Kasin say Panarian na Dios et Walad Pusom?
Say ebat na Biblia
Andi, say Panarian na Dios et aliwan basta kipapasen ya walad puso na saray Kristiano. a Ipapaamta na Biblia no iner so talagan kawalaan na satan nen tinawag to itan ya “Panarian na tawen.” (Mateo 4:17) Ipapanengneng na Biblia ya sakey itan ya tuan gobierno ya manuuley ed tawen, imanoen iraya:
Say Panarian na Dios et walaan na saray manuley, sakop, ganggan, tan pakayari ya sumpalen so linawa na Dios diad tawen tan dalin.—Mateo 6:10; Apocalipsis 5:10.
Uleyan na gobierno na Dios, odino Panarian na Dios, so amin ya “totoo ed nanduruman nasyon tan lenguahe” diad dalin. (Daniel 7:13, 14) Say autoridad na satan et agmanlalapud saray sakop to noagta direktan manlapud Dios.—Salmo 2:4-6; Isaias 9:7.
Imbaga nen Jesus ed saray matoor ya apostol to ya nakaiba to ra diad Panarian na tawen ya ‘onyurong diad saray trono.’—Lucas 22:28, 30.
Wala ray kalaban na Panarian tan deralen to iratan.—Salmo 2:1, 2, 8, 9; 110:1, 2; 1 Corinto 15:25, 26.
Ag-ibabangat na Biblia ya say Panarian na tawen et walad pusom, ya singa manuuley itan diad dalem na puso. Balet ipapanengneng na satan ya say “salita na Panarian” odino say “maong a balita na Panarian” et sarag to tayon pakiwasen tan nepeg ya walay epekto na satan ed puso tayo.—Mateo 13:19; 24:14.
Antoy labay ya ibaga na “say panarian na Dios wala ed dalem yo”?
Naguguloan so dakel ya totoo no iner ya talaga so kawalaan na Panarian lapud impangipatalos na arum ya Biblia ed Lucas 17:21. Singa bilang, nabasa ed patalos na Say Biblia ya “say panarian na Dios wala ed dalem yo.” Balet pian dugay pakatalos tayod sayan bersikulo kaukolan tayon amtaen so konteksto.
Seguradon anggapo ed puso na saramay anawet puso tan managpatey ya sinmumpa ed si Jesus so Panarian na Dios
Say katongtong nen Jesus ed saya et saray Fariseo, sakey a grupo na saray lider na relihyon ya onsusumpa ed sikato tan kaiba iran namplano ed pamatey ed sikato. (Mateo 12:14; Lucas 17:20) Duga kasin isipen ya say Panarian et sakey a kipapasen ya walad dalem na anawet ya puso ra? Oniay imbaga nen Jesus ed sikara: “Napnoy pansimpisimpitan tan kaugsan so puso yo.”—Mateo 23:27, 28.
Nilinew na arum ya patalos so imbaga nen Jesus diad Lucas 17:21: “Say panarian na Dios et wadia ya kaiba yo.” (Inkarga mi italiko; Contemporary English Version) “Say Panarian na Dios et walad limog yo.” (Balon Mundo a Patalos, paimanod leksab) Say Panarian na tawen et “kaiba” odino “walad limog” na saray Fariseo ta akaalagey ed arapan da si Jesus, say pinili na Dios ya manuley bilang Ari.—Lucas 1:32, 33.
a Ibabangat na dakel ya Kristianon denominasyon ya say Panarian na Dios et walad dalem na too, odino walad puso na sakey ya too. Singa bilang diad United States, indeklara na Southern Baptist Convention ya say Panarian na Dios et nibagan “say panuuley na Dios ed puso tan bilay na sakey ya too.” Mipadpara, diad libro ton Jesus of Nazareth, imbaga nen Pope Benedict XVI ya “say Panarian na Dios et onsabid sika no ondengel so pusom.”
Ompan Nagustoan Mo Met
ESSENTIAL BIBLE TEACHINGS
Anto so Panarian na Dios?
Legan na ministeryo nen Jesus, say manunan topic ya imbangat to et say Panarian na Dios. Nilasus taon lan ipipikasi na saray papatumbok to ya onsabi la komon itan ya Panarian.
SAY PANAG-BANTAYAN
Siopa so Ari ed Panarian na Dios?
Insulat na pigaran nansulat ed Biblia iray detalye ya pakabidbiran ed samay magmaliw ya Ari ed Panarian na Dios. Diad amin ya toon nambilay, saksakey labat so eksakton tutukoyen na amin ed saratan ya detalye.
BANGAT NA BIBLIA
Salien so Panag-aral na Biblia
Salien so libre ya interactive ya panag-aral na Biblia ya walay personal ya manbangat ed sika.