Kasin Ikokonsideram so Gagala na Dios Sano Manplaplano Ka?

SAY Clark’s nutcracker et sakey a kolor-dapol a siwit a marakdakep so uni to tan mantektekkiab diad saray katakelan na bandad sagur na Amianen America. Pian naparaanan so makaketel a panaoy yelo, tinaon a manitipon iyan siwit na anggad 33,000 a bukebukel tan ikokotkot to iratan ed manga 2,500 a nanduruman lugar. On, sayan siwit et talagan “mapalalo a makabat” ed pangitatarya to na naakan to ed arapen.​—Uliran 30:24.

Balet, mas makapadinayew so abilidad na too. Diad amin a pinalsa nen Jehova ed dalin, agnaparaan so kapasidad na too a makaaral manlapud saray eksperiensya to’d apalabas. Sarayan naaralan to et usaren to ed pamplano to ed arapen. Naimano nen makabat ya Arin Solomon a “wala ra so dakel a kanonotan [odino plano] ed puso na too.”​—Uliran 19:21.

Anggaman ontan, anggapo met lay arum a napanpilian na too noag say ibase so plano to ed padesir ton nagawa ed arapen. Alimbawa, saray planom a gawaen nabuas et ibasem ed padesir mo ya onagew tan mabilay ka ni. Samay unaan a padesir et posiblin nagawa, samay komadua balet et agtanton segurado. Tudtua so inkuan na sakey a managsulat na Biblia a si Santiago: “Agyo anggan amtay kipapasey bilay yo nabuas!”​—Santiago 4:13, 14, Maung a Balita.

Anggapoy ontan a limitasyon nen Jehova a Dios. Amta to so “panganggaan a manlapu ed gapo.” Say imbalikas to lan gagala to et segseguradon nasumpal. Oniay imbaga na Dios: “Say simbawak [odino linawak] mansiansia naani, tan gawaen ko naani so amin a labay ko.” (Isaias 46:10) Balet, anto kasi nagawa sano saray plano na totoo et misumlangan ed saray gagala na Dios?

Sano Misumlangan Iray Plano na Totoo ed Gagala na Dios

Manga 4,000 a taon lay apalabas, implano na saray manpapaalagey na Tori na Babel a pokpokan so ikayat na totoo. Onia so kuan da: “Mangipaalagey itayo na sakey a syudad tan sakey ya ilang [odino tori], a say toktok to makasabi ya angga ed tawen; tan manggawa itayo na sakey a ngaran a kirayewan tayo; agla piga no nikaykayat itayo ed tapew na amin a dalin.”​—Genesis 11:4.

 Balet, midumaan ed satan so gagala na Dios parad dalin. Onia so inganggan to ed si Noe tan ed saray anak to: “Manbunga kayo, tan ondakel kayo, tan makmakan yo so dalin.” (Genesis 9:1) Anto sirin so ginawa na Dios ed plano na rebelyoson totoo na Babel? Pinanduruma to so lenguahe ra pian agda natalosan so salita na sakey tan sakey. Antoy resulta? Oniay ibabaga na Biblia: “Si Jehova inkaykayat to ra nanlapud man ed tapew na amin a dalin.” (Genesis 11:5-8) Apilitan iray manpapaalagey na Babel a bidbiren so sakey a makanan leksion. Sano duma iray plano na totoo ed gagala na Dios, “say simbawa [odino linawa] nen Jehova, satan [so] mansiansia.” (Uliran 19:21) Kasin wala met so naaralan mo ed sayan agawa ed apalabas?

Say Inkamakulangkulang na Sakey a Toon Mayaman

Nayarin agmo met plano so manpaalagey na tori, balet dakel natan so manplaplanon mantipon na dakel a kuarta tan manpayaman, pian mainaway bilay da sano manretiro la ra. Natural met labat a labay tayon panliketan so bunga na saray nansagpotan tayo. Insulat nen Solomon: “Amin tayo nepeg ya oninum tan mangan tan panliketan so nansagpotan tayo, ta regalo ra na Dios.”​—Ecclesiastes 3:13, Maung a Balita.

Walay eebatan tayo’d si Jehova diad paraan na panguusar tayo ed sayan regalo. Ngalngali 2,000 a taon lay apalabas, indanet nen Jesus iyan punto ed saray disipulo to panamegley na sakey ya ilustrasyon. Inkuanto: “Say dalin na sakey a toon mayaman binmunga na dakel. Et minolimoli to ed loob ton dili, a kuan to, Anto so gawaen ko naani, ta anggapo so pangiyatolan ko ed saray bungak? Et inkuan to, Saya so gawaen ko; igebak so saray kamalir ko, et ipaalagey ko so babaleg; et iyatol ko ya amin diman so trigok tan saray kayamanan ko. Et kuan ko naani ed kamarerwak, Kamarerwa, dakel so saray kayamanan mo ya inyatol nipaakar ed dakel a taon; manpainawa ka, mangan ka, oninum ka, manliket ka.” (Lucas 12:16-19) Singa met makatunongan so plano na sayan mayaman a laki, agta ontan? Mipara’d samay siwit ya abitla ed gapo, singa met labat itatarya na sayan laki iray pankaukolan to’d arapen.

Balet, wala so lingo ed impan-isip na sayan laki. Intuloy nen Jesus: “Ingen inkuan ed sikato na Dios, Sika makulangkulang, natan a labi nakerew ed sika so kamarerwam; et saray bengatla ya intadiam, siopa naani makankayarian ed sikara?” (Lucas 12:20) Kokontraen kasi nen Jesus imay inkuan nen Solomon a say pansagpot tan saray maong a bengatlan pawalaen na satan et regalo a nanlapud Dios? Andi. Anto so labay ya ibaga nen Jesus? Inkuanto: “Ontan so mantipon na kayamanan nipaakar ed sikato, et aliwa a mayaman dia ed Dios.”​—Lucas 12:21.

 Ibabangat nen Jesus iray dumerengel to a labay nen Jehova a Sikato tan saray gagala To et ikonsidera tayo sano manplaplano itayo. Posible pa met a samay mayaman a laki et nagmaliw a mayaman ed Dios no komon ta pinabiskeg to so debosyon to ed si Jehova tan no pinaaralem to so kakabatan tan panangaro to. Napatnagan tayo ed imbabalikas na saman a laki ya anggapoy interes to ed saratan a bengatla, nisay walay intensyon ton mangikera na aanien to pian natodtor na saray pobri tan anggapo met so intensyon ton mangiyapay na bagat ed si Jehova. Say ontan iran maespiritual ya aktibidad tan aliwan sinisiblet a gawa et agkabiangan na bilay na sayan mayaman a laki. Saray plano to et para labat ed pakainawaan to tan kapenek na dili ton pilpilalek.

Naiimanom ta a say iyuuna na dakel a totoo natan ed bilay da et mipara ed samay inyuna na toon mayaman a deniskribe nen Jesus? Mayaman man itayo odino andi, main-inomay itayon nabiktima na aro’d kuarta, ya ibaliwala tayo la so relasyon tayo’d Dios lapud inagew-agew a pankaukolan tan kalkaliktan tayo. Anto so nagawaan tayo pian napaliisan itan a patit?

Panagplano na “Normal” a Bilay

Aliwan singa ed samay toon mayaman diad ilustrasyon nen Jesus, nayarin tumalikarkar kan mananap na pambilay. Anggaman ontan, no wala lay asawam, andi-duaruwan siansia nin manplaplano ka no panon mon niiter iray pankaukolan na pamilyam tan no posible et pati say maong ya edukasyon na anak mo. No anggapo ni balet so asawam, ompan planom so mananap na trabaho odino mansiansia ed trabahom, pian agka magmaliw a pabelat ed arum. Marakep met irayan plano.​—2 Tesalonica 3:10-12; 1 Timoteo 5:8.

Balet, anggan say ikokonsideran normal a bilay, salanti, say pantrabaho, pangan, tan iyinum, et posiblin sengegan a say sakey et manbilay a misumlangan ed linawa na Dios. Panon itan a nagawa? Oniay inkuan nen Jesus: “Unong ed saray agew nen Noe, ontan naani so isabi na Anak na too. Ta singa diad saraman ya agew ed arapen na delap nankakakan ira tan naninum ira, angaasawa ra tan akiaasawa ra anggad agew ya inloob nen Noe ed biong. Tan agda akabkabatan [odino “inim-imano,” NW] angga ed sinmabi’ delap, et inyanor to ra ya amin; ontan naani so isabi Anak na too.”​—Mateo 24:37-39.

Antis na Delap, pinili na maslak a totoo so bilay a momoriaen dan normal. Balet ta say problema et agda “inim-imano” so gagala na Dios a paneral ed mauges a totoo panamegley na sankamundoan a delap. Seguradon inisip da a say paraan na panagbilay nen Noe so aliwan normal. Ingen, sanen sinmabi Delap, apaneknekan a say paraan na impanbilay nen Noe tan say pamilya to so talagan duga.

Diad agew tayo, dakerakel so ebidensyan mamapaneknek a manbibilay tayo la ed panaoy anggaan. (Mateo 24:3-12; 2 Timoteo 3:1-5) Asingger lan ‘buybuyaken tan upoten’ na Panarian na Dios iyay kaplesan a sistema na bengabengatla. (Daniel 2:44) Diad uley na satan a Panarian, say dalin et magmaliw a paraiso. Ekalen met la na satan so sakit tan patey. (Isaias 33:24; Apocalipsis 21:3-5) Amin a pinalsa diad dalin et mankakasakey tan aglan balot naerasan.​—Salmo 72:16; Isaias 11:6-9.

Balet, antis a gawaen iratan nen Jehova, gagala ton say maong a balita nipaakar ed Panarian to et “nipulong naani ed sankamundoan ya onkanan pamintuaan ed saray amin a nasyones.” (Mateo 24:14) Mitunosan ed satan a gagala na Dios, manga pitoran milyon a Tasi nen Jehova so mangipupulong ed sayan maong a balita diad 236 iran bansa tan ed masulok ya 400 iran lenguahe.

Nayarin diad padesir na totoo ed mundo, say paraan na panagbilay na saray Tasi nen Jehova et nikadkaduma tan balawen da nira ingen. (2 Pedro 3:3, 4) Singa saramay nambilay sakbay na Delap, dakel natan so okupado ed inagew-agew a rotina na bilay. Moriaen da lagin aliwan balanse so siopaman ya agmalabay a manbilay unong ed iisipen dan normal a panagbilay. Balet, diad panmoria na saramay walaan na pananisia ed sipasipan na Dios, say peteg a balansin bilay et say pangiyuna ed panaglingkor ed Dios.

Kanian, mayaman ka man, mairap, odino kabkaabigan labat so bilay mo, marakep no pana-panaon et surien mo iray planom ed arapen. Legan mon gagawaen itan, tepetan moy inkasika, ‘Kasin ikokonsiderak so gagala na Dios sano manplaplano ak?’

[Litrato ed pahina 11]

No misumlangan iray plano na totoo ed gagala na Dios, say linawa nen Jehova so mansiansia

[Litrato ed pahina 12]

Diad samay parabolo nen Jesus, ag-inkonsidera na toon mayaman so gagala na Dios ed saray plano to