FƆLƐBUALƐ le kɛ adesoa mɔɔ yɛ ɛlomboɛ. Belemgbunli Devidi hɛlɛle kɛ: “Me amumuyɛ ɛbo me nwo zo, bɛ ɛnlomboɛ ɛyɛ adesoa ɛbo me nwo zo.” (Edwɛndolɛ 38:4) Kilisienema bie mɔ asa nu ɛdo ɔlua nyanelilɛ ti na bɛnyia adwenle kɛ Gyihova ɛnrɛva bɛ ɛtane ɛnrɛhyɛ bɛ ɛlɛ. (2 Kɔlentema 2:7) Asoo adwenle ɛhye tenrɛ? Saa wɔyɛ ɛtane kpole bɔbɔ a, asoo ɛ nee Gyihova avinli ɛhwe mɔɔ ɔnrɛhola ɔnrɛva wɔ ɛtane ɔnrɛhyɛ wɔ ɛlɛ ɔ? Kyɛkyɛ!

Gyihova ɛmkpo bɛdabɛ mɔɔ bɛnu bɛ nwo la. Nɔhalɛ nu, ɔtwe ɔbikye bɛ! Wɔ ndonwo ne mɔɔ fane kakula ɛkobɔfo ne anwo la anu, Gyisɛse vale Gyihova dole selɛ kulovolɛ bie mɔɔ ɔ ra nrenyia kpole ye abusua ne na ɔhɔbɔle ɛbɛla mgbane mgbane la anwo. Nzinlii, kakula ne zile kpɔkɛ kɛ ɔsia yeara sua nu. “Mɔɔ ɔkpukele moa moa lɔ mɔɔ ɔlɛba la ɔ ze nwunle ye, alɔbɔlɛ hunle ye kpole, na ɔnriandile ɔhɔyiale ye, ɔbɛkale ye, na ɔvole ɔ nloa anwo.” (Luku 15:11-20) Ɛkulo kɛ ɛtwe ɛbikye Gyihova noko ɛte nganeɛ kɛ ɛwɔ “moa moa” ɔ? Kɛmɔ selɛ ne mɔɔ wɔ Gyisɛse ndonwo ne anu yɛle la, Gyihova baze wɔ anwunvɔne. Yeziezie ɔ nwo kɛ ɔbalie wɔ gyɛlɛɛnye.

Na saa ɛte nganeɛ kɛ wɔ ɛtane ne le kpole anzɛɛ ɔzonle mɔɔ Gyihova ɛnrɛva ɛnrɛhyɛ wɔ ɛ? Yɛsɛlɛ wɔ dwenle Gyihova ɛsalɛdolɛ ne mɔɔ wɔ Ayezaya 1:18 la anwo. Ɔse: “Bɛrɛla bɛmaa [yɛziezie] yɛ avinli, bɛ ɛtane ne mɔ ɛla zo kɛ ɛbenle bɔbɔ ɛdeɛ, noko bɛbayɛ fufule kɛ ezukɔtweaba.” Ɛtane bɔbɔ mɔɔ le kɛ debie mɔɔ ɛha ɛdanlɛ fufule nu mɔɔ bɛkyikyi a ɔngɔ la ɛmbo Gyihova anwo zo kɛ ɔbava yeahyɛ.

Gyihova ɛngulo kɛ wɔ adwenle kɔ zo bua wɔ fɔlɛ. Yemɔti, kɛ ɔkɛyɛ na wɔanyia Nyamenle ɛtane fakyɛ nee adwenle mɔɔ anu te la ɛ? Suzu ninyɛne nwiɔ mɔɔ Belemgbunli Devidi yɛle la anwo. Mɔɔ limoa, ɔhanle kɛ: “Meka me mɛladonlɛ meahile [Gyihova].” (Edwɛndolɛ 32:5) Kakye kɛ Gyihova ɛlimoa ɛdo ɔ sa ɛvɛlɛ wɔ kɛ ɛbikye ye wɔ asɔneyɛlɛ nu na ɛ nee ye ‘ɛziezie bɛ avinli.’ Die ɛsalɛdolɛ ne to nu. Ka wɔ ɛtane ne kile Gyihova, na da wɔ nganeɛdelɛ ne ali. Devidi vale anwodozo zɛlɛle kɛ: “Te me nwo fi me ɛtane ne anwo. . . . O Nyamenle, ɛmkpo ahonle mɔɔ le bɛlɛvo na yenlu ɔ nwo la.”​—Edwɛndolɛ 51:2, 17.

Bieko, Devidi nyianle moalɛ vile Nyamenle ngapezonli Neetan ɛkɛ. (2 Samoɛle 12:13) Ɛnɛ, Gyihova ɛmaa yɛ asafo nu mgbanyima mɔɔ bɛtete bɛ la kɛ bɛboa menli mɔɔ bɛnlu bɛ nwo  la amaa bɛ nee Gyihova anyia agɔnwolɛvalɛ bieko. Saa ɛtwe ɛbikye mgbanyima ne mɔ a, bɛbava Ngɛlɛlera ne bɛaboa wɔ na bɛ nee wɔ ayɛ nzɛlɛlɛ mɔɔ bamaa wɔ ahonle adɔ wɔ azule nu, na yeamaa wɔ adwenle nu ade. Ɛhye bamaa wɔade kpɔkɛ wɔ sunsum nu.​—Gyemise 5:14-16.

Ɔle nɔhalɛ kɛ wɔ ɛtane mɔɔ ɛka wɔahile Gyihova Nyamenle nee mgbanyima ne mɔ mɔɔ ɛbikye bɛ la ɛnla aze. Ɛnee kɛ Devidi te nganeɛ la ɛne. Mɔlebɛbo ne, ‘yeanga ye ɛtane’ ne. (Edwɛndolɛ 32:3) Noko, nzinlii mɔɔ ɔhanle ye ɛtane ne na bɛdenrɛle ye la, ɔnyianle nvasoɛ.

Devidi anye liele bieko. Ɔhɛlɛle kɛ: “Nyilalɛ ɛha sonla ne mɔɔ bɛva ye mɛladonlɛ bɛhyɛ ye, na bɛva ye ɛtane bɛhyɛ ye la.” (Edwɛndolɛ 32:1) Eza ɔyɛle nzɛlɛlɛ kɛ: ‘O Gyihova, buke me nloa, na mebaye wɔ ayɛlɛ.’ (Edwɛndolɛ 51:15) Devidi adwenle ambua ye fɔlɛ bieko, ɔhilele Nyamenle ɛtane fakyɛ ne anwo anyezɔlɛ na ɔhanle Gyihova anwo edwɛkɛ ɔhilele menli gyɛne.

Gyihova kpondɛ kɛ ɛnyia adwenle mɔɔ anu te. Gyihova kulo kɛ ɛka ɔ nwo edwɛkɛ nee mɔɔ ɔbayɛ la ɛkile awie mɔ mɔɔ wɔ adwenle ɛmbua wɔ fɔlɛ a. (Edwɛndolɛ 65:1-4) Kakye kɛ Gyihova se ‘ɔbava bɛ ɛtane ne mɔ amuala yeahyɛ bɛ, na yeamaa bɛ Sunsum nu anwosesebɛ.’​—Gyima ne 3:19, 20.

Ɛhye bie a dole Martha a. Ɔka kɛ: “Me ra nrenyia ne vale Ɛzinzalɛ Arane nee Awake! magazine rɛlɛle me dahuu. Ngyikyi ngyikyi me nee Gyihova nyianle agɔnwolɛvalɛ bieko. Mɔɔ ɛnee ɔyɛ se ɔmaa me la a le kɛ mebazɛlɛ mɔɔ meyɛ la anwo ɛtane fakyɛ. Noko membɔle mɔdenle menyɛle asɔne kɛ Nyamenle ɛva me ɛtane ɛhyɛ me. Ɔyɛ azibɛnwo kɛ ɔlile ɛvolɛ 40 kolaa na meazonle Gyihova bieko la. Me anwubielɛ ne kile kɛ saa awie twe ɔ nwo na ɔkyɛ bɔbɔ a ɔbahola yeanyia adenle yeazonle Nyamenle bieko na yeadɛnla ye ɛlɔlɛ ne anu.”