Tepet na Saray Manbabasa

Iner Nagawa so Guerra ya Armagedon?

Say guerra ya Armagedon et agnagawa ed sakey ya espisipikon lugar, noagta diad interon dalin. Akin et ontan so nibaga tayo? Lapud saramay manlalaban et agaylay karakel, sirin et ag-ira onduga ed sakey ya espisipikon pasen.

Say Armagedon, odino Har–Magedon, et kabkabat met bilang say “bakal na baleg ya agew na Dios, a Makapanyarin-amin.” Usaren nen Jehova a Dios so Anak to, si Kristo Jesus, pian tiponen iray angheles a milaban ed puersa na amin a mauges a manuley ed mundo.​—Apocalipsis 16:14; 19:11-16.

Sagyaten nen Satanas iray bansa pian mibiang ed sayan guerra. Ibabaga na Biblia so nipaakar ed “espiritu na saray demonyo” ya onla ed “saray arari [manuley] na amin a mundo pian tiponen da ra . . . ed pasen a dia ed Hebreo [et] manngaran na Armagedon.”​—Apocalipsis 16:14-16.

Diad amin a libro na Biblia, say makapainteres a maong ed dakel a managbasa et say Apocalipsis, tan amayamay so mangibabagan nepeg a talosan itan ed literal a paraan. Kanian, walay eksakton lugar a ditan kuno onggapo so Armagedon, tan mannerbiyos dan oobserbaan iray nagagawa ed satan a pasen. Say ideyan nagawa so Armagedon ed sakey ya espisipikon lugar et nanlapud sankadaanan a Griegon komentaryo ed Apocalipsis ya insulat nen Oecumenius nen komanem a siglo C.E.

Imbaga nen John F. Walvoord, a datin presidente na Dallas Theological Seminary, a say Armagedon et “say unor tan inyupo-upot lan sankamundoan a guerra ya akasentro’d Middle East,” tan ontan met so kaslakan a pananisia na klero na saray Pundamentalista. Unong ed si Walvoord, say espisipikon pakagawaan na sayan baleg a guerra et diad geray na kadaanan a syudad na Megido, a ditan et walay pukdol a ngalngali 20 metros so kaatagey to.

Bangbalet, say tutukoyen na Apocalipsis a lugar a manngaran na Armagedon et aliwan literal. Diad tua, unong ed orihinal a Griegon lenguahe, ibabaga na introduksion na sayan libro a saray nisulat dia et nisalaysay ed simbolikon paraan. Kanian onia so abayag lan imbaga na saray Tasi nen Jehova ed publikasyon dan Studies in the Sciptures, Tomo IV: “Agtayo iilaloan a walay nagawan pandaragup na totoo diad literal a Palandey na Megido.”

Saray agawa nensaman diad Megido et mangisisimbolo ed sakey a kipapasen odino situasyon a saray kakabusol na Dios et anggapo lay pakaliktar odino pakatakas da. Kanian diad Armagedon, seguroen na Dios a naekal lan amin so kaugsan ed interon mundo.​—Apocalipsis 21:8.

Saramay mangaaro ed si Jehova a Dios tan ed Anak to, si Jesu-Kristo, so agnepeg ya ontakot ed Armagedon. Say deralen labat na Dios ed sayan guerra et saramay ipapasen ton mauge-uges tan anggapo lay ilalo ran manguman. Aliwan turobos so paneral to. “Amta na Katawan so pangiliktar to ed saray masantos,” so kuan na Biblia. (2 Pedro 2:9) Onia met so makapaliket a sipan na Biblia diad Salmo 37:34: “Manalagar ka ed Jehova, tan tonton mo so dalan to, et itandoro to ka a manawir na dalin: sano napater so saray bagel, nanengneng mo.”