БИБЛИ афтӕ нӕ зӕгъы, ӕмӕ бинонты цард ӕнцон у. Апостол Павел Хуыцауы фӕндӕй ныффыста, бинонтӕ кӕмӕн ис, уыдонӕн сӕ царды кӕй уыдзӕн «зындзинӕдтӕ» (1 Коринфӕгтӕм 7:28). Фӕлӕ бинонтӕн сӕ бон бирӕ у саразын, цӕмӕй сӕ зындзинӕдтӕ фӕкъаддӕр уой, ӕмӕ сӕ циныл та цин ӕфта. Ӕркӕсӕм, нӕлгоймӕгтӕ ӕмӕ сылгоймӕгтӕ арӕхдӕр кӕмӕй фӕхъаст кӕнынц, уыцы ӕхсӕз хъуыддагмӕ ӕмӕ сын Библийы уынаффӕтӕ куыд баххуыс кӕндзысты, уымӕ.

1

ЦӔМӔЙ ФӔХЪАСТ КӔНЫНЦ:

«Нӕ кӕрӕдзиимӕ ӕнгом нал стӕм».

БИБЛИ ЦЫ ЗӔГЪЫ:

«Ахсджиагдӕр цы у, уый бӕлвырд кӕнут» (ФИЛИППӔГТӔМ 1:10).

Дӕ царды дын ӕппӕты сӕйрагдӕр чи у, уыцы хъуыддӕгтӕй иу у дӕ бинонты цард. Бинонтӕ рохуаты хъуамӕ макуы баззайой. Уымӕ гӕсгӕ, ахъуыды кӕн, мыййаг, ӕгӕр ӕнӕвдӕлон кӕй дӕ, уый тыххӕй нал стут кӕрӕдзиимӕ ӕнгом? Афтӕ-иу ма рауайӕд, ӕмӕ дын дӕ хъуыддӕгты тыххӕй дӕ цардӕмбалӕн рӕстӕг ӕппындӕр мауал баззайа. Кӕй зӕгъын ӕй хъӕуы, куысты тыххӕй ӕмӕ уын цавӕрдӕр ӕнӕмӕнг хабӕртты тыххӕй фадат нӕ уыдзӕн, цӕмӕй ӕдзухдӕр иумӕ уат. Фӕлӕ дӕ бон у, ӕмӕ дӕ хӕс дӕр у, цӕмӕй къаддӕр рӕстӕг хардз кӕнай, дӕ бар цы хъуыддӕгтыл цӕуы,  уыдоныл, зӕгъӕм, ирхӕфсӕнтыл кӕнӕ де ’мбӕлттыл.

Кӕд иуӕй-иутӕ сӕхӕдӕг дӕр нӕ бамбарынц, сӕ цардӕмбалимӕ раздӕрау ӕнгом кӕй нал сты, уый, уӕд иннӕтӕ та барӕй фылдӕр фӕкусынц кӕнӕ ирхӕфсӕнтыл фылдӕр рӕстӕг фервитынц, цӕмӕй сӕ цардӕмбалы къаддӕр уыной. Кӕд дӕуӕн дӕр кӕнӕ дӕ цардӕмбалӕн йӕ хабар афтӕ у, уӕд уӕ хъӕуы ахъуыды кӕнын, афтӕ цӕмӕн рауад, ууыл ӕмӕ стӕй исты бакӕнын. Дӕ цардӕмбалимӕ фылдӕр рӕстӕг куы ’рвитай, ӕрмӕстдӕр уӕд кӕндзыстут кӕрӕдзимӕ ӕнгомӕй-ӕнгомдӕр ӕмӕ ӕцӕгдӕр «иу буар» уӕд суыдзыстут (Райдиан 2:24).

Иуӕй-иутӕ ацы уынаффӕйӕ куыд спайда кодтой. Эндрю * ӕмӕ Тани цӕрынц Австралийы, сӕ цард баиу кодтой дӕс азы размӕ. Эндрю зӕгъы: «Ӕз ӕй бамбӕрстон, куысты ӕмӕ де ’мбӕлттимӕ ӕгӕр бирӕ рӕстӕг куы ’рвитай, уӕд уый дӕ бинонты цардӕн тӕссаг кӕй у. Уымӕ гӕсгӕ мӕ бинойнагимӕ рӕстӕг рахицӕн кӕнӕм, цӕмӕй аныхас кӕнӕм ӕмӕ, нӕ зӕрдӕйы цы ис, уый нӕ кӕрӕдзийӕн радзурӕм».

Дейв ӕмӕ Джейн цӕрынц Америкӕйы Иугонд Штатты, иумӕ сты 22 азы. Алы изӕр дӕр, хӕдзармӕ куы ’рбацӕуынц, уӕд уал сахаты ’рдӕг фӕныхас кӕнынц, сӕ бон куыд ацыд, ууыл. Джейн зӕгъы: «Уыцы рӕстӕг нын афтӕ ахсджиаг у, ӕмӕ, цыфӕнды куы уа, уӕддӕр ӕнӕаныхасгӕнгӕ нӕ фӕвӕййӕм».

2

ЦӔМӔЙ ФӔХЪАСТ КӔНЫНЦ:

«Мӕ цардӕмбалӕй фыдӕнхъӕл фӕдӕн».

БИБЛИ ЦЫ ЗӔГЪЫ:

«Алчидӕр хъуыды кӕнӕд иннӕйы пайдайыл, йӕхи пайдайыл нӕ, фӕлӕ» (1 КОРИНФӔГТӔМ 10:24).

Лӕг кӕнӕ ус, йӕхицӕн хуыздӕр куыд уа, ӕрмӕст ууыл куы хъуыды кӕна, уӕд ӕцӕг амондджын никуы уыдзӕн, цал хатты ма ӕркӕна ус кӕнӕ ма смой кӕна, уӕддӕр. Бинонтӕй алчи йӕхиуыл нӕ, фӕлӕ иннӕйы хорзыл куы хъуыды кӕна, ӕрмӕстдӕр уӕд уыдзысты амондджын. Чырысти бамбарын кодта, афтӕ цӕмӕн у, уый: «Райсынӕй раттын амондджындӕр хъуыддаг у» (Хъуыддӕгтӕ 20:35).

Иуӕй-иутӕ ацы уынаффӕйӕ куыд спайда кодтой. Мексикӕйӕ иу лӕг ӕмӕ ус, Мартин ӕмӕ Марийӕ, иумӕ цӕрынц 39 азы. Фӕлӕ сӕ царды фӕндаг ӕдзух лӕгъз нӕ уыд. Цы  цӕлхдуртыл сӕмбӕлдысты, уыдонӕй иу уӕлдай тынгдӕр бахъуыды кодтой. Марийӕ зӕгъы: «Мартинимӕ цӕуылдӕр фӕхыл стӕм, ӕмӕ йын ахӕм цыдӕр загътон, ӕмӕ, зӕгъӕн ис, йӕ кадыл ын цъыфкъахӕй балӕгӕрстон. Уӕд мӕм тынг смӕсты ис. Бӕргӕ ма йын дзырдтон, ӕндӕр цыдӕр зӕгъынмӕ кӕй хъавыдтӕн, мӕ фырмӕстӕй мӕ кӕй сирвӕзт уыцы ныхас. Фӕлӕ мӕм нал хъуыста». Мартин та дзуры: «Уӕд мӕхицӕн загътон, зӕгъын нын иумӕ цӕргӕ нал у, мӕ бон цы уыд, уый бакодтон, ныр фаг у».

Мартины фӕндыд, цӕмӕй йын йӕ ус кад кодтаид, Марийӕйы та – цӕмӕй йӕ йӕ лӕг ӕмбӕрстаид. Фӕлӕ сӕ дыууӕ дӕр фыдӕнхъӕл фесты.

Цы сын баххуыс кодта кӕрӕдзи бамбарынӕн? Мартин дзуры: «Банхъӕлмӕ уал кастӕн, цалынмӕ не ’рсабыр дӕн, уӕдмӕ, ӕмӕ стӕй нӕ дыууӕ дӕр загътам, Библийы уынаффӕмӕ гӕсгӕ кӕй бакӕндзыстӕм – кӕрӕдзийӕн аргъ кӕндзыстӕм ӕмӕ нӕ кӕрӕдзиимӕ фӕлмӕнӕй ныхас кӕндзыстӕм. Рӕстӕг рацыд, ӕмӕ бамбӕрстам: цыфӕнды арӕх-иу ма рауайа афтӕ, ӕмӕ кӕрӕдзиимӕ цӕуылдӕр разы не стӕм, уӕддӕр, Хуыцаумӕ куы скувӕм ӕмӕ Библийы уынаффӕтӕй куы спайда кӕнӕм, уӕд алцыдӕр уыдзӕн хорз» (Исай 48:17, 18; Ефесӕгтӕм 4:31, 32).

3

ЦӔМӔЙ ФӔХЪАСТ КӔНЫНЦ:

«Мӕ лӕг (ус) йӕ хӕстӕ, куыд ӕмбӕлы, афтӕ не ’ххӕст кӕны».

БИБЛИ ЦЫ ЗӔГЪЫ:

«Алчидӕр Хуыцауы раз дзуапп ратдзӕн йӕхи тыххӕй» (РОМӔГТӔМ 14:12).

Кӕй зӕгъын ӕй хъӕуы, цӕмӕй бинонты цард хорз цӕуа, уый тыххӕй фаг нӕу, ӕмӕ ӕрмӕстдӕр иу архайа ууыл. Сӕ дыууӕ дӕр куы ницы аразой, ӕрмӕстдӕр кӕрӕдзийы куы аххосджын кӕной, уӕд та уавӕр ноджы ӕвзӕрдӕр уыдзӕн.

Дӕ цардӕмбал цы хъуамӕ араза, ӕдзух ууыл куы хъуыды кӕнай, уӕд дӕ бинонты цардӕй райгонд никуы уыдзынӕ, уӕлдайдӕр та, мӕ цардӕмбал йӕ хӕстӕ не ’ххӕст кӕны, зӕгъгӕ, уый ӕфсонӕй ды дӕр куы ницы аразай. Фӕлӕ дӕуыл цы хӕстӕ ис, уыдон ӕнӕзӕрдӕхудтӕй куы ӕххӕст кӕнай, уӕд уӕ цард фӕхуыздӕр уыдзӕн (1 Петры 3:1–3). Уымӕй ахсджиагдӕр та уый у, ӕмӕ уӕд Хуыцау уындзӕн, бинонты цардӕн цы ӕгъдау ӕрӕвӕрдта, уымӕн кӕй аргъ кӕныс, ӕмӕ йын йӕ зӕрдӕ барухс кӕндзынӕ (1 Петры 2:19).

Иуӕй-иутӕ ацы уынаффӕйӕ куыд спайда кодтой. Ким ӕмӕ йӕ лӕг сты Корейӕйӕ, иумӕ цӕрынц 38 азы. Ким зӕгъы: «Иуӕй-иу хатт мӕм мӕ лӕг смӕсты вӕййы ӕмӕ мӕм нал фӕдзуры, фӕлӕ цӕй тыххӕй, уый зонгӕ дӕр нӕ фӕкӕнын. Уый тыххӕй мӕм афтӕ фӕкӕсы, ӕмӕ мыл йӕ зӕрдӕ сивта. Ӕмӕ хатт фӕхъуыды кӕнын: „Кӕд мӕ уый не ’мбары, уӕд ӕй ӕз цӕмӕн хъуамӕ ӕмбарон?“»

Кимӕн йӕ бон уыдаид, ӕмӕ, йӕ лӕг раст кӕй нӕу, ӕрмӕст ууыл хъуыды кӕна. Фӕлӕ Ким зӕгъы: «Ӕз мӕхимӕ нӕ ныхъхъусын, фӕлӕ мӕхӕдӕг фыццаг къахдзӕф скӕнын, цӕмӕй бафидауӕм. Уый фӕрцы нӕ дыууӕйӕн дӕр нӕ маст ссӕуы ӕмӕ нӕ бон вӕййы хъуыддагыл сабырӕй аныхас кӕнын» (Иаковы 3:18).

 4

ЦӔМӔЙ ФӔХЪАСТ КӔНЫНЦ:

«Мӕ ус мӕ коммӕ нӕ кӕсы».

БИБЛИ ЦЫ ЗӔГЪЫ:

«Алы нӕлгоймагӕн дӕр йӕ хицау у Чырысти» (1 КОРИНФӔГТӔМ 11:3).

Афтӕ чи зӕгъы, ӕмӕ йӕ ус йӕ коммӕ нӕ кӕсы, уыцы нӕлгоймаг уал фыццаг хъуамӕ ахъуыды кӕна, йӕхӕдӕг йӕ Хицаумӕ, Йесо Чырыстимӕ, зӕрдиагӕй хъусы ӕви нӕ. Нӕлгоймаг Чырыстимӕ кӕй хъусы, уый бӕрӕг уыдзӕн, Чырысти куыд кодта, афтӕ куы кӕна, уымӕй.

Апостол Павел фыста: «Лӕгтӕ, уӕ устыты алкӕддӕр уарзут, Чырысти дӕр ӕмбырд куыд бауарзта ӕмӕ йӕхи йӕ сӕрвӕлтау куыд радта, афтӕ» (Ефесӕгтӕм 5:25). Йесо йӕ ахуыргӕнинӕгтӕн йӕхи «ӕлдар [нӕ] кодта» (Марчы 10:42–44). Уый йӕ фӕдылдзӕуджытӕн бӕлвырд ӕмбарын кодта, цы кӕнын сӕ хъӕуы, уый ӕмӕ-иу кӕм хъуыд, уым-иу сӕ бараст кодта. Фӕлӕ сӕм тызмӕг цӕстӕй никуы ракаст. Йесо уыди хӕларзӕрдӕ ӕмӕ, сӕ бон цы уыд, уымӕй фылдӕр сӕ нӕ домдта (Матфейы 11:29, 30; Марчы 6:30, 31; 14:37, 38). Йӕхи уды разӕй алкӕддӕр хъуыды кодта уыдоныл (Матфейы 20:25–28).

Нӕлгоймаджы хъӕуы ахъуыды кӕнын: «Бинонты ’хсӕн нӕлгоймагӕн цы бартӕ ис ӕмӕ сылгоймагӕн цы бынат ис, уый фӕдыл мӕ хъуыдыйыл тынгдӕр цы ӕндавы – бынӕттон ӕгъдӕуттӕ ӕви, Библийы цы уынаффӕтӕ ӕмӕ цӕвиттонтӕ ис, уыдон?» Зӕгъӕм, цы ахъуыды кӕндзынӕ, цавӕрдӕр хъуыддаджы йӕ лӕгимӕ разы чи нӕу ӕмӕ йӕ хъуыды комкоммӕ, фӕлӕ уӕзданӕй чи дзуры, уыцы сылгоймаджы тыххӕй? Библийы Авраамы ус Саррӕ нымад у фӕзминагыл, йӕ сӕрыхицауӕн коммӕгӕс кӕй уыд, уымӕй (1 Петры 3:1, 6). Фӕлӕ-иу куы хъуыди, уӕд-иу Саррӕ йӕ хъуыды загъта. Зӕгъӕм, афтӕ бакодта, иухатт сӕ бинонты фарнӕн тӕссаг кӕй уыд, уый Авраам куы нӕ бафиппайдта, уӕд (Райдиан 16:5; 21:9–12).

Бӕрӕг у, Авраам Саррӕйӕн афтӕ кӕй нӕ уыд, ӕмӕ йӕм Саррӕ сдзурын дӕр ма уӕндыдаид. Йӕ бинойнаджы хӕрдмӕ скӕсын чи нӕ уагъта, ахӕм тызмӕг лӕг нӕ уыд. Раст афтӕ, Библийы уынаффӕтӕм гӕсгӕ чи архайы, уыцы нӕлгоймаг дӕр йӕхи афтӕ нӕ дардзӕн, цӕмӕй дзы йӕ ус тӕрса, нӕ дзы домдзӕн, цӕмӕй йын йӕ алы фӕнд дӕр ӕххӕст кӕна. Кад домгӕйӕ нӕу. Уымӕ гӕсгӕ, кӕд лӕджы фӕнды, цӕмӕй йын йӕ ус кад кӕна, уӕд ын хъуамӕ йӕхӕдӕг дӕр уа хорз ӕмӕ йӕ ма ’фхӕра.

Иуӕй-иутӕ ацы уынаффӕйӕ куыд спайда кодтой. Джеймс цӕры Английы, бинонты хъуыддаг бакодта аст азы размӕ. Джеймс зӕгъы: «Мӕхи ахуыр кӕнын, цӕмӕй иу ахсджиаг хъуыддаг дӕр ма аскъуыддзаг кӕнон, мӕ усимӕ ма бауынаффӕ кӕнон, афтӕмӕй. Архайын, цӕмӕй, мӕхицӕн куыд хуыздӕр у, ууыл ма хъуыды кӕнон, фӕлӕ, мӕ усӕн куыд хуыздӕр уыдзӕн, ууыл».

Джордж, Америкӕйы Иугонд Штаттӕй, йӕ бинойнагимӕ цӕры 59 азы. Джордж зӕгъы: «Ӕз архайын, цӕмӕй мӕ усмӕ ахӕм цӕстӕй ма кӕсон, цыма мӕнӕй дӕлдӕр у. Мӕхицӕн ӕй нымайын сӕрӕн ӕмӕ ӕмбаргӕ ӕмбалыл» (Ӕмбисӕндтӕ 31:10).

 5

ЦӔМӔЙ ФӔХЪАСТ КӔНЫНЦ:

«Мӕ сӕрыхицау хӕдзары уынаффӕ йӕхимӕ нӕ исы».

БИБЛИ ЦЫ ЗӔГЪЫ:

«Зондджын сылгоймаг хӕдзараразӕг у, ӕнӕзонд та йӕ хӕдзар йӕхи къухӕй фехалы» (ӔМБИСӔНДТӔ 14:1).

Кӕд дӕ лӕг хӕдзары уынаффӕ йӕхимӕ исын нӕ уарзы, уӕд дӕ бон у бакӕнын афтӕ: 1) ӕдзух ын йӕ рӕдыдтытӕ йӕ цӕстмӕ дарай; 2) бинонты хистӕры хӕстӕ дӕхимӕ исай; 3) цыфӕнды гыццыл хъуыддаг дӕр куы сараза, уӕд дӕр-иу дзы зӕрдиагӕй раппӕлай. Фыццаг дыууӕйӕ кӕцыфӕнды ма равзарай – дӕ хӕдзар дӕхи къухӕй фехалдзынӕ. Ӕртыккаг куы равзарай, уӕд та уыдзынӕ «хӕдзараразӕг», ома дӕ бинонты фарныл фарн ӕфтаудзынӕ.

Нӕлгоймӕгтӕй бирӕтӕн сӕйрагдӕр у, цӕмӕй сӕ нымайой, уарзой сӕ нӕ, фӕлӕ. Уӕдӕ дӕ сӕрыхицау куы уына, кӕй йӕ нымайыс, куы йӕ уына, хӕдзары хицауы хӕстӕ куыд ӕххӕст кӕны, уымӕй разы кӕй дӕ ӕмӕ йын йӕ фыдӕбонӕн кӕй аргъ кӕныс, уӕд ын хӕдзары уынаффӕ йӕхимӕ исын хуыздӕр уайдзӕн. Кӕй зӕгъын ӕй хъӕуы, иуӕй-иу хатт дӕ цардӕмбалимӕ разы нӕ уыдзынӕ. Уӕд-иу уӕ хъӕудзӕн иумӕ аныхас кӕнын (Ӕмбисӕндтӕ 18:13). Фӕлӕ цы дзурай ӕмӕ куыд дзурай, уымӕй дӕ бинонты цард кӕнӕ халгӕ кӕндзынӕ, кӕнӕ аразгӕ (Ӕмбисӕндтӕ 21:9; 27:15). Дӕ ныхасӕй бӕрӕг уӕд, дӕ сӕрыхицауӕн кӕй аргъ кӕныс, ӕмӕ уӕд дӕ фӕнд дӕ къухы ӕнцондӕрӕй бафтдзӕн – дӕ лӕг хӕдзары уынаффӕ йӕхимӕ ӕнӕзивӕгӕй исдзӕн.

Иуӕй-иутӕ ацы уынаффӕйӕ куыд спайда кодтой. Мишель цӕры Америкӕйы Иугонд Штатты, мойгонд у 30 азы. Мишель дзуры: «Мӕ мад мӕн ӕмӕ мӕ хоты иунӕгӕй хъомыл кодта, ӕмӕ уыди карз сылгоймаг, стӕй уынаффӕйӕ никӕй фарста, алцыдӕр йӕхӕдӕг арӕзта. Ӕмӕ ӕз дӕр афтӕ сахуыр дӕн. Уымӕ гӕсгӕ мӕ ӕдзух хъӕуы архайын, цӕмӕй мӕ сӕрыхицауы коммӕ кӕсон. Зӕгъӕм, ахуыр кӕнын, цӕмӕй-иу уынаффӕ мӕхӕдӕг ма рахӕссон, фӕлӕ-иу мӕ лӕджы бафӕрсон».

Австралийӕ иу сылгоймаг, Рейчел, зӕгъгӕ, йӕ лӕг Маркимӕ цӕры 21 азы. Рейчелыл дӕр фӕзынд, цы бинонты ’хсӕн схъомыл, уый. Мӕнӕ цы дзуры: «Мӕ мад мӕ фыды коммӕ никуы каст. Ӕдзух кодтой хыл, ӕмӕ дзы иу иннӕмӕн аргъ нӕ кодта. Чындзы куы ацыдтӕн, уӕд фыццаг азты ӕз дӕр мӕхи мӕ мады хуызӕн дардтон. Фӕлӕ рӕстӕг рацыд, ӕмӕ бамбӕрстон, Библийы кӕрӕдзийӕн аргъ кӕныны тыххӕй цы уынаффӕтӕ ис, уыдонмӕ гӕсгӕ цӕрын куыд хорз у, уый. Ныр Маркимӕ стӕм бирӕ амондджындӕр».

6

ЦӔМӔЙ ФӔХЪАСТ КӔНЫНЦ:

«Мӕ цардӕмбалӕн йӕ иуӕй-иу миниуджытӕн быхсын мӕ бон нал у».

БИБЛИ ЦЫ ЗӔГЪЫ:

«Исчи уӕ истӕмӕй куы фӕхъыг кӕна, уӕддӕр кӕрӕдзийӕн барут ӕмӕ зӕрдӕйӕ хатыр кӕнут» (КОЛОССӔГТӔМ 3:13).

Дӕ цардӕмбалимӕ ма уарзӕттӕ куы уыдыстут, уӕд ын, ӕвӕццӕгӕн, уыдтай ӕрмӕст йӕ хорз миниуджытӕ, йе ’взӕр миниуджытӕ та йын фиппайгӕ дӕр нӕ кодтай. Цымӕ ныр дӕр дӕ бон нӕ уаид афтӕ кӕнын? Кӕй зӕгъын ӕй хъӕуы, дӕ цардӕмбалӕй цӕй тыххӕй рахъаст кӕнай, уый дӕр ис. Фӕлӕ-ма дӕхимӕ ратт  ахӕм фарста: «Хуыздӕр куыд уаид, мӕ цардӕмбалӕн йӕ хорз миниуджытыл куы хъуыды кӕнин ӕви йе ’взӕр миниуджытыл?»

Иннӕты хъӕндзинӕдтӕм кӕсын кӕй нӕ хъӕуы, уый тыххӕй Йесо Чырысти ӕрхаста иу зӕрдӕмӕхъаргӕ фӕсномыг ныхас. «Дӕхи цӕсты хъӕд куы нӕ уыныс,– загъта Чырысти,– уӕд де ’фсымӕры цӕсты хъӕмпыхалмӕ цы кӕсыс?» (Матфейы 7:3). Хъӕмпыхал ӕмӕ хъӕд кӕрӕдзийӕ куыд тынг хицӕн кӕнынц, ууыл дзурын дӕр нӕ хъӕуы. Хъӕмпыхал хъӕды раз зынгӕ дӕр нӕ кӕны. Ӕмӕ Чырысти дӕр уый тыххӕй загъта: «Раздӕр уал дӕхи цӕстӕй хъӕд раппар, ӕмӕ уӕд, де ’фсымӕры цӕстӕй хъӕмпыхал куыд райсай, уый дӕр фендзынӕ» (Матфейы 7:5).

Ацы фӕсномыг ныхас радзурыны размӕ Чырысти радта иу ахсджиаг фӕдзӕхст: «Иннӕтӕн тӕрхон ма кӕнут, ӕмӕ тӕрхонгонд нӕ уыдзыстут. Уымӕн ӕмӕ иннӕтӕн цы тӕрхон рахӕссут, ахӕм тӕрхон рахастӕуыдзӕн сымахӕн дӕр» (Матфейы 7:1, 2, «Ног Фӕдзӕхст», 2004). Уӕдӕ дӕ кӕд фӕнды, цӕмӕй дын Хуыцау дӕ хъӕндзинӕдтӕм, ома, дӕ цӕсты цы хъӕд ис, уымӕ, ма кӕса, уӕд ды дӕр хъуамӕ дӕ цардӕмбалы хъӕндзинӕдтӕм ма кӕсай (Матфейы 6:14, 15).

Иуӕй-иутӕ ацы уынаффӕйӕ куыд спайда кодтой. Дженни цӕры Англисы, йӕ лӕг Саймонимӕ сӕ цард баиу кодтой фараст азы размӕ. Дженни дзуры: «Мӕ лӕгмӕ арӕхдӕр уый тыххӕй смӕсты вӕййын, йӕ хъуыддӕгтӕ рагацау кӕй нӕ пълан кӕны ӕмӕ алцыдӕр къуырцдзӕвӕнмӕ кӕй ӕрхӕссы. Уый худӕг дӕр у, уымӕн ӕмӕ, уарзӕттӕ ма куы уыдыстӕм, уӕд мӕ зӕрдӕмӕ тынг цыди, кӕд цы акӕндзӕн, уый кӕй никуы зыдтон. Ныр ӕй ӕмбарын, мӕнмӕ дӕр цыдӕр хъӕндзинӕдтӕ кӕй ис, зӕгъӕм, ӕдзух мӕ фӕфӕнды, цӕмӕй иннӕтӕ мӕ зондыл цӕуой. Мах Саймонимӕ архайӕм, цӕмӕй нӕ кӕрӕдзийы гыццыл хъӕндзинӕдтӕм ма кӕсӕм».

Уӕлдӕр цы Мишелы кой кодтам, уымӕн йӕ лӕг, Курт, зӕгъгӕ, афтӕ зӕгъы: «Дӕ цардӕмбалӕй дӕ зӕрдӕмӕ цы нӕ цӕуы, ӕдзух ууыл куы хъуыды кӕнай, уӕд уыцы хъӕндзинӕдтӕ дӕ цӕсты стырӕй-стырдӕр кӕндзысты. Мӕхицӕй куы зӕгъон, уӕд ӕз фылдӕр фӕхъуыды кӕнын, Мишелы цы миниуджыты тыххӕй бауарзтон, уыдоныл».

Бинонты фарнӕн сӕйрагдӕр цы у

Ацы цалдӕр хабарӕй бӕрӕг у, бинонты цард ӕнӕ зындзинӕдтӕй кӕй нӕ вӕййы, фӕлӕ уӕддӕр уыцы цӕлхдурты сӕрты кӕй ис ахизӕн ӕмӕ бинонты фарн бахъахъхъӕнӕн. Уӕдӕ цӕмӕй бинонты ’хсӕн фарн уа, уый тыххӕй сӕйрагдӕр цы у? Сӕйрагдӕр у, цӕмӕй, Хуыцауы цы уарзтӕй уарзыс, уый бонӕй-бонмӕ тыхджындӕр кӕна, стӕй, йӕ Ныхасы цы уынаффӕтӕ ис, уыдон зӕрдиагӕй ӕххӕст кӕнай.

Алекс ӕмӕ Итохан цӕрынц Нигерийы, иумӕ сты 20 азӕй фылдӕр. Уыдон дӕр базыдтой, бинонты фарнӕн сӕйрагдӕр цы хъӕуы, уый. Алекс дзуры: «Мӕ бон у фидарӕй зӕгъын, бинонты царды цы зындзинӕдтӕ фӕзыны, уыдонӕй ахӕм кӕй нӕй, ӕмӕ йын Библийы уынаффӕты руаджы аскъуыддзаг кӕнӕн ма уа». Йӕ ус та зӕгъы: «Мах бамбӕрстам, куыд ахсджиаг у ӕдзух иумӕ кувын ӕмӕ, Библи куыд зӕгъы, афтӕ кӕрӕдзи сыгъдӕгзӕрдӕйӕ уарзын ӕмӕ кӕрӕдзийӕн барын. Нӕ цард куы баиу кодтам, уӕдимӕ абаргӕйӕ нын ныр къаддӕр зындзинӕдтӕ ис».

Нӕ дӕ фӕндид фылдӕр базонын, Хуыцауы Ныхасы цы хорз уынаффӕтӕ ис, уыдон дын дӕ бинонтӕн куыд баххуыс кӕндзысты? Кӕд о, уӕд зӕгъ Йегъовӕйы Ӕвдисӕнтӕн, цӕмӕй дын ӕрбахӕссой чиныг, «Бинонты амонд цӕмӕй кӕнгӕ у» *, зӕгъгӕ, ӕмӕ уыцы фарстайыл демӕ аныхас кӕной.

[Фиппаинӕгтӕ]

[Ныв 4 фарсыл]

Нӕ кӕрӕдзийӕн рӕстӕг ссарӕм?

[Ныв 5 фарсыл]

Мӕхицӕй фылдӕр мӕ цардӕмбалыл хъуыды кӕнын?

[Ныв 6 фарсыл]

Фыццаг къахдзӕф скӕнын, цӕмӕй бафидауӕм?

[Ныв 7 фарсыл]

Исты уынаффӕ рахӕссыны размӕ мӕ усы хъуыды базонын?

[Ныв 9 фарсыл]

Фылдӕр мӕ цардӕмбалы хорз миниуджытыл фӕхъуыды кӕнын?