulo kɛ yɛyɛ a?

Folɛ mɔɔ Devidi dule ɔ ra Sɔlɔmɔn la maa yɛnwu debie titili mɔɔ yɛyɛ a yɛbazɔ Nyamenle anye la. “Me ra, mese wɔ kɛ, die ɛ ze Nyamenle ne to nu na fa wɔ ahonle muala nee adwenle mɔɔ di munli la sonle ye.” (1 Edwɛkɛsisilɛ 28:9) Ahonle muala a le duzu? Yemɔ a le ahonle mɔɔ kulo Nyamenle na ɔkulo kɛ ɔnwu ye na ɔyɛ ye ɛhulolɛdeɛ la. Tɛ ahonle mɔɔ di munli la ɔ, emomu ahonle mɔɔ kulo kɛ fa tieyɛ sonle Nyamenle na ɔkulo kɛ bɛtenrɛ ye la. Nyamenle anwo ɛlɔlɛ nee ɛhulolɛ mɔɔ bɛlɛ kɛ bɛyɛ tieyɛ la a maanle Nyamenle bule Dwobu kɛ ɔ nwo “ɛnlɛ dɛne biala,” Lɔɔto kɛ ɔle “sonlakpalɛ,” yɛɛ Devidi kɛ ɔyɛ “mɔɔ sɔ” Nyamenle anye la a. Bɛyɛle ɛtane ɛdeɛ, noko bɛholale bɛzɔle Nyamenle anye.

Saa yɛlɛ nzuzulɛ ɛtane mɔɔ yɛ kunlu anu a anrɛɛ yeamba yɛ adwenle nu, anzɛɛ yɛka edwɛkɛ mɔɔ yɛ anyiemgba, anzɛɛ yɛyɛ debie na nzinlii yɛnwu kɛ ɔnle kpalɛ a, bɛmaa yɛhakye neazo ne mɔɔ yɛzuzu nwolɛ la. Nyamenle ze kɛ tɛ mekɛ ɛhye anu a yɛbali munli a. Noko, ɔkulo kɛ yɛkulo ye na yɛbɔ mɔdenle yɛyɛ tieyɛ. Saa yɛfi ahonle muala anu yɛyɛ ɛhye a, yɛbahola yɛnyia anwodozo kɛ yɛbazɔ Nyamenle anye.