4 СӔР
Хуцау Авраами хӕццӕ искодта бадзурд
Авраам ӕууӕндтӕй Хуцаубӕл, ӕма ин Йеговӕ зӕрдӕ байвардта, арфӕ ин ке кӕндзӕй ӕма ин ӕ байзӕддӕгтӕ ке исберӕ кӕндзӕй
ДОНИ хъиамӕтбӕл рацудӕй еу-350 анзи. Авраам цардӕй гъӕздуг горӕт Ури (абони еци зӕнхитӕ хаунцӕ Иракмӕ). Авраам Хуцаубӕл федарӕй ӕууӕндтӕй. Фал фӕстӕдӕр е ’ууӕндундзийнадӕ фӕлвӕрд ӕрцудӕй.
Йеговӕ Авраамӕн загъта, цӕмӕй ӕ райгурӕн бӕстӕ ниууадза ӕма идард надбӕл, ӕнӕзонгӕ бӕстӕ Ханаанмӕ рандӕ уа. Авраам ӕнӕфӕстӕмӕ фӕккӕсгӕй рацудӕй. Ӕ хӕццӕ райста ӕ уосӕ Сарри, е ’нсувӕри биццеуи Лоти, ӕ лӕггадгӕнгути ӕма имӕ цидӕриддӕр фонс адтӕй, уой, ӕма уотемӕй рацудӕнцӕ идард надбӕл Ханаанмӕ. Ханаани ба цардӕнцӕ цатурти. Йеговӕ Авраамӕн зӕрдӕ байвардта, ӕ байзӕддӕгтӕй устур адӕм ке искӕндзӕй ӕма зӕнхӕбӕл еугур адӕм дӕр уой фӕрци арфӕгонд ке ӕрцӕудзӕнцӕ ӕма ӕ байзӕддӕгтӕн Ханаани зӕнхӕ ке ратдзӕй.
Авраам ӕма Лотӕн сӕ фонс фулдӕрӕй-фулдӕр кодтонцӕ, ӕма уӕд Авраам Лотӕн загъта, цӕмӕй ӕхецӕн равзурстайдӕ, кӕци зӕнхитӕ ’й гъӕунцӕ, уони. Лот равзурста, Иордани цӕугӕдонмӕ хӕстӕг ка адтӕй, еци зӕнхитӕ ӕма Содомӕй минкъий идарддӕр ӕрцардӕй. Содоми ка цардӕй, еци адӕм ба хъӕбӕр ихӕлд адтӕнцӕ ӕма Хуцауи рази хъӕбӕр устур тӕрегъӕдтӕ кодтонцӕ.
Фӕстӕдӕр Йеговӕ Авраамӕн зӕрдӕ байвардта ӕ байзӕддӕгтӕ ке исберӕ уодзӕнцӕ, арвбӕл стъалутӕ куд берӕ ’нцӕ, уотӕ. Авраам еци зӕрдӕвӕрдбӕл федарӕй ӕууӕндтӕй, фал ӕ уосӕ Саррӕн сувӕллӕнттӕ не ’нтӕстӕй. Авраамбӕл 99 анзи ку цудӕй, Саррӕбӕл ба 90, уӕд Йеговӕ Авраамӕн загъта, фурт син ке райгурдзӕй. Хуцауи дзурд исӕнхӕст ӕй, ӕма Саррӕн райгурдӕй Исак. Исакки фӕрци Йеговӕ гъӕуама исӕнхӕст кодтайдӕ, Едеми зӕрдӕ цӕмӕй байвардта, уой.
Уӕдмӕти Лот ӕ бийнонти хӕццӕ цӕрун райдӕдта Содоми, фал растгӕнӕг Лот еци горӕти ихӕлд цӕргути хузӕн не ’ссӕй. Йеговӕ Содом фесафун ку исфӕндӕ кодта, уӕд изӕдти рарвиста, цӕмӕй еци хабар Лотӕн фегъосун кодтайуонцӕ. Етӕ ин загътонцӕ, цӕмӕй фӕттагъддӕр кодтайдӕ ӕма ӕ бийнонти хӕццӕ горӕтӕй ралигъдайдӕ, удта ма ин ниффӕдзахстонцӕ, цӕмӕй си фӕстӕмӕ маке ракастайдӕ. Уой фӕсте Йеговӕ Содомбӕл ӕма ӕ фарсмӕ ци горӕт адтӕй, Гоморрӕ, зӕгъгӕ, уобӕл дӕр содзгӕ сондони уарун ӕркалдта. Лот ӕма ӕ дууӕ кизги фӕййервазтӕнцӕ. Фал ӕ уоси зӕрдӕ ба, ӕвӕдзи, Содоми ци ниууагътонцӕ, уонӕмӕ дзурдта, ӕма фӕстӕмӕ ракастӕй. Хуцаумӕ ке нӕ байгъуста, уой туххӕй ӕ цард фесафта.
