БЕРӔ динти, зӕгъӕн, Ромаг католикон аргъауӕни, провославон аргъауӕнти, буддизми ӕма иннӕ динти разамонгутӕн ӕма саугинтӕн уосӕ коруни барӕ нӕййес. Фал беретӕ еци ӕгъдауи фуд кӕнунцӕ, фӕстаг рӕстӕг аллихузи динти косгутӕн, ци ихӕлд гъуддӕгтӕ рагъӕр ӕнцӕ, уони.

Уомӕ гӕсгӕ ӕвзуруй фарста: ӕцӕгӕйдӕр дини разамонгутӕн Библимӕ гӕсгӕ уосӕ коруни барӕ нӕййес? Ӕркӕсӕн, аци ӕгъдау куд ӕма кӕд фӕззиндтӕй, удта имӕ Хуцау ци цӕстӕй кӕсуй, уомӕ.

2006 анзи католикти хестӕр саугин Бенедикт Ӕхсӕрдӕсӕймаг ӕ радзубандий ромаг курий рази загъта, зӕгъгӕ, киристон дини разамонгутӕн уосӕ коруни барӕ ке нӕййес, е баст ӕй, апостолти мӕлӕтӕй минкъий фӕстӕдӕр ци ӕгъдау фӕззиндтӕй, уой хӕццӕ.

Фал фиццаг ӕноси киристӕнттӕ, уосӕ ке нӕ кордзӕнцӕ, уӕхӕн дзурд некӕд лӕвардтонцӕ. Апостол Павел фиццаг ӕноси цардӕй ӕма киристӕнтти фӕдзахста, цӕмӕй сӕхе хизтайуонцӕ, «пахампар дзурдтӕй» сӕ ка сайуй ӕма «бийнонтӕ кӕнун» ка нӕ уадзуй, уӕхӕн адӕнӕй (1 Тимофеймӕ 4:1–3).

Дини разамонгутӕн уосӕ коруни барӕ ке нӕййес, еци ӕгъдау фӕззиндтӕй 2-аг ӕноси, фӕстӕдӕр Ромаг католикон аргъауӕн кӕмӕй равзурдӕй, еци «киристон» аргъауӕнти. Еу киунуги куд финст ӕй, уомӕ гӕсгӕ е дессаг нӕй, уомӕн ӕма бауӕри монцтӕбӕл хуӕцун Роми паддзахади беретӕ хуарздзийнадӕбӕл нимайун райдӕдтонцӕ (Celibacy and Religious Traditions).

Фӕстӕдӕр ӕности дӕргъи киристон аргъауӕни сӕугинтӕ ӕма аргъауӕни сӕйраг разамонгутӕ архайдтонцӕ уӕхӕн ӕгъдау ӕрфедар кӕнунбӕл, цӕмӕй дини разамонгутӕ уоститӕ ма курдтайуонцӕ. Сӕ гъудимӕ гӕсгӕ еске хӕццӕ ӕмуат ӕрцӕун цъумур гъуддаг адтӕй, саугинтӕн ба сӕ ихӕстӕмӕ гӕсгӕ сӕхе цъумур кӕнуни барӕ н’ адтӕй.  Фал еу энциклопедий финст ӕй: «Дӕсӕймаг ӕноси саугинтӕй беретӕн, удта сауӕнгӕ еуӕй-еу епископтӕн дӕр уоститӕ адтӕй» (Encyclopӕdia Britannica).

Киристон дини разамонгутӕн уосӕ коруни барӕ ке нӕййес, еци ӕгъдау ӕрфедар кодтонцӕ, 1123 анзи ӕма 1139 анзи Роми латерайнаг аргъауӕни разамонгутӕн ци ӕмбурдтӕ адтӕй, уонӕми. Ӕма Ромаг католикон аргъауӕн абони дӕр еци ӕгъдаубӕл хуӕст ӕй. Саугинтӕн уосӕ коруни барӕ ке нӕбал адтӕй, уой фӕрци аргъауӕнӕн ӕ бартӕ фулдӕрӕй-фулдӕр кодтонцӕ, удта ӕ есбонӕн дӕр фесӕфунӕй тӕссаг нӕбал адтӕй, уомӕн ӕма саугинтӕн неке адтӕй, сӕ есбон кӕмӕн ниууагътайуонцӕ, уӕхӕн.

Киристон дини разамонгутӕн уосӕ коруни барӕ ес ӕви нӕ, уомӕ Хуцау ци цӕстӕй кӕсуй, уой базонӕн ес Библийӕй. Киристе уотӕ дзурдта, зӕгъгӕ, ес уӕхӕнттӕ ӕма «уӕларвон паддзахади туххӕй» уосӕ нӕ ракурдтонцӕ (Матфеййи 19:12). Апостол Павел дӕр дзурдта, уой хузӕн бийнонтӕ ка не ’скодта, еци киристӕнтти туххӕй (1 Коринфӕгтӕмӕ 7:37, 38; 9:23).

Фал нӕдӕр Йесо, нӕдӕр Павел уотӕ некӕд дзурдтонцӕ, ӕма Хуцауи лӕггадгӕнгутӕн уосӕ коруни барӕ нӕййес. Йесо загъта, бийнонтӕ ма кӕнун алке бон ке нӕй. Павел «ӕнӕцуд кизгуттӕ ӕма ӕнӕуосӕ лӕхъуӕнти» кой ку искодта, уӕд уой фӕсте ӕргом загъта: «Хецау неци бафӕдзахста, фал син ӕз зӕгъун мӕ гъуди» (Матфеййи 19:11; 1 Коринфӕгтӕмӕ 7:25).

Уомӕй уӕлдай Библийӕй нӕ бон ӕй базонун, фиццаг ӕноси апостол Петурӕн, удта ма киристӕнттӕй беретӕн уоститӕ ке адтӕй (Матфеййи 8:14; Марки 1:29–31; 1 Коринфӕгтӕмӕ 9:5). Еци рӕстӕг Роми паддзахади ӕнӕгъдаудзийнадӕ хъӕбӕр парахат ке адтӕй, уомӕ гӕсгӕ Павел ниффинста, зӕгъгӕ, киристон цӕстӕдарӕгӕн гъӕуама «еу уосӕй ӕндӕр ма уа», удта имӕ гъӕуама «ӕ сувӕллӕнттӕ игъосонцӕ» (1 Тимофеймӕ 3:2, 4).

Уотӕ зӕгъӕн дӕр нӕййес, ӕма син уоститӕ адтӕй, фал лӕг ӕма уоси цард ба нӕ кодтонцӕ. Библи ӕргом зӕгъуй: «Лӕг ӕнхӕст кӕнӕд, ӕ уоси рази ибӕл ци ихӕс ес, уой... Еци гъуддаги уӕ кӕрӕдземӕн „нӕ“ ма дзоретӕ» (1 Коринфӕгтӕмӕ 7:3–5). Бӕрӕг ӕй, Хуцау киристон дини разамонгутӕй, удта иннӕ киристӕнттӕй уой ке нӕ агоруй, цӕмӕй уоститӕ ма коронцӕ.

Кӕд бийнонтӕ искӕнуни барӕ алкӕмӕндӕр ес, уӕд Йесо ӕма Павел бийнонтӕ ма искӕнун хуарз гъуддагбӕл цӕмӕн нимадтонцӕ? Уомӕн ӕма адӕймаг еунӕг ку уа, уӕд ин фулдӕр фадуӕттӕ уодзӕй иннетӕн хуарз хабар игъосун кӕнунмӕ. Уӕхӕнттӕн сӕ бон фулдӕр ӕй кӕнун, уомӕн ӕма бийнонтӕ кӕмӕн ес, етӕ цӕбӕл фӕммӕтӕ кӕнунцӕ, уобӕл мӕтӕ кӕнун сӕ нӕ гъӕуй (1 Коринфӕгтӕмӕ 7:32–35).

Ӕркӕсӕн Дэвиди хабармӕ. Дэвид Мехикой ӕ хуарз куст ниууагъта ӕма рандӕ ’й Коста-Рикӕмӕ, цӕмӕй уоми гъӕути адӕнӕн Библий хуарз хабар игъосун кодтайдӕ. Цума ин бийнонтӕ ке н’ адтӕй, е ин ести пайда фӕцӕй? «Дзубанди дӕр ибӕл нӕййес,– зӕгъуй Дэвид.– Нӕуӕг ӕгъдӕуттӕбӕл ӕма нӕуӕг уавӕртӕбӕл исахур ун зин ӕй. Фал мӕ мӕхецӕй ӕндӕр тухсун некӕбӕл гъудӕй, ӕма мин уомӕ гӕсгӕ ӕнцондӕр адтӕй».

Еу ӕнӕцуд киристон силгоймаг Клаудийӕ рандӕ ’й, хуарз хабар игъосунгӕнгутӕ кӕми нӕ фагӕ кӕнуй, уӕхӕн рауӕнмӕ. «Хуцауӕн ке лӕггадӕ кӕнун, е мин устур цийнӕдзийнадӕ хӕссуй. Ме ’ууӕндундзийнадӕ бафедар ӕй, удта Хуцаумӕ бахӕстӕгдӕр дӕн, уомӕн ӕма ’й уинун, куд мӕбӕл тухсуй, уой»,– зӕгъуй Клаудийӕ.

Мадта адӕймагӕн цардӕмбал ку нӕ уа, уӕд е уобӕл дзорӕг нӕй, ӕма ӕ зӕрдӕ нецӕмӕй рохс кӕндзӕй. Клаудийӕ ма никкидӕр загъта: «Уӕлдай нӕй, бийнонтӕ дин ес ӕви нӕ. Хуӕздӕрӕй дӕмӕ ци ес, уой Хуцауӕн ку дӕттай, уӕд уодзӕнӕ амондгун» (Псалом 119:1, 2).