“AKIN et agmo labay ya dayewen iray inmuunan atateng mo?” so kuan nen inak ed siak. “Agmo ta amta ya sikaray nanlapuan na bilay mo? Anggapoy utang na linawam. Bastabastam labat ya benegan so abayag lan tradisyon tayo? No agmo dayewen iray inmuunan atateng tayo, singam ibabaga ya kaambagelan labat so pandadayew tayo.” Insan inyaki-akis nen Nanay ko.

Abigla ak ta aliwan onman ya mansalitay Nanay ko. Diad tua, sikara so malabay ya manaral ak na Biblia, balet amtak ya ginawa da itan lapud agda labay so manpaiyaral. Lanang kon gagawaen so labay nen inak, balet natan ko labat ag-unoren, ta say labay kon paliketen et si Jehova. Agko ’tan nagawaan no anggapoy tulong To.

Say pamilya mi et Budista, singa met ed dakel ya totood Japan. Balet kayari labat na duaran bulan ya inyaralan ak na saray Tasi nen Jehova, akombinse ak ya walad Biblia so katuaan. Nen naaralan kon wala manayay Amak ed tawen, talagan labalabay kon nakabat ya maong. Maliket min pantotongtongan nen Nanay iray nanaaralan ko. Onaatendi ak lad Kingdom Hall kada Simba. Legan ya ondarakel so nanaamtaan kon katuaan, imbagak ed si Nanay ya agak la milad saray ritual ed Budismo. Biglan angumay ugali to. “Baleg a kababaingan ed pamilya tayo no walay sakey ed sikatayon agto inaroy inmuunan atateng to” so kuan to. Binagaan da ak ya itundak lay panaaral koy Biblia tan say pipiaral ko. Agkon balot naisip ya onman so ibaga nen inak! Singa aliwan sikara.

Naaralan kod Efeso 6 ya labay nen Jehova ya tuloken ko ray atateng ko. Pinilaan nen Tatay si Nanay. Nen unaan, inisip ko ya no dengelen ko ra, dengelen da ak met tan ompawil so deen ed pamilya mi. Sakey ni, asingger lay paneksamin ko parad pan-haiskul ko, tan kaukolan koy manparaan. Kanian imbagak ed sikara ya taloy bulan ak ya ag-onatendid Kingdom Hall, balet insipan kod si Jehova ya kayari to ’tan et miaral ak lamet.

Aliwa man ya desisyon ko. Unona, say amtak et agmanguman so liknaan ko kayari taloy bulan. Balet aliknak a tampol ya kinmapuy so espiritualidad ko, tan onaarawi ak lad si Jehova. Komadua, imbes ya abuloyan da ak di Nanay tan Tatay, lalo da ak laingen ya  pinagyaw pian itundak so amin ya gagawaen ko parad dugan panagdayew.

Diad Kingdom Hall, dakel so akabat ko ya susumpaen met na kapamilya da. Impaseguro dad siak ya tulongan ak nen Jehova. (Mat. 10:34-37) Indanet da ya siak so manunan makatulong pian nisalba met so pamilyak. Kanian nampikasi ak ya maong ed si Jehova, ta labay kon naaralan no panon so panmatalek ed sikato.

Diad pamilya mi, nanduruman paraan so gagawaen da pian patundaen ak. Mikasi tan mikatunongan ed siak si Nanay. Mabetbet ya agak la onesel. Ta no mansalita ak, agmi lanlamang nakontrol so emosyon mi, ta ipilit mi katunongan mi. No komon ta tinalosan koy nalilikna tan nononoten nen Nanay, naiwasan seguroy kolkol. Inaruman na atateng ko so kimey kod abung pian agak makaalis. No maminsan, agak balet makaloob ta italak day abung odino agda ak ikeraay kanen ko.

Nananap si Nanay na kakampi to. Kinatongtong toy maestrok, balet agla akibabali iyan maestrok. Intagar ak nen Nanay ed manager tod trabaho pian kombinsien to ak ya amin a relihyon et andi-kakanaan. Tinawagan nen Nanay iray kakanayon mi tan manak-akis legan ton mikakasi ya tulongan da. Mansyodot ak, balet pinaseseg ak na saray elder ya nonoten kon satan ya gagawaen nen Nanay et mangiiter na pantasi ed dakel ya totoo.

Insan nen kien, kaukolan koy mandesisyon no kasin mankolehyo ak odino andi. Labay na saray atateng ko ya nawalaan ak na ipapasen dan marakep a bilay. Iilaloan da ya  makalmo ak na maong a trabaho. Agkami makapantongtong ya mareen nipaakar ed saya, kanian aminpigak ya sinulatan si Nanay tan Tatay, ya ditan et impaliwawak no anto ray labay kon gawaen ed bilay ko. Amasnok si Tatay, tan inkuan ton: “Mananap ka la siri’ trabahom. No anggapo ni naalmom anggad nabuas, taynan ka lad sayan abung.” Nampikasi ak ed si Jehova. Nen nampulong ak ed kaimbuasan, walay duaran sister ya angibagad siak no nayarin magmaliw ak ya tutor na ananak da. Ag-itan agustoan nen Tatay kanian agto ak kakatongtongen; diad tua, agto ak la iimanoen. Imbaga nen Nanay ya mas labay to nin magmaliw ak ya kriminal nen say magmaliw ak ya Tasi nen Jehova.

No maminsan, iisipen ko no kasin labay nen Jehova iyan gagawaen ko ya agko uunoren so atateng ko. Balet diad mabetbet ya pampipikasik tan pandadalepdep kod saray teksto ed Biblia nipaakar ed panangaro nen Jehova, nagmaliw ya positibo so panmoriak ed isusumpa, tan atalosan ko ya anggan panon et lapu itan ed panangiyansakit ed siak na atateng ko. Tinulongan ak nen Jehova ya ipetek so nonot ko tan nanengneng no antoy nepeg kon gawaen. Ontan met, no kapigan mas mibibiang ak ed ministeryo, diman ko mas nai-enjoy itan. On, sakey ed saray labay kon gawaen et say manpayunir.

Wala ray sister ya nen naamtaan dan labay koy manpayunir, binagaan da ak ya alagaren ko ni kunon onkalma iray atateng ko. Impikasik ed Dios ya ikdan to ak komon na karunongan, nan-research ak, inusisak no antoy motibok, tan akitongtong ak ed saray maespiritual ya agagi. Diman ko alikna ya talagan labay kon paliketen si Jehova. Sakey ni, no bilang agak ni manpayunir, agak met segurado no kasin manguman ni ray atateng ko.

Nampayunir ak nen asingger ak lan man-graduate ed haiskul. Nen medyo abayag ak met lan payunir, labay koy manboluntaryod lugar ya baleg so pankaukolan. Balet, aglabay nen Nanay tan Tatay ya onarawi ak. Kanian inalagar kon man-20 años ak. Insan pian ondeey nonot nen Nanay, kinerew kod branch office ya iyasain da ak ed southern Japan, ta wala ray kakanayon mi diman.

Diad satan ya teritorya, abendisyonan ak ta pigaran iyaaralan ko so nampabautismo. Nanaral ak na Ingles pian mas napalaknab koy panaglingkor ko. Walay duaran brother ya espisyal payunir ed kongregasyon mi. Anengneng koy seseg da tan no panon dan tutulongan so arum. Kanian labay ko met so magmaliw ya espisyal payunir. Kaleganan to ’ya, amiduan nansakit na grabe si Nanay. Kanian amidua ak met ya sinmempet pian naasikasok ira. Ag-itan inilaloan nen Nanay, kanian medyo linmemew so liknaan tod siak.

Kayari pitoy taon, sinulatan ak nen Atsushi, sakey ed saramay espisyal payunir ya abitlak nen niman. Imbaga ton labay to ak ya naasawa tan nononoten to no kasin iyabuloy na situasyon ko tan no antoy nibagak ed satan. Anggapon balot so panggustok ed si Atsushi, tan agkon balot ninonot ya walay panggusto tod siak. Kalabas na sakey bulan, sinulatan ko ya labay kon mas maabig no nakabat mi ni sakey tan sakey. Naamtaan mi ya dakel manaya so pamparehoan mi, ya labay min dua so mantultuloy ya manlingkor bilang full-time tan mabulos kamin pausar ed anggan anton asainmin. Diad inlabas na panaon, nankasal kami. Malikeliket ak ta inmatendid kasal mi si Nanay, Tatay, tan pigaran kakanayon mi!

 Ag-abayag, legan min manlilingkor bilang regular payunir, aturo si Atsushi ya kasandin manangasikaso na sirkito. Insan nen kien, wala ni ray sinmabin bendisyon. Aturo kami bilang espisyal payunir insan niasain kami diad kimey ed sirkito. Nen akasakey kami lan liber ed sirkito, tinawagan kami na branch office. Say tepet da, ‘Awaten yo no bilang niasain kayod kimey ed sirkito diad Nepal?’

Inisip ko no anto kasi nalikna na atateng ko no onarawi ak. Kanian tinawagan ko ra. Si Tatay so inmebat, tan say kuan to: “Balibali tay laen mon lugar.” Manga sakey simba antis to ’ya, walay kaaro ton angiter ed sikato na libro nipaakar ed Nepal, tan inisip ni ingen nen Tatay ya balibali ompasyar ed satan ya lugar.

Nen malikeliket kamin manlilingkor kaiba iray agagin Nepalese, wala lamet so sinmabin bendisyon. Kaiba lad sirkito mi so Bangladesh, asingsingger itan ed Nepal balet dakel so pidumaan to. Nanduruma so paraan na panagpulong ditan. Kayari limay taon, niasain kami lamet ed kimey ed sirkito diad Japan.

Lalok ya akabat si Jehova lapud impanlingkor mid Japan, Nepal, tan Bangladesh. Kada bansa et nanduruma so ugali tan kultura da. Tan diad kada bansa, kada too et nikadkaduma. Anengneng ko no panon ya aasikasoen, aawaten, tutulongan, tan bebendisyonan nen Jehova so kada indibidual.

Benendisyonan ak nen Jehova diad impakapikabat kod sikato, inikdan to ak na kimey, tan na maomaong ya asawa. Inggiya ak na Dios pian duga iray desisyon ya gawaen ko, tan natan et maong so relasyon kod sikato tan ed pamilyak. Diad tulong nen Jehova, maong la natan so ulopan mi nen Nanay. Misalsalamat ak ya maong ta akapikareenan ak ed Dios tan ed si inak.