Iliktar Ka nen Jesus—Panon?

I-PLAY

Say ebat na Biblia

Inliktar nen Jesus iray matoor ya totoo nen insakripisyo toy bilay to bilang dondon. (Mateo 20:28) Kanian sikatoy tinawag na Biblia ya “Manangiliktar na mundo.” (1 Juan 4:14) Imbaga ni na Biblia: “Anggapo lay arum a panlapuan na kililiktar, ta anggapoy sananey a ngaran diad silong na tawen a niiter ed saray totoo pian nilaban itayo.”—Gawa 4:12.

‘Atawayan nen Jesus so ipapatey parad kada too’ ya mangipanengneng na pananisia ed sikato. (Hebreo 2:9; Juan 3:16) Insan, “sikatoy pinaoli na Dios manlapud inaatey,” tan pinmawil si Jesus ed tawen bilang espiritun pinalsa. (Gawa 3:15) Diman, sarag ya iliktar nen Jesus “diad sigpot a paraan iramay onaasingger ed Dios diad panamegley to, ta sikatoy lawas mabilay pian mikasi parad sikara.”—Hebreo 7:25.

Akin ya kaukolan tayoy Jesus ya mikasi parad sikatayo?

Makasalanan tayon amin. (Roma 3:23) Lapud kasalanan, akaamper iya ed iyasingger tayod Dios, tan say kasalanan et mangitonton ed ipapatey. (Roma 6:23) Balet nagmaliw ya “mananulong” si Jesus parad amin ya mangipanengneng na pananisia. (1 Juan 2:1) Mikakasi si Jesus ed Dios ya dengelen toy pikakasi da tan perdonaen toy kasalanan da base ed dondon ya insakripisyo to. (Mateo 1:21; Roma 8:34) Dedengelen na Dios irayan kerew nen Jesus lapud nibase iya ed panlabayan na Dios. Imbaki toy Jesus ed dalin “pian nilaban so mundo ed panamegley to.”—Juan 3:17.

Kasin naligtas ka la basta manisia kad si Jesus?

Andi. Likud ed pananisia ed si Jesus, wala ni ray kaukolan tayon gawaen. (Gawa 16:30, 31) Ibabaga na Biblia: “Unong a say laman ya andian na linawa et inatey, say pananisia met ya andian na saray gawa et inatey.” (Santiago 2:26) Pian naligtas, kaukolan tayon:

Kabaten si Jesus tan say Ama to, si Jehova.—Juan 17:3.
Manisia ed sikara.—Juan 12:44; 14:1.
Ipanengneng so pananisia tayo diad pangunor ed saray ganggan da. (Lucas 6:46; 1 Juan 2:17) Imbangat nen Jesus ya aliwan amin ya ontatawag ed sikatoy “Katawan” et nilaban, noagta saraman labat so ‘manggagawa ed linawa na Ama to a walad tawen.’—Mateo 7:21.
Tuloytuloy ya ipanengneng so pananisia, anggan diad mairap iran situasyon. Indanet nen Jesus: “Samay akapansungdo anggad anggaan et sikatoy nilaban.”—Mateo 24:13.