PART 1
“Anapen Ko Iramay Nababalang”
Walay karneron nababalang. Nayarin legan ya sikatoy mankakabkab na dika, agto aliklikas ya sikatoy akaarawi ed arum a karnero. Arawrawi la tan agto la nanengneng so pulok pati samay pastol to. Ombibilunget la tan delikado imay lugar ya asurob to ta dakdakel dimay masisibeg ya ayep. Pakaskasi imay karnero. Balet, biglan nadngel toy boses na pastol to. Inmasingger ya tampol imay pastol, ineba to, sinakbongan to na latop to, tan insempet to.
AMINPIGAN inkompara nen Jehova so sarili to ed ontan ya pastol. Diad Biblia et oniay impaseguro to ed sikatayo: “Siak a mismo so mananap ed saray karnerok, tan siak so mangasikaso ed sikara.”—Ezequiel 34:11, 12.
“Saray Karneron Aasikasoen ko”
Siopa ray karnero nen Jehova? Saray totoo ya mangaaro tan mandadayew ed sikato. Ibabaga na Biblia: “Gali dia, ta mandayew tan ondakmomo tayo; ontalimukor tayod arapan nen Jehova a Manamalsa tayo. Ta sikato so Dios tayo, tan sikatayo ray totoon walad panagpastolan to, saray karnero a walad panangasikaso to.” (Salmo 95:6, 7) Singa saray literal ya karnero ya uunoren day pastol da, saray mandadayew met ed si Jehova et labalabay dan unoren so pastol da. Kasin agnalilingo iray lingkor na Dios? Andi. Diad Biblia, no maminsan et natatawag iran “nitaytayak a karnero,” tan “nababalang a karnero.” (Ezequiel 34:12; Mateo 15:24; 1 Pedro 2:25) Balet, anggan makaarawi so sakey a lingkor to, lanang ya tatalaranan nen Jehova so ipawil to.
Parad sika, kasin si Jehova nin siansia so Pastol mo? Akin ya segurado tayon si Jehova so Pastol tayo? Niraya so taloran gagawaen to:
Papakanen to tayo ed espiritual. “Pakanen ko rad maabig ya panagpastolan,” so kuan nen Jehova. “Ondukol ira ditan ed maabig a dalin a panagkabkaban, tan mangan ira ed maabig a panagpastolan.” (Ezequiel 34:14) Agbalot onkukulang si Jehova ed pangitatarya to na saray nanduruma tan nipanpanaon ya espiritual ya naakan. Kasin walay naisip mon artikulo, paliwawa, odino video ya ebat ed saray pikakasim? Agta prueba itan ya inar-aro ka nen Jehova?
Proprotektaan tan tutulongan to tayo. Oniay insipan nen Jehova: “Anapen ko iramay nababalang, tiponen ko iramay niyarawi, bedberan ko iramay apiley, tan pabiskegen ko iramay makapuy.” (Ezequiel 34:16) Papabiskegen nen Jehova iramay kinmapuy odino sobra lay kapagaan da. Singa to bebedberan so sugat na saramay asakitan, anggano say akasakit ed sikara et kaagian da. Tan tutulongan ton makapawil iramay akaarawi ya ngalngali agda nalabanay negatibon liknaan da.
Agto tayo papaulyanan. “Ililiktar ko ra ed amin a pasen a nitayakan da,” so kuan nen Jehova. “Anapen ko iramay nababalang.” (Ezequiel 34:12, 16) Ag-iisipen nen Jehova ya no abalang so sakey ya karnero et agla makapawil. Amta to no walay karnero ya nababalang, tan sikaton mismo so mananap ed satan, tan sikatoy malikeliket no naalmo to. (Mateo 18:12-14) Diad tua, say impanawag to ed saray mandadayew ed sikato et “sikayoran karnerok, saray karneron aasikasoen ko.” (Ezequiel 34:31) Sakey ka ed saraman ya karnero.
Ag-iisipen nen Jehova ya no abalang so sakey ya karnero et agla makapawil. Sikatoy malikeliket no naalmo to itan ya karnero
“Pasimbalom Iray Agew Mi a Singa Nensaman”
Akin ya aanapen ka nen Jehova tan akin ya labay ton ompawil kad sikato? Lapud labay ton magmaliw kan maliket. Insipan to ya “onuran na bendisyon” ed saray karnero to. (Ezequiel 34:26) Tua itan tan apruebaan mo lan mismo.
Pawil mo pa ray eksperiensyam nen akabat moy Jehova. Singa bilang, antoy aliknam nen unaan mon naamtaan so katuaan nipaakar ed ngaran na Dios tan say gagala to parad totoo? Nonot mo pa may liket ya naliliknam no kaibam iray agagi ed saray asemblea tan kombension? Agta balibali liknaan mo nen walay apulongan mo ya interesado?
Sarag mon nalikna lamet iraman. Oniay impikasi na saray lingkor na Dios nensaman: “Papawil mo kamid sika O Jehova, tan mabulos kamin ompawil ed sika. Pasimbalom iray agew mi a singa nensaman.” (Tagleey 5:21) Inebatan nen Jehova itan ya pikakasi, tan malikeliket lamet ya nanlingkor iray totoo to. (Nehemias 8:17) Ontan met so labay nen Jehova ya gawaen ed sika.
Balet, ompan diad unaan et singa mairap so ompawil ed si Jehova. Amtaen no anto ray rason no akin ya aliwan mainomay so ompawil tan no panon mon nasarag iratan.
