Peteg Kasin Nakabat Tayo so Dios?

“Saya sikato so andi-anggaan a bilay, a naamtaan da . . . [so] saksakey a tuan Dios.”—Juan 17:3.

“O  SAY kaaralman na kayamanan na kakabatan tan pakaamta na Dios!” so inkelyaw nen apostol Pablo. Tan inyarum to: “Agaylan agnausisa a kanonotan to, tan agnatebek ira a dalan to!” (Roma 11:33) Base’d sarayan salita, kasin isipen tayo la ya agnatukor na too so kakabatan tan pikakabat na Dios, kanian sikato so imposiblin nakabat ontan met ed saray gagala to?

Unong ed saramay manutumbok ed relihyoson pilosopiya a kabkabat a via negativa, say ebat et on. Oniay imbaga na The Encyclopedia of Religion nipaakar ed sayan pilosopiya: “Palumbasan na Dios so amin a nayarin naamtaan nipaakar ed sikato. . . . Say Dios so agnangaranan odino nadeskribe. Antokaman ya ingaran odino paneskribe ed sikato et walaan na limitasyon, tan atagey so Dios . . . nen saratan. . . . Sikato so agnepeg a kabaten, ta sikato so agnakabat.” *

Unong ed Newsweek a magasin, dakel ya indibidual ed sekular iran sosyedad so manmamatalek ed “sakey a klase na balon bangat ya aawaten na karaklan” a bilang resulta et manisia ira a “wala labat so sakey a katuaan, tan sayan katuaan et anggapo so katuaan.”

Siansia ni, dakel so agmakakaromog na ebat ed saray tepet a nipaakar ed gagala na bilay. Naiimatonan da so makapadetdet na liknaan iran problema a kairapay-bilay, sakit, tan karawalan. Parad sikara et makapadismayan tuloy so agpakaseguro ed bilay. Pirpirawat dan naromog iray ebat, balet sano agda iratan naromog, isipen da la ya anggapon talaga iratan. Bilang resulta, dakel ed sikara so oneekal ed sakey ya organisadon relihyon tan manaanap ira na dilin paraan da ed iyaasingger ed Dios, no bilang ta siansia nin manisia ra a sikatoy wala.

Say Panmoria na Biblia

Saramay walaan na paborablin opinyon nipaakar ed Biblia tan manisia a si Jesu-Kristo et Pinagkasangiyan na Dios so nepeg a magmaliw ya interesadon mangamta ed panmoria na Biblia. Nayarin nanonotan yo ya aminsan et sinaglawi nen Jesus so nipaakar ed duaran dalan, sakey a ‘maawang tan malapar a dalan, a mamaarap ed kadederal’ tan sakey a ‘makisir a dalan, a mamaarap ed bilay.’ Impaliwawa to no panon a  nabidbiran iramay ondadalan ed kada dalan, a kuan to: “Napatnagan yo ra lapud saray bunga ra.” Diad antoran klase na bunga? Aliwan diad saray ibabaga ra, noagta diad saray gagawaen da, unong ya impalinew nen Jesus: “Aliwan balang sakey a mankuan ed siak na, Katawan, Katawan, et onloob naani ed panariay tawen; noag ingen say mangunor na linawa nen Amak a wala ed tawen.” Aliwan magenap so basta pangibagan manisia itayo ed Dios. Nepeg tayon gawaen so linawa na Dios. Makatunongan labat sirin a sikatayoy nepeg a nawalaan nin unona na suston pikakabat ed linawa na Dios.—Mateo 7:13-23.

Impabitar nen Jesus a posiblin nagamoran na totoo so pikakabat nipaakar ed Dios. Inkuan to: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti [si] Jesu-Kristo.” (Juan 17:3) Mabitar a sarag tayon nagamoran so kakabatan tan say pikakabat ya ipaparungtal na Dios—daput no isekar tayoy inkasikatayo ya anapen iratan. Balet, bilay ya andi-anggaan so iregalo na Dios ed saramay manggawa ed satan, kanian seguradon makagunggona iyan panag-anap.

[Paimano ed leksab]

[Litrato ed pahina 4]

Inkuan nen Jesus a say makisir a dalan et mamaarap ed bilay