Nayarian Moy Nawalaan na Tuan Pananisia

Sanen mantaon na 19 si Sarah Jayne, naamtaan ton walay kanser to ed obaryo. Kayari na operasyon, inmabig so kipapasen to tan sikatoy positibo nipaakar ed arapen. Diad tua et sikatoy positibon tuloy lapud sanen sikatoy mantaon na 20, sikatoy akisipanan tan namplano lan manpakasal. Diad saman met a taon et pinmawil so kanser, tan naamtaan ton pigaran simba labat so pambilay to. Inatey si Sarah Jayne nen Hunyo 2000, sakbay ni na pan-21 to.

SAY nandinayewan na saray binmisita ed si Sarah Jayne diad ospital et say agnagiing a kompiyansa to nipaakar ed arapen, ontan met ed say aralem a pananisia to ed Dios tan ed Salita to, say Biblia. Anggaman ed graben trahedya a kidudungetan to, sikatoy segurado ed ilalon kioli​—a napinengnengan to lamet so amin a kaaro to. (Juan 5:28, 29) “Nengnengen ta kayon amin diad balon mundo na Dios,” so inkuan to.

Ipapasen na arum itan a klase na pananisia bilang kugip. Intepet nen Ludovic Kennedy: “Anto ta ni itan a biek a bilay noagta say sisiaen labat na saray agmaligen, a diad unor a pantorotot et niparaan ed sikara so cake tan serbesa, pati caviar tan say tanol met na saray trumpeta, a diad mabunan pasen na Eden et miliket ira ed saramay inmuna lan inaatey tan ed arum niran ontumbok ya ompatey?” Unong ed satan a balikas, nepeg tayoy mamalesa na pangontra a tepet. Dinan so mas makatunongan​—say panisia a “sayan bilay et mogmo la, kanian sigpot tayo lan anamoten itan,” a singa ipapasagilig nen Kennedy, odino say panisia ed Dios tan ed sipan ton kioli? Pinili nen Sarah Jayne so unor. Panon ton abayuboan so ontan a pananisia?

 ‘Anapen so Dios . . . tan Sikato so Naromog’

Pian nabayuboan so pananisia tan panagmatalek ed siopaman, kaukolan a sikatoy kabaten mo tan amtaen so panagnonot tan kakikiwas to. Lalanoren na sayan paraan so puso pati say isip. Miparan tuloy iya no nipaakar ed pamayubo na tuan pananisia ed Dios. Sikatoy kaukolan a kabaten mo, pian naamtaan mo iray kalidad tan personalidad to, pian napaneknekan mo no panon a sikatoy peteg a napanmatalkan tan napanpiaan ed amin ya imbaga tan ginawa to.​—Salmo 9:10; 145:1-21.

Liknaen na dakel ya imposible iya. Ibabaga ran say Dios so arawin tuloy, mairap a narandan​—no peteg a sikatoy wala. Onia so itetepet na manduaruwa: “No bilang ta tudtua so Dios unong ed saray Kristiano a singa si Sarah Jayne, akin ya agto ipakabat so inkasikato diad arum ed sikatayo?” Balet peteg kasin say Dios so arawin tuloy tan agnaromog? Diad pitotongtong to ed saray pilosopo tan atagey ya aral diad Atenas, inkuan nen apostol Pablo a “say Dios a nanggawa ed mundo tan saray amin a bengatla a wala ed sikato” so angitarya met ed amin a nakaukolan pian “[sikatoy] anapen da . . . tan sikato so naromog da.” Diad tua et inkuan nen Pablo: “[Sikato] so wala ed ag-arawi ed sinansakey ed sikatayo.”​—Gawa 17:24-27.

Sirin, panon yon ‘naanap so Dios . . . tan sikato so naromog yo’? Arum so nanggawa ed saya panamegley lambengat na impangobserba ra ed uniberso a walad kaliberliber da. Parad dakel, satan labat et magenap lan paneknek pian nakombinse ira a talagan wala so Manamalsa. * (Salmo 19:1; Isaias 40:26; Gawa 14:16, 17) Mipara so liknaan da ed si apostol Pablo, a “saray bengatla ya agnanengneng a kien [na Dios], say andi-anggaan a pakayari to tan inkadibino to nanengneng a manlapu ed inkapalsa’y mundo, natalosan ira unong ed saray bengatla ya agawa.”​—Roma 1:20; Salmo 104:24.

Nakaukolan Mo so Biblia

Anggaman ontan, pian niletneg so peteg a pananisia ed Manamalsa, kaukolan mo so sananey nin bengatla ya intarya to. Anto itan? Say Biblia​—impuyan a Salitay Dios, a pangipaparungtalan to na linawa tan gagala to. (2 Timoteo 3:16, 17) “Balet maya ka pa,” so kuan na arum, “panon mon napanisiaan so antokaman ya ibabaga na Biblia no nanenengneng mo iray teriblin bengatla a gagawaen na totoo a mankuan a manutumbok ed Biblia?” Tua, say Kakristianoan so walaay makapakebbiew a rekord na pansimpisimpitan, inkaruksa, tan imoralidad. Balet nayarin natebek na siopaman a makatunongan a too a say Kakristianoan so mankuankuanan lambengat a manutumbok ed saray prinsipyo na Biblia.​—Mateo 15:8.

Impasakbay na mismon Biblia a dakel so totoon mankuan a dadayewen da so Dios balet diad tua et “ibeneg da ingen so Managbangat ya analiw ed sikara.” “Lapu ed satan,” kuan nen apostol Pedro, “say dalan na katuaan napauges naani.” (2 Pedro 2:1, 2) Inkuan nen Jesu-Kristo a saraya so “managgawa na kaugsan” a mabitabitar a nabibidbiran lapud mauges iran kiwas da. (Mateo 7:15-23) No ipulisay so Salita na Dios lapu ed rekord na Kakristianoan, singa itan pangibantak ed sakey a sulat a nanlapud napanmatalkan a kaaro lapu lambengat ta aliwan respetado so toon angitulor ed satan.

Imposible a niletneg so peteg a pananisia no anggapoy Salita na Dios. Ipaparungtal nen Jehova so kipapasen to diad panamegley lambengat na saray pahina na Biblia, a singa panangibaga. Ipaparungtal toy ebat ed saray naynay lan itetepet a singa say, no akin ya aabuloyan to so paniirap tan ot-ot tan no anto so gawaen to nipaakar ed satan a kipapasen. (Salmo 119:105; Roma 15:4) Si Sarah Jayne so anisia a say Biblia et pinuyanan a Salita na Dios. (1 Tesalonica 2:13; 2 Pedro 1:19-21) Panon? Aliwan lapu lambengat ta ontan so imbaga ed sikato na saray ateng to, noagta lapud sikatoy angiganay panaon pian matuan usisaen so amin a paneknek a say Biblia so nikadkaduman puyan a manlalapud Dios. (Roma 12:2) Alimbawa, naimatonan to so mabiskeg ya impluensya na Biblia ed kabibilay na saramay manutumbok ed saray prinsipyo na satan. Diad tulong na saray publikasyon a singa say The Bible​—God’s Word or Man’s?, * maalwar to met ya inusisa so dakerakel ya akindalem ya ebidensya a mamapaneknek ed panangipuyan na Dios.

 “Say Pananisia Manlapu ed Pandengel”

Anggaman ontan, aliwan magenap so basta pakawalaan na Biblia odino anggan say panisian satan so impuyan. Oniay insulat nen apostol Pablo: “Say pananisia manlapu ed pandengel.” (Roma 10:17) Say pandengel ed Biblia, aliwan say basta pakawalaan na Biblia, so mamabiskeg na pananisia. “Dengelen” mo so ibabaga na Dios diad pambasa tan panaral ed Salita to. Saya so nagawaan na anggan saray ugugaw ni. Inkuan nen Pablo a “nanlapu ed inkaugaw” et abangatan si Timoteo ed “saray masanto a Sulsulat” panamegley na ina tan bai to. Kasin isusuheri na saya a nalalanor dia so panamilit? Andi! Si Timoteo so agbinanlongan odino pinalikdo ed antokaman a paraan. Sikatoy ‘anisia’ ed bengatlan nadngel tan abasa to.​—2 Timoteo 1:5; 3:14, 15.

Si Sarah Jayne so atangguyor ed ontan met a paraan. Singa saray inmunan-siglon taga-Berea, “inako [to] so salita ed sipaparaan a nonot” manlapud atateng to tan arum niran managbangat. Bilang melag ya ugaw, andi-duaruwan sikatoy kasiporan a nanmatalek ed walan imbaga’d sikato na atateng to. Legan na ibabaleg to, diad saginonor, sikatoy agnambulag-bulagan odino paspasaray ya angawat ed amin a bengatlan imbangat ed sikato. ‘Inusisa to so Kasulatan ya inagew-agew, no kasin peteg irayan bengatla.’​—Gawa 17:11.

Niletneg Mo So Tuan Pananisia

Sika met so makapangiletneg na tuan pananisia​—say klase na pananisia a deneskribe nen apostol Pablo ed sulat to diad saray Hebreon Kristiano. Inkuanto a satan a pananisia et “sikato so agpanduaruwa ed saray bengatla ya iilaloan, say panangipatnag ed saray bengatla ya agni anengneng.” (Hebreos 11:1) No walaan ka na ontan a pananisia, peteg a makapanseguro ka ya amin ed iilaloan tan tatalaranan mo, laktip lay sipan na Dios a kioli, so nagawa. Makapanisia ka a say ontan iran iilaloan so nibase ed segurado iran garantiya, aliwan ed pirawat labat na kanonotan. Naamtaan mo ya agbalot onsasaew si Jehova a manumpal ed saray sipan to. (Josue 21:45; 23:14; Isaias 55:10, 11; Hebreos 6:18) Magmaliw a tudtua ed sika so sipan na Dios a balon mundo a singano wadia la itan. (2 Pedro 3:13) Tan nanengneng mon malinew panamegley na saray mata na pananisia a si Jehova a Dios, si Jesu-Kristo, tan say Panarian na Dios so petepeteg ya amin, aliwan kugkugip.

Agmo niletneg a bukbukor so tuan pananisia. Nilikud ed impangitarya to na Salita to, intarya met nen Jehova so sankamundoan a Kristianon kongregasyon a maseseg ya ontutulong ed maptek-impanpuson  totoo ya iletneg so pananisia ed Dios. (Juan 17:20; Roma 10:14, 15) Awaten so amin a tulong ya itatarya nen Jehova panamegley na satan ya organisasyon. (Gawa 8:30, 31) Tan lapud say pananisia et sakey a bunga na espiritu, mantultuloy ya ipikasi itan ya espiritu ya ontulong ed sika pian nabayuboan so tuan pananisia.​—Galacia 5:22.

Agpadidismaya ed saray manduaruwa a mamabalaw ed siopaman a mangipapatua na pananisia ed Dios tan ed Salita to. (1 Corinto 1:18-21; 2 Pedro 3:3, 4) Diad tua et baleg so kablian na tuan pananisia diad pamabiskeg na talindeg mo sumpad saratan a panagderal. (Efeso 6:16) Apaneknekan nen Sarah Jayne a tua itan, tan lawas ton pinaseseg iraman so binmisita ed sikato diad ospital a pabiskegen dan mismo so pananisia ra. Onia so imbabaga to: “Kayarianen yo so katuaan. Aralen yo so Salita na Dios. Mansiansia kayon maapit ed organisasyon na Dios. Mantultuloy kayon manpikasi. Mansiansia kayon aktibo ed panaglingkor ed si Jehova.”​—Santiago 2:17, 26.

Lapud impakaimano ed pananisia nen Sarah Jayne ed Dios tan ed kioli, oniay inkuan na sakey ed saray nars to: “Talagan manisia ka ed saya, agta ontan.” Sanen tinepetan no antoy angiter ed sikato na ontan a positibon panmoria anggaman ed saray subok ed sikato, onia so inyebat to: “Say pananisia ed si Jehova. Sikato so peteg a kaarok, tan sikatoy pinabpablik a maong.”

[Saray paimano ed leksab]

[Litrato ed pahina 6]

“Nanlapu ed inkaugaw” et abangatan si Timoteo na “saray masanto a Sulsulat” panamegley na ina tan bai to

[Litrato ed pahina 6]

Saray taga-Berea so kinomendaan lapud panangusisa ra ed Kasulatan ya inagew-agew

[Credit Line]

Nanlapud “Photo-Drama of Creation,” 1914

[Saray litrato ed pahina 7]

Say pandengel tan panmorekdek ed Biblia, aliwan say basta pakawalaan na satan, so mamabiskeg na pananisia

[Litrato ed pahina 7]

“Nengnengen ta kayon amin diad balon mundo na Dios”