PARAD ATATENG
7: Prinsipyo
NO ANTOY LABAY YA IBAGA NA SATAN
Saray prinsipyo et estandarte na kabibilay na sakey. Singa bilang, kasin panseseetan moy magmaliw ya matua ed amin a bengatla? Seguradon labay mon ipurek itan ya prinsipyo ed ananak mo.
Kaiba met ed prinsipyo iray maong ya ugali. Singa bilang, say pagmaliw ya makuli, patas, tan makonsidera ed arum—saray ugali ya dapat ya naaralan la na sakey legan ya ugaw ni.
PRINSIPYO ED BIBLIA: “Ipasal moy ugaw ed dalan a nepeg ton laen; anggan sano ontatken la et ag-onsian ditan.”—Proverbio 22:6.
NO AKIN YA IMPORTANTE
Diad sayan panaon ya hi-tech la, importante so prinsipyo ed moral. “Saray mauges ya impluensya et main-inomay ya nanengneng ed anggan anton gadyet,” so kuan na sakey ya ina a si Karyn. “Ompan kaabay tayon tua iray anak tayo pero manbabantay ira manaya na mabanday!”
PRINSIPYO ED BIBLIA: “Saray matatken la [et walay] pakayari ran manebek . . . a mangibiig ed duga tan aliwa.”—Hebreo 5:14.
Importante met iray maong ya ugali. Kaiba ed satan so pangigalang (singa say pangibaga na “ipangasi” tan “salamat”) tan malasakit ed arum—ugali ya mataltalag la natan, ta mas akapokus la ray totoo ed saray gadyet.
PRINSIPYO ED BIBLIA: “Say labay yon gawaen na totoo ed sikayo, gawa yo met ed sikara.”—Lucas 6:31.
NO ANTOY NAYARIN GAWAEN MO
Ibangat mod sikara iray prinsipyom ed moral. Singa bilang, base ed research, saray tinedyer et mas mainomay dan tanggian so pi-sex antis na kasal no malinew ya nibangat ed sikara ya mauges itan.
SUHESTION: Usaren iray balon balita pian nigapom ya itongtong iray prinsipyom. Singa bilang, no wala ray report nipaakar ed graben krimen, nayarin ibagam: “Grabe so gagawaen na arum ya totoo lapud sanok da. Parad sika, akin et nagmaliw iran ontan?”
“Mas mairap parad saray ugugaw so manpili no antoy duga tan aliwa no agda amta no antoy duga odino aliwa.”—Brandon.
Ibangat iray maong ya ugali. Anggan saray melag nin ugugaw et sarag da lan naaralay mangibaga na “ipangasi” tan “salamat” tan mangipanengneng na malasakit ed arum. “No nanenengneng na ugugaw ya kabiangan ira na mas baleg ya grupo—singa say pamilya, eskuelaan, tan komunidad—mas akaparaan iran manggawa na kamaongan parad pankaabigan na arum, aliwan parad sarili da labat,” so imbaga na libron Parenting Without Borders.
SUHESTION: Ikdan na kimey ed abung iray ananak mo pian naaralan da ya importante so manserbi ed arum.
“No nipasal iray ananak ya mankimey ed abung, ag-ira nabigla no mansarili la ra. Amta da lan gawaen iray responsabilidad da.”—Tara.
