1, 2. Iner so pakaromogan tayo na proteksion natan?

IMADYIN mo pan manaakar ka ed karsada balet wala manayay onsasabin bagyo. Lalon ombibilunget so tawen. Mankirmat, mankarol, insan biglan binmalasubos so maksil ya uran. Apurado ka lan makalmoy nasiroman. Diad gilig na dalan et walay anengneng mon nasiroman. Malmalet tan agka ditan nabasa. Talagan misalsalamat ka ta walay ontan ya maligen a pasen!

² Manbibilay itayo ed panaon ya dakel so singa bagyo iran problema. Lalon onuuges so situasyon ed mundo. Balet walay naasinggeran tayo. Sakey ya napansalimbengan odino proteksion pian agnaderal so espiritualidad tayo. Anto itan? Imanoen pay ibabangat na Biblia: “Ibagak ed si Jehova: ‘Sikay pansasalimbengan ko tan say panag-amotan ko, say Dios ko a panmamatalkan ko.’”​—Salmo 91:2.

3. Panon ya magmaliw a proteksion tayo si Jehova?

³ Isip mo pa! Si Jehova, say Manamalsa tan  Soberano ed uniberso, so proteksion tayo. Protektaan to itayo ta sikatoy mas makapanyari nen say anggan siopa odino antokaman ya nayarin mameligro ed sikatayo. Tan anggano wala ray naeksperiensya tayon mauges, sarag ya ekalen nen Jehova so amin a makapuy ya epekto na saratan. Panon ya magmaliw a proteksion tayo si Jehova? Kaukolan tayoy mantiwala ed sikato. Sakey ni, bibilinen itayo na Salitay Dios: “Mansiansia kayo ed panangaro na Dios.” (Judas 21) On, kaukolan tayoy mansiansia ed panangaro na Dios, labay ton ibaga et pansiansiaen tayon maapit so pikakaaro tayo ed Ama tayod tawen. Diad ontan et seguradon protektaan to itayo. Balet panon tayon nawalaan na ontan ya maapit a relasyon?

4, 5. Anto ray pigara ed saray prueba ya inaro itayo nen Jehova?

⁴ Pian makapansiansia tayod panangaro na Dios, kaukolan tayon imanoen no panon ya impanengneng nen Jehova so panangaro to ed sikatayo. Isip mo ray pigaran naaralan mon bangat na Biblia diad sayan libro. Say Amalsa, si Jehova et inter tod sikatayo so balibalin dalin pian panayaman tayo. Inter to met iray dakerakel a naakan, danum, makapalikliket ya ayayep, balibali iran lugar, tan arum ni. Nanlapud sikato so Biblia tan impaamta tod sikatayo so ngaran to tan saray kualidad to. Sakey ni, ipapaamta na Salita to ya imbaki to diad dalin so inad-aro ton anak, si Jesus. Tan inabuloyan toy anak to ya manirap tan ompatey parad sikatayo. (Juan 3:16) Antoy niiter na satan ya regalo ed sikatayo? Nawalaan tayoy marakdakep ya arapen.

⁵ Wala ni sakey ya ginawa na Dios pian nawalaan tayoy ilalo, say gobierno to ed tawen odino Mesianikon Panarian. Magano lan panampoten na satan so amin ya kairapan tan pagmaliwen ton paraiso so dalin. Isip mo pa labat! Magmaliw lan mareen, maliket, tan tuloytuloy so pambilay tayo. (Salmo 37:29) Balet natan ni labat et inikdan itayo la na Dios na giya no panon ya magmaliw a maliket so bilay tayo.  Inikdan to itayo met na pribilehyon manpikasi ed sikato, pian makapitongtong ed sikato. Pigara labat iratan ed saray prueba ya inaro nen Jehova so amin a totoo tan sikan mismo.

6. Panon mon balesen so panangaro nen Jehova ed sika?

⁶ Importantin itepet tayod sarili tayo, Panon kon balesen so panangaro nen Jehova? Dakel so mangibagan, “Siempre, kaukolan ya aroen koy Jehova.” Ontan met kasi naliliknam? Oniay imbaga nen Jesus ya sankaimportantian ya ganggan: “Arom si Jehova a Dios mo ed interon pusom tan interon kamarerwam tan interon nonot mo.” (Mateo 22:37) Seguradon dakel so rason mo pian aroen si Jehova a Dios. Balet duga la kasi itan ya naliliknam ya panangaro pian nibagan aaroen moy Jehova ed interon pusom, kamarerwam, tan nonot mo?

7. Duga la kasin basta naliliknam ya inarom so Dios? Ipaliwawa.

⁷ Ibabaga na Biblia ya say panangaro ed Dios et aliwa labat a basta nalilikna. Diad tua, anggaman importante so naliliknan panangaro ed si Jehova, gapoan labat itan na tuan panangaro ed sikato. Singa bilang, say bukel na mansanas et importante pian ontubo so sakey ya manbubungan kiew ya mansanas. Balet, no labay moy mansanas, kontento ka la kasi no say iter dad sika et bukel labat? Siempre andi! Mipadpara, say naliliknan panangaro ed si Jehova et gapo ni labat. Ibabangat na Biblia: “Saya so kabaliksan na panangaro ed Dios, ya unoren tayo ray ganggan to; tan saray ganggan to et aliwan makapabelat.” (1 Juan 5:3) Pian magmaliw a tua so panangaro tayod Dios, kaukolan ya manbunga itan na “maong.” Nepeg ya nanengneng itan ed gagawaen tayo.​—Basaen so Mateo 7:16-20.

8, 9. Panon tayon nipanengneng so panangaro tan pisasalamat tayod Dios?

⁸ Ipapanengneng tayon inaro tayoy Dios no uunoren tayo ray ganggan to tan tutumboken tayo ray prinsipyo to. Aliwan mairap ya gawaen itan. Imbes a magmaliw a pabelat, saray  ganggan nen Jehova et ontulong ed sikatayo pian magmaliw itayon kontento tan maliket. (Isaias 48:17, 18) No uunoren tayoy panangigiya nen Jehova, nipanengneng tayod sikato ya talagan papablien tayoy amin a ginawa to parad sikatayo. Makapaermen balet ta pigpigara labat ed mundo natan so mamapabli ed satan. Agtayo labay ya aligen so arum ya totoo nen wadia nid dalin si Jesus. Pinaabig nen Jesus so samploran akating, balet saksakey so pinmawil ya akisalamat ed sikato. (Lucas 17:12-17) Seguradon labay tayon aligen iman ya too, aliwan saramay siamera ya agda amtay misalamat!

⁹ Anto sirin iray ganggan nen Jehova ya kaukolan tayon unoren? Inaral tayo lay pigarad saratan diad sayan libro, balet pantongtongan tayo lamet so arum ed saratan. No unoren tayo ray ganggan na Dios, ontulong itan pian makapansiansia itayod panangaro to.

10. Ipaliwawa no akin ya importantin tuloytuloy ya kabaten si Jehova a Dios.

¹⁰ Importantin kabaten moy Jehova pian napaelet moy relasyon mod sikato. Kaukolan ya  tuloytuloy mon gawaen itan. Singa bilang, no diad labi et wala kad paway ya grabe betel tan mandadangdang ka, paulyanan mo kasin kalkalnan naerep so apoy? Andi. Sungloran mo itan pian mansiansian marngat tan ampetang. Nayarin napeligroy bilay mo no naerep itan! No panon ya kaukolan ya sungloran so apoy pian tuloytuloy so dalang to, kaukolan met so “kakabatan nipaakar ed Dios” pian mansiansian malet so panangaro tayod si Jehova.​—Proverbio 2:1-5.

11. Antoy epekto na impanbangat nen Jesus ed saray patumbok to?

¹¹ Labay nen Jesus ya mansiansia tan malet so panangaro na saray patumbok to ed si Jehova tan ed mabmablin katuaan ya walad Salita To. Kayari inkioli nen Jesus, imbangat tod duaran disipulo to iray arum ya propesiya ed Hebreon Kasulatan ya agawad sikato. Antoy epekto to ’tan ed sikara? Imbaga da: “Agta singa onaapoy so puso ta nen mitotongtong [si Jesus] ed sikata diad dalan, legan ton lulukasan ed sikata so Kasulatan?”​—Lucas 24:32.

12, 13. (a) Diad panaon tayo, antoy nagagawad panangaro na totoo ed Dios tan ed Biblia? (b) Antoy gawaen tayo pian ag-ombetel so panangaro tayo?

¹² Nen inmunan naaralan mo no anton talagay ibabangat na Biblia, agta aliknam ya singa onaapoy so pusom, malikeliket tan maligligsa ka, tan inad-arom so Dios? Seguradon ontan. Tan alikna met itan na arum. Say kaukolan tayon gawaen natan et no panon tayon napansiansia tan lalo nin napaaralem itan ya panangaro. Agtayo labay ya aligen iray totoo ed mundo natan. Impasakbay nen Jesus: “Ombetel so panangaro na karaklan.” (Mateo 24:12) Antoy gawaen mo pian ag-ombetel so panangarom ed si Jehova tan ed katuaan ya walad Biblia?

¹³ Itultuloy mon kabaten si Jehova a Dios tan si Jesu-Kristo. (Juan 17:3) Dalepdep mo odino nonot mon maong so nanaaralan mod Salita na Dios. Tan tepetan moy sarilim: ‘Antoy naaralan kod saya nipaakar ed si Jehova a Dios? Panon iyan makatulong ed siak pian sikatoy aroen ko ed interon pusok, nonot, tan kamarerwak?’ (Basaen so 1 Timoteo 4:15.) No  ontan so gawaen mo, mansiansian ampetang so panangarom ed si Jehova.

14. Panon ya makatulong so pikakasi pian mansiansian malet so panangaro tayod si Jehova?

¹⁴ Say sakey nin paraan pian mansiansian ampetang so panangarom ed si Jehova et say naynay a pampikasi. (1 Tesalonica 5:17) Diad Kapitulo 17 na sayan libro, naaralan tayo ya say pikakasi et mablin regalo na Dios. Onelet so relasyon na duaran too no naynay iran mantotongtong. Mipadpara, mansiansian ampetang tan malet so relasyon tayod si Jehova no naynay tayon manpikasi ed sikato. Agtayon balot aabuloyan ya magmaliw ya apasakey so pikakasi tayo, labay ton ibaga et uulit-uliten tayoy ibabaga tayo balet ta agmanlalapud puso odino anggapoy kabaliksan to. No mitongtong tayod si Jehova, kaukolan ya singa tayo sakey ya anak ya mitotongtong ed inad-aro ton ama. Siempre, labay tayon marespeto, prangka, matua, tan manlapud puso so pitotongtong tayo. (Salmo 62:8) On, importantin kabiangan na panagdayew tayo so personal a panagaral na Biblia tan impapuson pikakasi, tan makatulong iratan pian mansiansia itayod panangaro na Dios.

15, 16. Akin et duga labat ya ipasen tayon baleg a pribilehyo tan kayamanan so pangipulong ed Panarian?

¹⁵ Say personal a panagaral na Biblia tan pikakasi et kabiangan na panagdayew ya nayari tayon gawaen anggan bukbukor tayo. Balet natan et pantongtongan tayoy sakey nin kabiangan na panagdayew ya gawaen tayo ed publiko: ibaga tayod arum so papanisiaan tayo. Ipapaamtam la kasi ed arum so pigaran katuaan ya walad Biblia? No ontan, baleg itan ya pribilehyom. (Lucas 1:74) No ipapaamta tayo so katuaan a naaralan tayo nipaakar ed si Jehova a Dios, uunoren tayoy importantin ganggan ya inter ed amin a tuan Kristiano, say pangipulong ed maong a balita na Panarian na Dios.​—Basaen so Mateo 24:14; 28:19, 20.

¹⁶ Parad si apostol Pablo, say ministeryo to et mabmabli  kanian tinawag to itan a kayamanan. (2 Corinto 4:7) Say pangipaamtad totoo nipaakar ed si Jehova a Dios tan ed saray gagala to so sankaabigan a kimey ya nagawaan mo. Panaglingkor itan ed sankamaongan ya Katawan, tan nabendisyonan tayon maong ed satan. No kaiba kad satan ya kimey, tutulongan mo ray totoon labay dan nakabat so Ama tayod tawen  pian nawalaan met iray ilalon manbilay ya tuloytuloy! Wala ta ni kimey ya mas makapaliket nen say satan? Sakey ni, no ibabagam ed arum so nipaakar ed si Jehova tan say Salita to, mas ombiskeg so pananisiam tan onelet so panangarom ed sikato. Seguradon aglingwanan nen Jehova iray sakripisyom. (Hebreo 6:10) No makuli kad satan ya kimey, makatulong itan ed sika pian mansiansia kad panangaro na Dios.​—Basaen so 1 Corinto 15:58.

17. Akin et apuraan natan so ministeryo na saray Kristiano?

¹⁷ Importantin tandaan tayo ya apuraan so kimey a panangipulong ed Panarian. Ibabaga na Biblia: “Ipulong mo so salita; maganat mon gawaen itan.” (2 Timoteo 4:2) Akin et apuraan itan natan? Ibabaga ed sikatayo na Salitay Dios: “Asingger lay baleg ya agew nen Jehova! Asingger la itan tan mapmaples ya onsasabi!” (Sofonias 1:14) On, asingsingger lan panampoten nen Jehova iyan mauges a mundo. Kaukolan ya pasakbayan so totoo! Kaukolan dan naamtaan ya natan lay panaon pian pilien dan panlingkoran si Jehova, say Soberano ed uniberso. ‘Agmanbayag’ et onsabi lay anggaan.​—Habacuc 2:3.

18. Akin et nepeg tayon dayewen si Jehova kaiba iray tuan Kristiano?

¹⁸ Labay nen Jehova a sikatoy dayewen tayo kaiba iray tuan Kristiano. Kanian imbaga na Salita to: “Nonoten tayoy sakey tan sakey pian makapansasagyatan itayo a mangaro tan manggaway maabig iran kimey, ya agtayo papaulyanan so pantitipon tayo, a singa niyugali na arum, noagta manpapasesegan itayo, nagkalalo la ta nanenengneng yon manasingger lay agew.” (Hebreo 10:24, 25) No miulop tayod saray kaagian tayo diad saray pantitipon, pankanawnawa tayon idayew tan panlingkoran so inad-aro tayon Dios. Napabiskeg tan napaseseg tayo met so sakey tan sakey.

19. Panon tayon napaelet so panangaro ed interon kongregasyon?

¹⁹ No mimiulop tayod arum ni ran mandadayew ed si Jehova, napapaelet tayoy panangaro tan pankakaaro na interon kongregasyon. Importantin say nengnengen tayo et saray maong ya ugali na kada sakey, ta ontan met so nenengnengen  nen Jehova ed sikatayo. Agmo iilaloan ya perpekto iray kaagian mo. Tandaan, nandurumay iyaaligwas na espiritualidad tayon amin tan kada sakey et nalilingo. (Basaen so Colosas 3:13.) Pilim ya pikaaroan iramay mangaaron maong ed si Jehova, pian ombiskeg so espiritualidad mo. On, no mandayew kad si Jehova kaiba iray espiritual ya agagim, natulongan kan mansiansiad panangaro na Dios. Panon ya bendisyonan nen Jehova iray matoor a mandadayew ed sikato pian mansiansia rad panangaro to?

20, 21. Anto so “tuan bilay,” tan akin ya talagan balibali itan ya ilalo?

²⁰ Bilay so iter nen Jehova ed saray matoor a lingkor to, balet anton klase na bilay? Nibagam kasi ya sayan bilay ya walad sikatayo natan so tuan bilay? Dakel so mangibagay on, ta oniingas, mamangan, tan oniinum itayo. Tua, mabilay tayo, tan no manliliket tayo, ibabaga tayo ni ingen, “Aya so bilay!” Balet, ipapanengneng na Biblia ya aliwa nin saya so tuan bilay.

²¹ Bibilinen itayo na Salitay Dios ya komon et ‘nabembenan tayon malet so tuan bilay.’ (1 Timoteo 6:19) Ipapanengneng na saratan ya salita ya say “tuan bilay” et dia nid arapen. On, no perpekto tayo la, nibagan atan so tuan bilay ta atan so talagan labay na Dios ya klase na bilay parad sikatayo. No manbilay itayo lad paraiso diad dalin ya perpekto lay laman tayo, walay kareenan, tan maliket tayo, na-enjoy tayo lan siansia so “tuan bilay”​—say pambilay ya tuloytuloy. (1 Timoteo 6:12) Agta talagan balibali itan ya ilalo?

22. Panon mon ‘nabembenan a malet so tuan bilay’?

²² Panon tayon ‘nabembenan a malet so tuan bilay’? Pinaseseg nen Pablo iray Kristiano ya “manggawa ray maong” tan “magmaliw iran mayaman ed saray maabig a gawa.” (1 Timoteo 6:18) Malinew sirin ya akadepende itan ed pangiyaaplika tayod saray katuaan ya naaralan tayod Biblia. Balet kasin say labay ya ibaga nen Pablo et upa ed sikatayo so “tuan bilay” lapud saray maabig a gagawaen tayo? Andi. Say akadependian na pakaawat tayod satan ya balibalin ilalo et say “agnaparaan  a kaabigan” na Dios. (Roma 5:15) Balet, maliket si Jehova ya bendisyonan iramay matoor a manlilingkor ed sikato. Labay ton panliketan mo so “tuan bilay.” Satan ya maliket, mareen, tan tuloytuloy ya pambilay et iregalo ed saray mansiansiad panangaro na Dios.

23. Akin et importante ya mansiansia kad panangaro na Dios?

²³ Nepeg ya itepet na kada sakey ed sikatayo, ‘Kasin based Biblia so paraan na pandadayew kod Dios?’ No inagew-agew tayon seseguroen ya on so ebat tayo, dugay gagawaen tayo. Makapantiwala tayo ya protektaan itayo nen Jehova. Protektaan to ray matoor a totoo to diad sayan mapeligron kaunoran ya agew na mauges a mundo. Igiya to tayo met ed balibalin balon mundo ya asingsingger la. Seguradon malikeliket tayo no onsabi la itan a panaon! Tan agtayo magbabawi ta dugay ginawa tayon desisyon ed sarayan kaunoran ya agew! No mandesisyon kan ontan so gawaen mo natan, nawalaan kay “tuan bilay,” say bilay a labay nen Jehova a Dios parad sika, say pambilay ya tuloytuloy!