КАНАДӔЙЫ иу Йегъовӕйы Ӕвдисӕн, Дон, зӕгъгӕ, фӕхъусын кӕны, уынджы чи цӕры, ахӕм адӕмӕн. Уыдонӕй иуы тыххӕй Дон мӕнӕ цы радзырдта: «Ӕнӕхӕдзар адӕмӕй кӕй федтон, уыдонӕй Питеры хуызӕн чъизи бирӕ нӕ уыд. Йӕхи-иу афтӕ дардта, ӕмӕ йӕм адӕм хӕстӕг бацӕуын дӕр нӕ уӕндыдысты. Хорздзинад аразынмӕ йын бирӕтӕ хъавыдысты, фӕлӕ никӕмӕй ницы куымдта». Фӕлӕ уӕддӕр Дон, гӕнӕн ӕмӕ амалӕй, 14 азӕй фылдӕр фӕразонӕй ӕххуыс кодта ацы ӕнӕхӕдзар адӕймагӕн.

Иу бон Питер Доны бафарста: «Цӕмӕн мӕм цӕуыс? Иннӕтӕ мӕ мӕхи бар куы ныууагътой, уӕд мӕ ды цӕуылнӕ ныууадзыс? Афтӕ тынг мыл цӕмӕн тыхсыс?» Уӕд Дон ӕртӕ стихы фӕрцы бацархайдта йӕ зӕрдӕмӕ фӕндаг ссарыныл. Фыццаг уал Питеры бафарста, зӕгъгӕ, Хуыцауӕн ном кӕй ис, уый зоныс, ӕмӕ йын Библийы Псалом 83:18 стих бакӕсын кодта. Дарддӕр ын бамбарын кодта, цӕмӕн ыл тыхсы, уый. Йӕхицӕн ын бакӕсын кодта Ромӕгтӕм 10:13, 14 стихтӕ. 13 стихы фыст ис: «Йегъовӕмӕ йӕ номӕй чидӕриддӕр кувы, уый фервӕздзӕн». Уый фӕстӕ Дон бакаст Матфейы 9:36 стих, ӕмӕ йӕ стӕй Питерӕн йӕхицӕн бакӕсын кодта. Фыст дзы ис: «[Йесо] уыйбӕрц адӕмы куы федта, уӕд сын фӕтӕригъӕд кодта, уымӕн ӕмӕ уыдысты ӕнӕфыййау фыстау, ӕфхӕрд ӕмӕ дзӕгъӕл». Уӕд Питерӕн йӕ зӕрдӕ суынгӕг, ӕмӕ Доны бафарста: «Ӕз дӕр уыцы фыстӕй дӕн?»

Питер ивын райдыдта. Йӕхи ныннадта, йӕ боцъотӕ цыбыр алвыдта ӕмӕ йын Дон цы дзаумӕттӕ радта, уыдонӕй ӕппӕты хуыздӕртӕ йӕ уӕлӕ скодта. Ӕмӕ-иу уый фӕстӕ дӕр архайдта, цӕмӕй йӕхимӕ зылдаид.

Питерӕн уыд, йӕ царды хабӕрттӕ кӕм фыста, ахӕм дневник. Райдианы дзы цы фыста, уымӕй бӕрӕг уыд, йӕ зӕрдӕмӕ рухсы цъыртт кӕй никӕцӕй калд. Фӕлӕ дзы фӕстагмӕ цы фыста, уый тынг хицӕн кодта. Иу бон дзы ныффыста: «Абон Хуыцауы ном базыдтон. Ныр куы фӕкувын, уӕд фӕкувын Йегъовӕмӕ. Куыд хорз у, йӕ ном ын кӕй зонын. Дон мын загъта, уый гӕнӕн кӕй ис, ӕмӕ Йегъовӕ суа мӕ Хӕлар, кӕдфӕнды  дӕр мын рӕстӕг чи ссардзӕн ӕмӕ мӕм чи байхъусдзӕн, ахӕм Хӕлар».

Питеры фӕстаг ныхӕстӕ уыдысты йӕ кӕстӕр ӕфсымӕр ӕмӕ йӕ хистӕр хомӕ. Ныффыста сӕм афтӕ:

«Абон цыдӕр ӕвзӕр дӕн. Ӕвӕццӕгӕн, фӕзӕронд дӕн. Ӕмӕ кӕд райсоммӕ нал фӕцӕрон, уӕддӕр ӕй фидарӕй зонын, ме ’мбалы та [ома Доны] ногӕй дзӕнӕты кӕй фендзынӕн. Кӕд ацы ныхӕстӕ кӕсут, уӕд ӕз нал дӕн. Фӕлӕ уӕм кӕд мӕ зианы иу нӕлгоймаг ӕнӕзонгӕ фӕкӕса, уӕд-иу йемӕ аныхас кӕнут ӕмӕ, уӕ хорзӕхӕй, ацы гыццыл ӕрвхуыз чиныг бакӕсут *. Уым фыст ис, ме ’мбалы та ногӕй дзӕнӕты кӕй фендзынӕн. Ӕз ууыл ӕппындӕр нӕ дызӕрдыг кӕнын. Бирӕ уӕ уарзын. Уе ’фсымӕр Питер».

Зианы фӕстӕ Питеры хо Юмми радзырдта: «Иу-дыууӕ азы размӕ Питеримӕ ныхас кодтам. Бирӕ азты дӕргъы ахӕм амондджын фыццаг хатт уыд. Суанг ма-иу худгӕ дӕр бакодта». Стӕй Донӕн загъта: «Уыцы чиныг ӕнӕмӕнг бакӕсдзынӕн, уымӕн ӕмӕ ме ’фсымӕры зӕрдӕ цы бацагайдта, уый хъуамӕ диссаг цыдӕр уа». Юмми ма сразы, фӕстӕдӕр адӕмимӕ Библи ахуыр кӕнынӕн цы публикаци рацыд, уый фӕрцы иу хоимӕ Библи ахуыр кӕныныл.

Махӕн дӕр нӕ бон у, ӕмӕ адӕмӕн сӕ уындмӕ ма кӕсӕм, ӕнӕхин уарзтӕй сӕ уарзӕм ӕмӕ алыхуызон адӕмимӕ дӕр фӕразон уӕм (1 Тим. 2:3, 4). Афтӕмӕй нын рауайдзӕн, Питерау адӕмы цӕсты кадджын чи нӕу, фӕлӕ хорз зӕрдӕ кӕмӕн ис, ахӕм адӕмы зӕрдӕтӕм фӕндаг ссарын. Зӕрдӕтӕм чи кӕсы, уыцы Хуыцау сыгъдӕгзӕрдӕ адӕмы зӕрдӕты рӕстдзинады мыггаг ӕнӕмӕнг сырӕзын кӕндзӕн (1 Сам. 16:7; Иоан. 6:44).