Бадгӕ куыст кӕныс, дӕ къӕбӕры фаг дӕ хъаруйы фӕрцы кусыс ӕви дыууӕ дӕр иумӕ кӕныс, уӕддӕр дӕ рох ма уӕд, «цыфӕнды фыдӕбонӕй дӕр [кӕй] ис пайда» (Ӕмбисӕндтӕ 14:23). Цавӕр пайда? Иу уый, ӕмӕ нӕ фыдӕбоны фӕрцы нӕ бон нӕхи дарын уыдзӕн. Хуыцау йӕ сыгъдӕгзӕрдӕ лӕггадгӕнджытӕн ныфс ӕвӕры, ӕнӕмӕнг сӕ цы хъӕуы, ӕнӕ уыдӕттӕй сӕ кӕй нӕ ныууадздзӕн (Матфейы 6:31, 32). Фӕлӕ Йегъовӕйы фӕнды, цӕмӕй уый тыххӕй мах нӕхӕдӕг дӕр архайӕм ӕмӕ ӕнӕзӕрдӕхудтӕй кусӕм (2 Фессалоникӕгтӕм 3:10).

Уӕдӕ куыст у, нӕ нысӕнттӕ нӕ къухы кӕй фӕрцы бафтдзысты, ахӕм мадзал. Куысты руаджы нӕ бон у нӕ хӕстӕ ӕнӕзӕрдӕхудтӕй ӕххӕст кӕнын. 25-аздзыд Джошуа загъта: «Адӕймагӕн йӕ бон йӕхи дарын куы уа, уӕд уый дӕр гыццыл хъуыддаг нӕу. Цы дӕ хъӕуы, уый фаг дӕхимӕ ӕхца куы уа, уӕд зӕгъӕн ис, ӕмӕ дзӕгъӕлы нӕ кусыс».

Уымӕй уӕлдай, уӕззау фыдӕбон чи кӕны, уый йӕхицӕн тынгдӕр фӕаргъ кӕны. Ӕцӕгдӕр, уӕззау фыдӕбонӕн йӕ ном йӕ уӕлӕ ис – уӕззау у. Нӕ куыст нӕ аразын куы нӕ фӕнда, зӕгъӕм, нӕ зӕрдӕмӕ кӕй нӕ цӕуы кӕнӕ зын кӕй у, уый тыххӕй, фӕлӕ уӕддӕр куы архайӕм, цӕмӕй-иу ӕй саразӕм, уӕд-иу нын нӕ фыдӕбон циндзинад ӕрхӕсдзӕн. Афтӕмӕй уӕззау куыст кӕнын бауарздзыстӕм (Ӕмбисӕндтӕ 26:14). Ӕмӕ ахӕм уавӕры та адӕймаг йӕ фыдӕбонӕй райгонд вӕййы. «Бон-изӕрмӕ куы фӕкусын, уӕд мын уый куыддӕр ӕхсызгон вӕййы,– дзуры Аарон, фыццаг статьяйы кӕй кодтам, уыцы нӕлгоймаг.– Иуӕй-иу хатт тынг бафӕллайын, ӕмӕ мын кӕд мӕ куыст уынгӕ дӕр ничи фӕкӕны,  уӕддӕр ӕй фӕзонын, абон мын цыдӕр кӕй бантыст».

Библи ӕппӕлы, «йӕ куысты дӕсны чи у», ахӕм нӕлгоймагӕй ӕмӕ, «йӕхи къухтӕй зӕрдиагӕй [чи] фыдӕбон кӕны», ахӕм сылгоймагӕй (Ӕмбисӕндтӕ 22:29; 31:13). Кӕй зӕгъын ӕй хъӕуы, адӕймаг йӕ куысты дӕсны ӕвиппайды не свӕййы. Цы куыстмӕ нӕ фӕарӕхсы, уыцы куыстӕй йӕ зӕрдӕ нӕ фӕрайы. Бирӕтӕ сӕ куыст, ӕвӕццӕгӕн, уый тыххӕй нӕ уарзынц. Йӕ бӕллӕх, чи зоны, уый мидӕг вӕййы, ӕмӕ цӕмӕй дӕсны кусджытӕ суой, уый тыххӕй ницы фӕаразынц.

Ӕцӕгдӕр, адӕймагӕн цыфӕнды куыст кӕнын дӕр ӕхсызгон уыдзӕн, йӕ зондахаст куы аива, ӕмӕ йӕ куыстмӕ раст цӕстӕй кӕсын куы райдайа, ома куы архайа, цӕмӕй йӕ куыст хуыздӕр базона. 24-аздзыд Уильям дзуры: «Дӕ куысты, дӕ бон цы у, уый куы аразай ӕмӕ, цы пайда хӕссы, уый куы уынай, уӕд дзы райгонд уыдзынӕ. Фӕлӕ дӕ куыстӕй дӕ зӕрдӕ никуы барухс уыдзӕн, зӕрдиагӕй йӕ куы нӕ кӕнай кӕнӕ дӕ цы домынц, ӕрмӕстдӕр уый куы аразай, уӕд».

Цас ӕхца исыс, ӕрмӕст ууыл ма мӕт кӕн. Фӕлтау ахъуыды кӕн: «Ацы куыст кӕнын ӕнӕмӕнгӕй цӕмӕн хъӕуы? Куы ничи йӕ аразид кӕнӕ йӕ раст куы нӕ аразиккой, уӕд цы уаид? Мӕ куыст иннӕтӕн цы пайда у?»

Уӕлдай тынгдӕр хъӕуы ахъуыды кӕнын фӕстаг фарстайыл, уымӕн ӕмӕ нӕ куыстӕй райгонд вӕййӕм, иннӕтӕн пайда кӕй у, уый куы фембарӕм, уӕд. Чырысти загъта: «Райсынӕй раттын амондджындӕр хъуыддаг у» (Хъуыддӕгтӕ 20:35). Кӕй зӕгъын ӕй хъӕуы, нӕ куыст пайда у, зӕгъӕм, клиенттӕн ӕмӕ нӕ куысты хицӕуттӕн. Фӕлӕ ма уыдонӕй уӕлдай нӕ куыст пайда у нӕ бинонтӕн ӕмӕ, хъуаг чи ӕййафы, уыцы адӕмӕн.

Нӕ бинонтӕ. Хӕдзары хистӕр йӕ бинонты фӕдарыны тыххӕй куы фыдӕбон кӕна, уӕд сын уый пайда у дыууӕ хъуыддаджы. Фыццаг, ӕнӕмӕнгӕй сӕ цы хъӕуы, уый сын уыдзӕн – хӕринаг, дзаума ӕмӕ, кӕм цӕрой, уый. Афтӕмӕй бинонты хистӕр ӕххӕст кӕны, Хуыцау ыл цы хӕс сӕвӕрдта, уый, ома «йӕ бинонтыл... тыхсы» (1 Тимофеймӕ 5:8). Дыккаг, куыстуарзаг хистӕр фӕзминаг у йӕ бинонтӕн – уымӕ кӕсгӕйӕ уыдон ӕмбарынц, ӕнӕ фыдӕбонӕй цӕрӕн кӕй нӕй. Фыццаг статьяйы кӕй кой кодтам, уыцы Шэйн зӕгъы: «Мӕ фыд йӕ куысты тынг ӕнӕзӕрдӕхудт уыд, ӕмӕ уымӕй у фӕзминаг. Ӕнӕхин адӕймаг у ӕмӕ цӕрӕнбонты уӕззау фыдӕбон фӕкодта. Фылдӕр кодта хъӕддӕсныйы куыст. Бамбарын мын кодта, куыд ахсджиаг у къухӕй истӕмӕ арӕхсын, ӕмӕ мӕн дӕр сахуыр кодта, иннӕтӕ цӕмӕй пайда кӕндзысты, ахӕм истытӕ аразын».

Хъуаг чи ӕййафы, уыдон. Апостол Павел фыста, зӕгъгӕ, чырыстон чи у, уый «фыдӕбон кӕнӕд, йӕхи къухтӕй хорзӕй исты аразӕд, цӕмӕй йӕ бон уа, хъуаг чи ӕййафы, уымӕн исты фӕхай кӕнын» (Ефесӕгтӕм 4:28). Ӕцӕгдӕр, нӕхи ӕмӕ нӕ бинонтӕ фӕдарыны тыххӕй зӕрдӕбынӕй куы фыдӕбон кӕнӕм, уӕд нӕ бон уыдзӕн, хъуаг чи ӕййафы, уыдонӕн ӕххуыс кӕнын (Ӕмбисӕндтӕ 3:27). Уӕдӕ куыстуарзаг куы уӕм, уӕд нӕхиуыл бавзардзыстӕм, райсынӕй раттын амондджындӕр хъуыддаг кӕй у.

Иухатт Чырысти загъта: «Барджынтӕй [дӕ] исчи йемӕ иу мин къахдзӕфы куы цӕуын кӕна, уӕд йемӕ ацу дыууӕ ахӕмы» (Матфейы 5:41). Ацы уагӕвӕрдӕй дӕ бон спайда кӕнын куыд у? Архай, цӕмӕй дӕ цы домынц, уымӕй фылдӕр аразай. Дӕ разы нысӕнттӕ сӕвӕр. Бафӕлвар дӕ куыст хуыздӕр ӕмӕ тагъддӕр саразын. Цыфӕнды гыццыл хъуыддаг дӕр дзы бӕстон араз.

Цы дӕ домынц, уымӕй фылдӕр куы аразай, уӕд дӕ куыстӕй дӕ зӕрдӕ тынгдӕр райдзӕн. Цӕмӕн? Уымӕн ӕмӕ уӕд дӕхи бар уыдзӕн, цас араздзынӕ, уый. Фылдӕр араздзынӕ, уымӕн ӕмӕ афтӕ дӕхи фӕнды, кӕйдӕр нӕ, фӕлӕ (Филимонмӕ 14). Уый фӕдыл нӕ бон у нӕ зӕрдыл ӕрлӕууын кӕнын, Ӕмбисӕндты 12:24 стихы цы уагӕвӕрд ис, уый: «Куыстуарзаг адӕймаджы къухы уыдзӕн бартӕ, зивӕггӕнаджы къухтӕ та кӕндзысты цагъары куыст». Искуы нӕ исчи цагъар суыдзӕн кӕнӕ нӕ искӕмӕн тыхкуыст кӕнын кӕндзысты, уый дызӕрдыггаг у. Фӕлӕ адӕймаг, цы дзы домынц, уымӕй фылдӕр куы нӕ араза, уӕд ӕм, чи зоны, афтӕ кӕса, ӕмӕ цагъар у ӕмӕ ӕдзух аразы, иннӕтӕ йын цы дзурынц, уый. Цы дзы домынц, уымӕй фылдӕр чи аразы, йӕхи кӕй фӕнды, уый тыххӕй, уыцы адӕймаг та ӕмбары, йӕ цардыл йӕ бар кӕй цӕуы. Уый йӕхӕдӕг йӕхицӕн у хицау.

Фыдӕбон кӕнын хорз у. Фӕлӕ рох кӕнын нӕ хъӕуы, царды ма куыстӕй уӕлдай ӕндӕр хабӕрттӕ дӕр кӕй ис. Библи зӕгъы, цӕмӕй куыстуарзаг уӕм (Ӕмбисӕндтӕ 13:4). Фӕлӕ афтӕ нӕ зӕгъы, цӕмӕй ӕдзух кусгӕ кӕнӕм. «Дӕхи фыдӕбонӕй марыны бӕсты ӕмӕ дымгӕ сурыны бӕсты фӕлтау иу гыццыл баулӕф»,– фыст ис Екклесиасты 4:6 стихы. Ацы стихӕн йӕ хъуыды цы у? Улӕфын чи нӕ зоны, уымӕн йӕ фыдӕбоны фӕрцы цы бантысы, уый йын циндзинад не ’рхӕссы, уымӕн ӕмӕ йӕ рӕстӕг ӕмӕ йӕ хъарутӕ иууылдӕр ацӕуынц куыстыл. Ахӕм адӕймагӕн йӕ куыстӕй ницы пайда вӕййы, «дымгӕ сурынӕй» куыд ницы пайда ис, афтӕ.

Библи нӕ ахуыр кӕны куыстмӕ раст цӕстӕй кӕсыныл. Ӕмӕ кӕд афтӕ зӕгъы, цӕмӕй нӕ куыстыл зӕрдӕйӕ уӕм, уӕддӕр нӕ фӕдзӕхсы, цӕмӕй-иу, «ахсджиагдӕр цы у, уый сбӕлвырд кӕнӕм» (Филиппӕгтӕм 1:10). Цы хауы, «ахсджиагдӕр цы у», уымӕ? Уымӕ хауы рӕстӕг бинонтимӕ ӕмӕ ӕмбӕлттимӕ ӕрвитын. Ноджы ахсджиагдӕр та сты, Хуыцаумӕ кӕй фӕрцы баввахс уыдзыстӕм, уыцы хъуыддӕгтӕ, зӕгъӕм, Хуыцауы Ныхас кӕсын ӕмӕ йыл хъуыды кӕнын.

Царды алцӕмӕн дӕр йӕхи бынат кӕмӕн ис, уыдон сӕ куыстӕй тынгдӕр райгонд вӕййынц. Уӕлдӕр кӕй ныхӕстӕ ӕрхастам, уыцы ӕрыгон нӕлгоймаг, Уильям, дзуры: «Мӕ раздӕры куысты хицау хорз зоны, куыстӕн цы бынат хъуамӕ уа, уый. Йӕ куыст хорз аразы, ӕмӕ йӕ йӕ клиенттӕ дӕр уый тыххӕй бирӕ уарзынц. Фӕлӕ боны кӕрон, алцыдӕр куы саразы, уӕд йӕ куыстыл нал фӕхъуыды кӕны – сӕйрагдӕр ын вӕййынц йӕ бинонтӕ ӕмӕ Хуыцауы хъуыддӕгтӕ. Раст зӕгъгӕйӕ, ӕз уымӕй амондджындӕр адӕймаг нӕ зонын!»