1, 2. Anton situasyon so naimano na saray manangasikaso na sirkito ed dakel a kongregasyon?

NGALNGALI la nasumpal so impimiting na manangasikaso na sirkito ed ulop na mamatatken. Naar-aro to irayan makukulin pastol, ya say arum ed sikara et singa to la ra ama lapud edad da. Balet walay bengatlan pampapagaan to, kanian tinepetan to ra, “Agagi, anto la ray agawaan yo pian nipasal so arum parad saray responsabilidad ed kongregasyon?” Amta ra ya nen imbeneg ya bisita et pinaseseg to ran mangiganay mas dakel ya panaon parad pangipasal ed arum. Oniay ebat na sakey ed saramay elder: “Diad tua et singa anggapo ni tanton agawaan mi.” Tan tinmanger met iramay arum ya elder.

² No sakey kan elder, kasin nanenengneng mo ya ontan met so situasyon ed kongregasyon yo? Posible. Naimano na saray manangasikaso na sirkito ed interon mundo ya diad dakel a  kongregasyon et kakkaukolan so pangipasal ed saray brother—ugaw man odino maedad la—pian makatulong irad pangasikaso ed pulok. Balet, nayarin nanairapan so arum ya gawaen itan. Akin?

3. (a) Panon ya ipapanengneng na Kasulatan ya importante so pangipasal, tan akin ya amin tayo et nepeg ya interesado ed saya? (Nengnengen so footnote.) (b) Akin ya wala ray elder ya iisipen dan mairap so pangipasal ed arum?

³ Bilang pastol, seguradon amta yon importante so pangipasal. * Amta yon kaukolan so dakel ya brother pian mansiansian mabiskeg so espiritualidad na kongregasyon tan pian nasuportaan iray naporman balon kongregasyon diad arapen. (Basaen so Isaias 60:22.) Amta yo met ya ibabaga na Biblia ya kaukolan yon ‘bangatan so arum.’ (Basaen so 2 Timoteo 2:2.) Anggaman ontan, ompan isipen yon mairap itan a gawaen, singa saramay elder ya abitlad gapo. Walay responsabilidad yod pamilya, trabaho, kongregasyon, tan wala ni ray arum ya bengatlan kakkaukolan yon gawaen, kanian singa anggapo lay panaon yon mangipasal ed arum. Aralen tayo sirin no akin ya importante nin siansia so mangiganay panaon parad pangipasal ed arum anggano dakel lay kimey yo.

4. Antoy sakey a rason no akin ya ipapaleen na arum ya elder so pangipasal ed arum?

⁴ Antoy sakey a rason no akin ya nanairapan iray elder ya ipanaon so pangipasal ed arum? Nayarin wala ray manisip ya: ‘Importante so pangipasal, balet ag-itan kakkaukolan no ikomparad arum ya kimey ed kongregasyon. Anggano agak ni mangipasal na arum, agnaapektoay kongregasyon.’ Tua, ompan dakel so kimey ya kakkaukolan ya ikday imano, balet no ipaleen so pangipasal ed arum, nayarin onkapuy so espiritualidad na kongregasyon.

5, 6. Antoy naaralan tayod ilustrasyon na drayber tan say panmoria tod panmantini na makina, tan panon itan ya niyaplika ed pangipasal ed arum diad kongregasyon?

⁵ Isipen iyan ilustrasyon: Amta na drayber ya pian namantini toy luluganan to tan mansiansian maabig so kondisyon na makina, kaukolan ya regular ya man-change oil. Balet ompan isipen to ya anggano agman-change oil, ayos labat basta walay gasolina na luluganan to. Ta no anggapoy gasolina, ag-onandar so luluganan. Nayarin irason to, ‘Anggano agak ni man-change oil, onandar met ni luluganan ko.’ Balet mapeligro itan. No ipappaleen na drayber so pan-change oil, agto naam-amtaan ya aderal la manayay luluganan to. Mas dakel la laingen so panaon tan kuarta ya usaren tod pampaapiger ed satan pian onandar lamet. Antoy naaralan tayod saya?

⁶ Tua, dakel so importantin kimey na saray elder ya kaukolan ya asikasoen a tampol; ta no andi, naapektoan so kongregasyon. Singa samay drayber ed ilustrasyon ya seseguroen ton walay gasolina na luluganan to, seseguroen met na saray elder “iray mas importantin bengatla.” (Fil. 1:10) Balet, wala ray elder ya busy lan maong ed saray importantin bengatla diad kongregasyon kanian anggapo lay panaon dan mangipasal ed arum—aliling to et napapaulyanan da so panmantini na makina. No naynay dan ipapaleen so pangipasal, agda naam-amtaan ya kulang la manayay kualipikadon brother ya mangasikasod amin ya responsabilidad ed kongregasyon.

7. Antoy nibaga tayod saray elder ya mangipapanaon ed pangipasal ed arum?

 ⁷ Kanian agyon balot iisipen ya agtanton importante so pangipasal. Saray elder ya nononoten day arapen na kongregasyon tan mangipapanaon ed pangipasal ed arum et makabat ya manangasikaso tan bendisyon ed saray agagi. (Basaen so 1 Pedro 4:10.) Panon ya nagunggonaan so kongregasyon?

8. (a) Anto ray rason no akin ya kaukolan ya saray elder et mangipasal na arum? (b) Antoy importantin responsabilidad na saray elder ya manlilingkor ed pasen ya mas baleg so pankaukolan? (Nengnengen so kahon ya “ Importantin Misyon.”)

⁸ Nepeg ya “mapaabeban” bidbiren na saray eksperiensyadon elder ya diad itatken da et limitado lay nagawaan da parad kongregasyon. (Miq. 6:8, NW) Tan nepeg da met ya ikonsidera iray “ag-iilaloan a nagawa,” ya lapud satan et ompan biglan manguman so situasyon da tan nairapan la ran mangasikaso ed saray responsabilidad dad kongregasyon. (Ecl. 9:11, 12, NW; Sant. 4:13, 14) No sankanonot na saray elder so pankaabigan na pulok nen Jehova, makuli dan inabang ed saray mas ugaw ya brother iray naaralan da ed dakel lan taon ya panlilingkor da.—Basaen so Salmo 71:17, 18.

9. Antoy nagawad arapen ya lapud satan et importante so pangipasal ed arum?

⁹ Anto ni sakey a rason no akin ya bendisyon ed pulok iray elder ya mangipapasal ed arum? Papabiskegen day depensa na kongregasyon. Panon? No mansagpot iran mangipasal na arum, mas dakel ya brother so akaparaan ya ontulong pian mansiansian mabiskeg tan mankakasakey so kongregasyon, aliwa labat a diad sayan kaunoran iran agew, noagta lalo lad onsasabin baleg a kairapan. (Eze. 38:10-12; Miq. 5:5, 6) Kanian sikayo ran inar-aro min elder, kekerewen mid sikayo ya regular yon ipanaon so pangipasal ed arum manlapu la natan.

10. Antoy nayarin gawaen na elder pian nipanaon toy pangipasal ed arum?

¹⁰ Natatalosan mi ya nayarin busy kayo lan maong lapud pangaasikaso yod importante iran kimey ed kongregasyon. Balet, kaukolan ya say arum ya panaon yo et igana yod pangipasal. (Ecl. 3:1) Seguradon nabawbawi so panaon ya usaren yo parad satan.

11. (a) Antoy makapainteres ed saray suhestion na saray elder ed nanduruman bansa no nipaakar ed panangipasal? (b) Unong ed Uliran 15:22, akin ya makagunggona so pangikonsidera tayod saray suhestion da?

¹¹ Diad agano ni, wala ray pigaran elder ya epektibon mangipapasal ed arum ya tinepetan no panon da itan ya gagawaen. * Anggano nandurumay situasyon na sarayan elder, nampapara so inter dan suhestion. Antoy papaneknekan na satan? Papaneknekan na satan ya say panangipasal a base ed Biblia et onaplika ed “amin a pasen diad kada kongregasyon”—singa met ed panaon nen apostol Pablo. (1 Cor. 4:17) Kanian diad sayan artikulo tan ed onsublay, aralen tayo so pigaran suhestion na sarayan elder.—Uli. 15:22.

12. Antoy kaukolan nin gawaen na elder, tan akin?

¹² Kaukolan ya iparaan na elder so puso na ipapasal to. No panon a say sakey ya hardinero et kaukolan to nin bukalkalen  so dalin antis ya mantanem, kaukolan met ya iparaan ni na elder so puso na ipapasal to antis ton ibangat. Panon itan ya nagawaan na saray elder? Sarag dan aligen so alimbawa na sakey a propeta nensaman, si Samuel. Antoy ginawa to?

13-15. (a) Antoy ingganggan nen Jehova ed si Samuel? (b) Panon ya ginawa nen Samuel itan ya asainmin to? (Nengnengen so litratod gapo na artikulo.) (c) Akin ya makapainteres ed saray elder natan iyan salaysay ed Biblia?

¹³ Masulok ya 3,000 taon lay apalabas, oniay ingganggan nen Jehova ed maedad lan si propeta Samuel: “Nabuas ed singa saya a panaon, ibakik ed sika so sakey a laki a nanlapu ed dalin na Benjamin, tan sikato so lanaan mo pian sikato so prinsipe ed baley ko ya Israel.” (1 Sam. 9:15, 16) Amoria nen Samuel ya aliwa lan sikatoy mangidaulo ed Israel tan sikatoy ingganggan nen Jehova ya lanaan so balon lider. Nayarin naisip nen Samuel, ‘Panon kon iparaan iyan too parad kimey to?’ Walay naisip ton plano.

¹⁴ Diad tinmumbok ya agew, nen anengneng nen Samuel si Saul, imbaga nen Jehova ed propeta to: “Nia so laki.” Diman la inggapo nen Samuel imay plano to. Nanggaway paraan pian makapantongtong ira nen Saul. Intagar ton mangan. Pinayurong toy Saul tan say lingkor to ed manunan pasen diad pananganan tan angiparungo na sankaabigan ya tegteg na karne, tan imbaga to: “Akan mo, ta nibiig itan parad sika diad sayan okasyon.” Insan intagar nen Samuel si Saul diad abung to. Legan ya wala rad dalan, balibali tongtongan da. Kasabi dad abung nen Samuel, linma rad toktok na abung. Ditan et ‘nantultuloy ya akitongtong si Samuel ed si Saul’ ya anggad inyugip da. Diad tinmumbok ya agew, nilanaan nen Samuel si Saul, inangoban to, tan inikdan to na kaaruman iran instruksion. Kayari na satan, imbaki to lay Saul—akaparaan la parad onsublay iran nagawa.—1 Sam. 9:17-27, NW; 10:1.

¹⁵ Siempre, say panlana na lider na sakey a nasyon et duma ed pangipasal ed sakey a brother pian magmaliw ya elder odino ministeryal a lingkor diad kongregasyon. Anggaman ontan, dakel so naaralan na saray elder ed paraan ya inusar nen Samuel. Aralen tayoy duara ed saratan.

16. (a) Antoy alikna nen Samuel nen kinmerew na ari iray Israelita? (b) Antoy reaksion nen Samuel nen ingganggan nen Jehova ya lanaan toy Saul?

¹⁶ Mabulos ya manbangat, agnapipilitan. Nen naamtaan nen Samuel ya labay na saray Israelita so nawalaay ari, ag-aliketan tan pakalikna to et impulisay da. (1 Sam. 8:4-8) Diad tua, agto labay ya gawaen so kerew da kanian amitlo nin binagaan nen Jehova ya dengelen to ra. (1 Sam. 8:7, 9, 22) Anggano ontan so alikna nen Samuel, ag-nanimon odino nanem-em na sakit na linawa ed pinili nen Jehova ya onsalat ed sikato bilang lider. Nen ingganggan nen Jehova ya lanaan toy Saul, mabulos ya inmunor, aliwan lapud obligasyon to itan ya gawaen, noagta lapud inaro toy Jehova.

17. Panon ya naalig na saray elder natan so panmoria nen Samuel, tan antoy resulta no ontan so gawaen da?

¹⁷ Singa si Samuel, maar-aro met iray eksperiensyadon elder natan ed saray ipapasal da. (1 Ped. 5:2) Mabulos iran mangibabangat tan ag-ira natatakot ya onla lad ipapasal da so arum ya pribilehyo da. Agda ipapasen iray ipapasal da ya kakompetensia, noagta bilang pinablin “kakimeyan” ya ontulong ed sikaran mangasikaso ed pankaukolan  na kongregasyon. (2 Cor. 1:24; Heb. 13:16) Agaylay liket na sarayan mabulos ya elder sano nanenengneng dan uusaren la na saray ipapasal da so abilidad da parad pankaabigan na kongregasyon!—Gawa 20:35.

18, 19. Panon ya niparaan na elder so puso na ipapasal to, tan akin ya importante itan a gawaen?

¹⁸ Magmaliw ya kaaro, aliwa labat ya managbangat. Diad samay agew ya akabat nen Samuel si Saul, sarag to la komoy mangalay larak tan tampol to lan iyibung ed ulo nen Saul, insan to la ibaki—alanaan ya tua balet ag-akaparaan. Aliwan ontan so ginawa nen Samuel. Sikatoy angigana na panaon pian kalkalnan niparaan so puso nen Saul. Antis ton nilanaay Saul, saniba ran angan, intagar ton nanakar, abayag iran nantongtong, tan nampainawa ni ra ingen. On, inalagar nen Samuel so dugan panaon pian lanaan so balon ari.

¹⁹ Ontan met natan. Antis ya ipasal na elder so sakey a brother, nepeg ya mangigana ni panaon pian nakaaro to tan magmaliw iran komportable ed sakey tan sakey. Nayarin nandurumay paraan pian nagawaan itan na saray elder, depende ed situasyon tan kultura ed lugar da. Balet anggan iner so lugar ya panaayaman yo, no mangigana kayoy panaon pian nakaibay ipapasal yo anggano busy kayo, singa yo ibabagad sikaton, “Importante kad siak.” (Basaen so Roma 12:10.) Seguradon naapresya na ipapasal yo so maaron atension ya iiter yod sikato.

20, 21. (a) Panon mon ideskribe so maong ya managbangat? (b) Antoy aralen ed ontumbok ya artikulo?

²⁰ Sikayo ran elder, tandaan yo: Say maong ya managbangat et aglabat mabulos ya mangipasal na arum, noagta nepeg ya inar-aro to met so ipapasal to. (Ikompara so Juan 5:20.) Akin et importante itan? No nalikna na ipapasal yo ya inar-aro yo, mas mabulos ya manpabangat. Kanian sikayo ran pinabpabli min elder, legan kayon mangipapasal, komon ta aliwa ki’ labat ya managbangat—noagta maong kayo met ya kaaro.—Uli. 17:17; Juan 15:15.

²¹ No niparaan la na elder so puso na sakey a brother, sarag to lan ipasal. Anto ran paraan so nausar to? Aralen tayo itan diad ontumbok ya artikulo.